1, 2. Jeová haruka Moisés atu halo saida? No nia promete saida ba Moisés?

 HANOIN toʼok se imi presiza bá koʼalia ho liurai ida atu reprezenta Maromak nia povu. No ema hotu taʼuk liurai neʼe. Imi sente oinsá? Imi sente taʼuk ka lae? Imi nakdedar ka lae? Imi hatene atu koʼalia saida? Saida mak bele ajuda imi hodi imi bele koʼalia liafuan ho kbiit hodi reprezenta Maromak?

² Ida-neʼe mak Moisés, ema neʼebé laran-maus liu hotu nia situasaun. (Números [Bilangan] 12:3) Jeová haruka nia bá hasoru Liurai Ejitu neʼebé la iha respeitu ba ema no foti-an, hodi fó orden ida ba nia. Orden neʼe mak hodi husik Maromak nia povu sira sai husi rai-Ejitu. Agora ita komprende tansá mak Moisés koʼalia ba Jeová: “Haʼu neʼe sé atu haʼu tenke bá hasoru Liurai Ejitu nian no lori ema Izraél sira sai husi Ejitu?” Karik Moisés sente nia la iha brani atu bá hasoru no koʼalia ho Liurai Ejitu nian. Maibé Jeová promete buat ida ba nia hodi hatete: “Haʼu sei hamutuk ho ó.”—Êxodo (Keluaran) 3:9-12.

3, 4. (a) Moisés taʼuk kona-ba saida? (b) Imi bele hasoru susar saida neʼebé hanesan ho Moisés nian?

³ Moisés taʼuk kona-ba saida? Nia taʼuk tanba keta Liurai Ejitu nian sei la rona ka simu nia nuʼudar ema neʼebé reprezenta Maromak. Nia mós taʼuk tanba keta ema Izraél sira sei la fiar Maromak mak hili nia atu lori sira sai husi rai-Ejitu. Tan neʼe nia hatete ba Jeová: “Oinsá se sira la fiar haʼu no la rona ba haʼu-nia liafuan,  tanba sira sei hatete, ‘Jeová la mosu ba ó.’”—Êxodo (Keluaran) 3:15-18; 4:1.

⁴ Oinsá ho imi? Karik imi nunka presiza bá atu koʼalia ho liurai ida. Maibé imi sente susar ka lae bainhira atu koʼalia ho ema kona-ba Maromak no ninia Ukun iha haklaken-fatin? Se hanesan neʼe, haree toʼok saida mak ita bele aprende husi buat neʼebé akontese ba Moisés.

5. Jeová tau saida iha Moisés nia liman, no oinsá mak ida-neʼe halo nia aten-brani? (Haree dezeñu iha pájina 11.)

⁵ Bainhira Moisés dehan ba Jeová katak nia taʼuk ema sei la fiar ba nia, Maromak halo buat ida hodi ajuda Moisés hasoru susar neʼe. Bíblia hatete: “Jeová hatete ba nia: ‘Iha ó-nia liman neʼe saida?’ Nia hatán: ‘Ai-tonka ida’. Maromak hatete: ‘Soe nia ba rai.’ No nia soe ai-tonka ba rai, no ai-tonka neʼe sai samea ida, no Moisés halai sees husi samea neʼe. Tuirmai Jeová hatete ba Moisés, ‘Lolo ó-nia liman no kaer ninia ikun.’ No Moisés lolo nia liman hodi kaer samea neʼe, no samea neʼe sai filafali ai-tonka ida iha ninia liman. Depois Maromak hatete ba nia: ‘Ho ida-neʼe mak sira sei fiar katak Jeová . . . mosu duni ba ó.’” (Êxodo [Keluaran] 4:2-5) Maromak uza ninia forsa hodi halo ai-tonka iha Moisés nia liman sai fali samea ida. Milagre neʼe hatudu katak Maromak mak haruka Moisés duni hodi reprezenta Nia. Jeová hatete ba nia: “O sei lori ai-tonka neʼe iha ó-nia liman no halo milagre sira ho ai-tonka neʼe.” (Êxodo [Keluaran] 4:17) Ho Maromak nia autoridade iha ninia liman, Moisés bá ho aten-brani hodi koʼalia ba Liurai Ejitu no Maromak nia povu sira.—Êxodo (Keluaran) 4:29-31; 7:8-13.

