Esera 4:1-24
4 Zum u mbahyomov mba Yuda man Benyamin+ ungwa ér ior mba yange i yem a ve uikyangen la hide+ mba va maan Yehova Aôndo u Iserael tempel yô,
2 fese je ve va kohol Serubabel kua mbayaav, ve kaa a ve ér: “De nen se maa a ven imôngo; gadia se kpaa se mba civir* Aôndo wen ne,+ shi se mba ne un iniav, er ne nahan, hii sha ayange a Esar-hadon+ tor u Ashiria yange va a vese heen la je.”+
3 Kpa Serubabel man Yeshua kua mbayaav mba ken Iserael cii, gema kaa a ve ér: “Ne mba a ci ken tom u maan iyou i Aôndo wase ú se lu eren ne ga.+ Ka se tseegh se maa i sha ci u Yehova Aôndo u Iserael, vough er Tor Shirushi, tor u Pershia, yange kaa se nahan ye.”+
4 Nahan ior mba hen tar la zer eren akaa a nan ior i Yuda iyolkpen,* sha u asema a de kera taver ve u maan kwagh ga yô.+
5 Ve za na mbawasenmhen inyaregh sha u ve bunde mbaawashima mba Mbayuda mbara cii.+ Ve er kwagh ne, hii sha ayange a Tor Shirushi lu hemen Pershia la zan zan shighe u Tor Dariu+ lu va hemen Pershia la.
6 Sha mhii u hemen u Ahasueru la, ve nger kwagh sha iyol i mba ve tema ken Yerusalem man ajiir agen ken Yuda la.
7 Tsô sha ayange a Artashaseta, tor u Pershia la, Bishelam man Miteradati man Tabeel kua mbagenev mba eren tom a ve imôngo yô, ve nger washika hen tor Artashaseta; ve gema washika ne ken zwa Aram,+ ve nger un sha asangaabaacaa a ken zwa Aram.*
8 * Rehum ortom u gomoti u vesen, kua Shimshai orngeren, ve nger washika hen Tor Artashaseta sha u wan mba ken Yerusalem kwagh iyol, ve nger nahan:
9 (Lu sha uwegh ku Rehum, ortom u gomoti u vesen, man Shimshai orngeren, kua mbagenev mba eren tom a ve imôngo yô, ka mbaajiriv man imue gomna kua mbaakawe, ka ior i Ereki+ man Mbababilon man mba ve tema ken Susa la,+ ka Mbaelam+ je la,
10 kua akuraior agen a orvesen man orcivirigh Asenapar yange yem a a uikyangen za haa hen agar a Samaria+ kua uharegh mbagenev mba ve lu Yande Ifi La* cii la. Nahan
11 ka washika u ve tindi un a mi je ne.)
“Hen Tor Artashaseta. Mbatomov ou, ior mba Yande Ifi La, mba pasen we nahan ér:
12 Tor ma a fe kwagh ne wang, Mbayuda mba ve mough hen a we ve ve hen a vese la va nyôr hen Yerusalem. Mba hiden maan gar u hembanato man u ifer ne. Mba nôngon u maan ugir nav been,+ shi sôron amagh a na.
13 Yô tor a fa kwagh ne hegen wang nahan ér, aluer i maa gar ne man i kure ugir nav kpaa yô, ior mban vea kera taan kpandegh ga, shi vea kimbin inyaregh ki saven+ shin kpandegh ku peren kpaa ga. Nahan inyaregh ki utor ma ve zough a mi la kia saa.
14 Er se ye bar u hen ya u tor,* man se nenge ser doo u a va tor a mgbejime sha akaa ne nahan ga yô, se tindi ser i pase tor kwagh ne,
15 sha er a time ken takeda u uter ou ngeren akaa ker la yô.+ U time ken takeda u ngeren akaa ne yô, u kav er gar ne a lu gar u hembanato, u bulan utor man ikpentar, man er hii sha ayange a tsuaa la je ior mba ker lu ior mba tuur ior ken ityô ér ve hendan a gomoti yô. Ka nahan man yange i tim gar ne ye.+
16 Se mba pasen tor ser a fa ér, aluer i maa gar ne shi i bee ugir nav yô, cuku kpa u kera lu a tahav sha* uharegh mba Yande Ifi La ga.”+
17 Tsô tor tindi loho hen Rehum ortom u gomoti u vesen la, kua hen Shimshai orngeren, man hen mbagenev mba ve eren tom a ve imôngo, mba ve lu ken Samaria kua haregh u Yande Ifi La cii, a kaa ér:
“M ngu sughun ne!
18 I ôr* washika u ne tindi se a mi la sha ato a am wanger wanger m ungwa.
19 Nahan m kaa mer i tôv sha kwagh ne, mba tôvon yô, i kav er hii sha ayange a tsuaa la je, gar la lu gar u hendan a ator, shi ato a hemban man ahendan lu ker kpishi yô.+
20 Ngise ator a lun a tahav lu ken Yerusalem. A hemen haregh u Yande Ifi La cii, i taan a kpandegh shi a saven akaa shi a ngohol kpandegh ku peren kpaa.
21 Nahan yô, kaa nen ior mbara ve de tom la, sha er a kera hide a maa gar la ga yô, zan zan saa me va na ian.
22 Ver nen ishima tsung, de haan nen iyol inya u eren kwagh sha ikyaa ne ga, sha er a kera seer van tor a mgbejime sha akaa ne ga yô.”+
23 Mba va er washika u Tor Artashaseta ne sha ato a Rehum man Shimshai orngeren, kua mbagenev mba ve eren tom a ve imôngo la yô, fese je ve mough ve yem ken Yerusalem hen Mbayuda, ve za yange ve tom la sha igyosough.
24 Nahan tom u maan iyou i Aôndo i i lu ken Yerusalem la maa tile. I kera za hemen a u ga zan zan inyom i sha uhar i mtemtor u Dariu, tor u Pershia la.+
Ngeren mba shin kpe
^ Zwa Heberu, “se mba keren.”
^ Zwa Heberu, “akaa a nan ér ave a kpe ve.”
^ Shin a fatyô u kaan ér, “i nger un ken zwa Aram, i gema ken zwa ugen.”
^ Esr 4:8 zan zan 6:18 cii yange i nger un lu ken zwa Aram.
^ Shin “Uferati Vegher La.”
^ Shin “i kimbin se sha inyaregh ki hen kwa u tor.”
^ Shin “u kera lu a kwar ken.”
^ Shin a fatyô u kaan ér, “I gema, shi i ôr.”