6. (a) Ita tenke iha saida iha ita-nia liman bainhira bá haklaken, no tanbasá? (b) Esplika tanbasá mak “Maromak nia liafuan mak moris” no oinsá mak nia “iha kbiit boot”.

⁶ Ita iha saida iha ita-nia liman bainhira bá haklaken? Ita iha Bíblia no ita prontu atu uza Bíblia neʼe. Ema balu hanoin katak Bíblia mak livru diʼak deʼit. Bíblia laʼós diʼak deʼit, maibé liuhusi Bíblia mak Maromak fó ninia liafuan mai ita. (2 Pedro 1:21) Iha Bíblia laran ita bele hetan buat sira neʼebé Maromak promete mai ita no nia esplika kona-ba saida mak Maromak nia Ukun sei halo iha futuru. Apóstolu Paulo hatete: “Maromak nia liafuan mak moris no iha kbiit boot.” (Lee Ebreu 4:12.) Oinsá mak Maromak nia Liafuan neʼe moris? Tanba buat hotu neʼebé Maromak promete besik sai loos ona no sira seluk mós nia sei kumpre hotu. (Isaías [Yesaya] 46:10; 55:11) Bainhira ema komprende katak Bíblia mak livru ida hanesan neʼe duni, buat sira neʼebé sira lee husi Bíblia mós bele ajuda sira hodi halo mudansa ba sira-nia moris.

7. Oinsá mak ita bele “uza ho didiʼak liafuan lia-loos nian”?

⁷ Jeová fó mai ita ninia liafuan neʼebé moris, neʼe mak Bíblia. Liuhusi Bíblia ita bele ajuda ema hodi fiar katak ita-nia mensajen mai husi Maromak. Tan neʼe mak bainhira apóstolu Paulo fó hela treinu ba Timóteo, nia hatete ba nia: “Uza ho didiʼak liafuan lia-loos nian.” (2 Timóteo 2:15) Oinsá mak ita bele halo tuir liafuan neʼe? Bainhira atu lee eskritura ida ba ema, hili didiʼak eskritura ida, depois mak lee. Ita-nia hakarak mak eskritura neʼe bele kona ema nia laran. Tratu sira neʼebé ita simu iha reuniaun boot iha fulan-Janeiru tinan 2014 bele ajuda ita iha dalan hanesan neʼe.

8. Katuas haklaken nian ida hatete saida kona-ba tratu sira?

⁸ Se ita mak foti tratu foun neʼe ida hodi aprende oinsá atu uza tratu neʼe, ita mós sei hatene oinsá atu uza sira seluk. Tanba tratu sira-neʼe hakerek iha dalan neʼebé hanesan deʼit. Katuas haklaken nian ida husi rai-Hawai, Estadus Unidus, hatete: “Afinál tratu  sira-neʼe kapás tebes bainhira uza ba haklaken husi uma ba uma ka haklaken iha fatin públiku nian.” Tansá nia koʼalia hanesan neʼe? Tanba iha tratu sira-nia oin iha ona resposta sira ba pergunta neʼebé uma-naʼin bele hili. Hodi nuneʼe, uma-naʼin la sente taʼuk ka moe atu fó resposta ba pergunta neʼebé ita husu ba sira. Irmaun neʼe hatete tanba dalan hakerek iha tratu neʼe, ida-neʼe halo ema barak tan gosta atu koʼalia ho ita.

9, 10. (a) Oinsá mak dalan hakerek iha tratu sira ajuda ita hodi uza Bíblia? (b) Tratu sira ida neʼebé mak imi gosta liu atu uza, tanbasá?

⁹ Tratu ida-idak iha eskritura ida neʼebé hili ho diʼak tiha ona hodi bele lee ba uma-naʼin. Porezemplu, haree tratu Terus hotu iha rohan ka lae? Husu pergunta iha tratu nia oin. Uma-naʼin bele hili resposta ida iha tratu neʼe, “Sin”, “Lae”, ka “Karik”. Kualkér resposta saida deʼit mak nia hili, loke tratu neʼe, depois dehan: “Haree toʼok eskritura neʼe hatete saida.” Depois lee Apokalipse 21:3, 4.

¹⁰ Hanesan neʼe mós se imi uza tratu Ita fiar katak Bíblia husi Maromak ka lae?, resposta saida mak uma-naʼin hili mós la iha buat ida. Loke deʼit ba tratu nia laran no hatete: “Bíblia hatete katak ‘Maromak mak leno Eskritura hotu.’” Imi mós bele koʼalia tan: “Tuir loloos, eskritura neʼe seidauk hotu.” Depois loke imi-nia Bíblia, no lee eskritura tomak husi 2 Timóteo 3:16, 17.

11, 12. (a) Iha dalan saida mak imi bele uza tratu sira hodi imi-nia haklaken la sai maten liu? (b) Oinsá mak imi bele uza tratu sira hodi prepara ba vizita fali?

¹¹ Konforme ba uma-naʼin, imi mós bele koʼalia naruk uitoan kona-ba tratu neʼe se imi hakarak. Atu uma-naʼin koʼalia tan ka lae, buat diʼak ida mak uma-naʼin rona tiha ona mensajen husi tratu neʼe, no mós imi lee tiha ona eskritura ida ba sira. Karik foufoun imi iha oportunidade hodi bele lee eskritura ida ka rua deʼit ba sira, maibé loron seluk imi bele bá vizita fali sira hodi koʼalia tan.

¹² Iha tratu ida-idak nia kotuk iha subtítulu ida naran “Hanoin toʼok.” Iha neʼe iha pergunta ida ho eskritura balu neʼebé bele uza ba vizita fali. Tratu ho títulu Ita hanoin saida kona-ba futuru? iha pergunta ida, neʼe mak: “Oinsá mak Maromak sei hadiʼa situasaun aat iha mundu?” Iha pergunta nia okos iha Mateus 6:9, 10 no Daniel 2:44. Tratu ho títulu Ema neʼebé mate ona bele moris filafali ka lae? iha mós pergunta ida, neʼe mak: “Tansá mak ita sai ferik-katuas no mate?” Iha pergunta nia okos mós iha eskritura Gênesis (Kejadian) 3:17-19 no Roma 5:12.

13. Esplika toʼok oinsá mak bele uza tratu sira hodi hahú estuda Bíblia ho ema.

 ¹³ Dalan hodi hakerek tratu sira ajuda ita atu hahú estuda Bíblia ho ema. Iha tratu nia kotuk, ema bele scan kode (QR a) hodi lori nia ba ita-nia sítiu. Iha neʼebá nia bele hetan konvite ida hodi estuda. Tratu neʼe mós haruka nia haree ba broxura ida ho títulu Liafuan Diʼak Husi Maromak. Tratu ida-idak lori ita loke ba lisaun iha broxura neʼe tuir tratu nia tópiku. Porezemplu, tratu ho títulu Sé mak ukun mundu neʼe? lori ba lisaun 5 iha broxura neʼe. Tratu ho títulu Oinsá mak moris família nian bele sai kontente liu? lori ba lisaun 9 iha broxura neʼe. Tratu sira halo iha dalan hanesan neʼe hodi ajuda ita oinsá atu uza Bíblia bainhira ita foin hasoru ema ka vizita fali sira. Ita sei hahú estuda ho ema barak liután se ita uza dalan ida-neʼe. Saida tan mak imi bele halo hodi uza Maromak nia Liafuan didiʼak bainhira haklaken ba ema?

14, 15. Oinsá mak imi bele halo tuir Paulo nia ezemplu iha imi-nia serbisu haklaken nian?

¹⁴ Apóstolu Paulo hakarak tebes atu hatene “ema barak liu” hanoin saida iha sira-nia neon bainhira nia haklaken ba sira. (Lee 1 Korinto 9:19-23.) Paulo iha objetivu saida? Nia hakarak atu bele ajuda “ema oioin”, diʼak ema Judeu ka ema naran deʼit, bele aprende kona-ba lia-loos hodi sira mós iha oportunidade atu hetan salvasaun. (Apóstolu 20:21) Oinsá mak ita bele halo tuir Paulo nia ezemplu hodi prepara no haklaken ba “ema oioin”?—1 Timóteo 2:3, 4.

¹⁵ Fulan-fulan ita bele hetan sujestaun oioin iha Ita-nia Serbisu Kristaun kona-ba oinsá atu haklaken ba ema. Koko hodi uza sujestaun sira-neʼe. Diʼak mós prepara uluk tópiku seluk hodi koʼalia ho ema se sira hanoin hela buat neʼebé la hanesan ho sujestaun sira iha Ita-nia Serbisu Kristaun. Hanoin toʼok ema iha imi-nia hela-fatin liuliu hanoin kona-ba saida. Depois buka atu uza eskritura ida neʼebé kona tópiku neʼe. Katuas área nian ida ho ninia feen konta oinsá mak sira bele uza Bíblia beibeik iha sira-nia serbisu haklaken nian hodi dehan: “Bainhira ami fó kumprimentu ba ema, ami mós loke hela Bíblia iha ami-nia liman, depois ami lee eskritura ida. Baibain uma-naʼin husik ami lee eskritura ida ho sira se ami tama kedas ba ami-nia objetivu.” Iha parágrafu hirak tuirmai sei koʼalia kona-ba tópiku ka pergunta, no eskritura balu neʼebé diʼak atu uza ba haklaken. Karik imi bele koko hodi uza balu iha imi-nia serbisu haklaken.

16. Esplika toʼok oinsá mak atu bele uza Isaías (Yesaya) 14:7 bainhira haklaken ba ema.

¹⁶ Se imi hela iha fatin neʼebé sempre iha problema hanesan krime ka ema halo violénsia beibeik, imi bele husu pergunta neʼe ba ema: “Hanoin toʼok se loron ida Ita-Boot haree liafuan sira-neʼe mosu iha jornál: ‘Mundu tomak agora hakmatek, la iha tan buat ida atu halo aat nia. Ema haklalak ho kontente.’ Ita sente oinsá? Ida-neʼe mak Bíblia hatete iha Isaías (Yesaya) 14:7. Tuir loloos, Bíblia mós koʼalia dala barak kona-ba tempu dame nian neʼebé Maromak promete ba futuru.” Tuirmai husu hodi lee tan eskritura kona-ba promesa sira-neʼe.

17. Oinsá mak ita bele uza Mateus 5:3 bainhira koʼalia ho ema?

¹⁷ Iha imi-nia área, fasil ka lae ba mane ida atu hetan serbisu hodi tau matan ba ninia família? Se la fasil, karik imi bele hahú hodi husu hanesan neʼe: “Atu halo família ida kontente, mane ida tenke manán osan hira?” Bainhira ema neʼe hatán tiha ba imi-nia pergunta, imi bele koʼalia fali: “Iha mane barak neʼebé manán osan barak husi serbisu, maibé sira-nia família la kontente nafatin. Entaun, sira sei falta saida tan?” Depois lee Mateus 5:3 no husu hodi estuda Bíblia ho ema neʼe.

18. Oinsá mak imi bele uza Jeremias (Yeremia) 29:11 hodi fó kmaan ba ema?

 ¹⁸ Dezastre ruma foin akontese iha imi-nia área neʼebé lori susar ba ema-nia moris ka lae? Se nuneʼe, imi bele hahú koʼalia hanesan neʼe ba ema: “Haʼu mai atu fahe liafuan kmaan ruma. (Lee Jeremias [Yeremia] 29:11. b) Ita-Boot nota ka lae buat tolu neʼebé Maromak hakarak fó mai ita iha eskritura neʼe? ‘Dame’, ‘futuru,’ no ‘esperansa.’ Hatene katak Maromak hakarak ita iha moris neʼebé diʼak halo ita sente kontente. Maibé oinsá mak ita bele iha moris neʼebé diʼak?” Depois loke ba lisaun kona-ba tópiku neʼe iha broxura Liafuan Diʼak nian.

19. Esplika toʼok oinsá atu uza Apokalipse 14:6, 7 bainhira koʼalia ho ema neʼebé iha ona relijiaun.

¹⁹ Iha imi-nia área ema hotu iha relijiaun ka lae? Se iha ona, karik imi bele hahú koʼalia hodi husu: “Se anju ida mak koʼalia ho Ita-Boot, Ita-Boot hakarak rona saida mak nia koʼalia ka lae? (Lee Apokalipse 14:6, 7.) Anju neʼe hatete: ‘Hamtaʼuk Maromak,’ entaun nia koʼalia kona-ba Maromak ida neʼebé? Anju hatete: ‘Ida neʼebé halo lalehan no rai’. Nia neʼe sé?” Depois lee eskritura Salmo (Mazmur) 124:8, neʼebé hatete: “Ita-nia ajuda mak iha Jeová nia naran, Kriadór lalehan no rai nian.” Hotu tiha, husu hodi esplika liután kona-ba Maromak Jeová ba nia.

20. (a) Oinsá mak ita bele uza Provérbios (Amsal) 30:4 hodi hanorin ema kona-ba Maromak nia naran? (b) Eskritura diʼak saida mak imi rasik uza bainhira haklaken ba ema?

²⁰ Karik imi bele hahú koʼalia ho joven ida hodi dehan: “Haʼu hakarak atu lee eskritura ida no iha eskritura neʼe iha pergunta importante ida. (Lee Provérbios [Amsal] 30:4. c) Tanba ema la bele halo buat sira-neʼe, entaun eskritura neʼe koʼalia kona-ba ita-nia Kriadór, laʼós ema seluk. d (Haree nota iha kraik.) Oinsá mak ita bele buka-hatene nia naran saida? Haʼu kontente atu hatudu ba Ita-Boot husi Bíblia kona-ba neʼe.”

21, 22. (a) Tanbasá eskritura ida neʼebé ita hili didiʼak bele troka ema ida nia moris? (b) Imi-nia hakarak mak atu halo saida iha imi-nia serbisu haklaken nian?

²¹ Se ita uza eskritura ida neʼebé ita hili didiʼak tiha ona hodi lee ba ema, ita la hatene dala ruma eskritura neʼe bele kona loos sira-nia laran. Porezemplu, irmaun naʼin-rua iha Austrália haklaken ba feto ida. Irmaun ida husu ba nia: “Ita hatene Maromak nia naran ka lae?” depois nia lee Salmo (Mazmur) 83:18. Feto neʼe hatete: “Haʼu hakfodak toʼo sala uitoan haʼu atu monu ba rai! Bainhira sira bá tiha, haʼu lori kedas karreta hodi laʼo toʼo kilómetru 56 hanesan neʼe, atu bá loja livru nian ida hodi buka-hatene tradusaun husi Bíblia sira seluk no disionáriu sira hodi haree toʼok naran neʼe iha duni ka lae. Haʼu haree afinál Maromak iha naran duni no depois haʼu koʼalia ba an, ‘Karik iha buat barak tan mak haʼu la hatene.’” Lakleur, nia ho ninia laʼen mós komesa estuda Bíblia, no ikusmai sira naʼin-rua mós hetan batizmu.

²² Maromak nia Liafuan iha duni kbiit atu troka ema nia moris. Se ema ida lee Bíblia, ninia fiar ba buat sira neʼebé Maromak promete bele sai metin liután. Fiar neʼe mós bele ajuda nia troka ninia moris. (Lee 1 Tesalónika 2:13.) Bíblia nia liafuan ka mensajen sira iha forsa liu fali ita-nia liafuan sira. Tan neʼe mak bainhira haklaken ba ema, ita-nia hakarak mak atu bele uza beibeik Maromak nia Liafuan. Tanba Bíblia mak moris!