Skip to content

Skip to table of contents

 LISAUN 9

Oinsá mak Ita-nia moris família nian bele kontente?

Oinsá mak Ita-nia moris família nian bele kontente?

1. Tanbasá mak importante atu kaben tuir lei hodi família bele moris kontente?

Jeová mak Maromak neʼebé kontente, liafuan diʼak hotu mai husi nia. Nia mós hakarak família sira atu moris kontente. (1 Timóteo 1:11) Maromak mak hahú arranju kaben nian. Importante ba feen-laʼen atu kaben tuir lei tanba ida-neʼe ajuda sira no mós sira-nia oan atu sente seguru. Ema Kristaun sira mós presiza halo tuir lei estadu nian kona-ba kaben.​—Lee Lucas 2:1, 4, 5.

Saida mak Maromak nia hakarak kona-ba moris kaben nian? Nia hakarak mane ida no feto ida atu moris hamutuk nuʼudar kaben-naʼin no laran-metin ba malu. (Ebreu 13:4) Nia odi soe-malu. (Malaquias 2:16) Maibé se ema Kristaun ida nia feen ka laʼen halo sala seksuál, Maromak husik nia atu soe malu no kaben fali ho ema seluk.​—Lee Mateus 19:3-6, 9.

2. Feen-laʼen tenke hatudu hahalok saida?

Jeová kria mane no feto atu apoia malu iha sira-nia moris kaben nian. (Génesis 2:18) Nuʼudar família nia ulun, laʼen iha responsabilidade atu fó buat neʼebé família presiza, no hanorin ninia família kona-ba Maromak. Laʼen tenke hadomi ninia feen no hanoin ulukliu ninia feen nia diʼak. Feen-laʼen sira tenke hatudu domin no respeitu ba malu. Maibé tanba ema hotu sala-naʼin, importante ba feen-laʼen sira atu perdua malu hodi sira-nia moris kaben nian bele kontente nafatin.​—Lee Éfeso 4:31, 32; 5:22-25, 33; 1 Pedro 3:7.

3. Se Ita la kontente ho moris kaben nian, Ita bele haketak malu ho Ita-nia kaben ka lae?

Se Ita hasoru susar iha Ita-nia moris kaben nian, Ita ho Ita-nia kaben presiza hakaʼas an atu hatudu domin ba malu. (1 Korinto 13:4, 5) Maromak nia Liafuan la fó sai katak  haketak malu mak dalan diʼak atu rezolve problema neʼebé baibain kaben-naʼin sira hasoru.​—Lee 1 Korinto 7:10-13.

4. Saida mak Maromak nia hakarak ba oan sira?

Jeová hakarak oan sira atu moris kontente. Nia fó matadalan neʼebé diʼak ba oan sira kona-ba oinsá atu moris kontente iha tempu joven. Nia hakarak oan sira atu aprende husi inan-aman nia esperiénsia no matenek. (Koloso 3:20) Jeová, ita-nia Kriadór, mós hakarak oan sira atu sente haksolok hodi halo tuir nia no ninia Oan-Mane.​—Lee Eclesiastes 11:9–12:1; Mateus 19:13-15; 21:15, 16.

5. Oinsá mak inan-aman bele ajuda oan sira moris kontente?

Inan-aman presiza hakaʼas an atu tau matan ba oan sira-nia presiza, hanesan ai-han, hela-fatin no roupa. (1 Timóteo 5:8) Maibé atu oan sira bele moris kontente, inan-aman mós presiza hanorin oan sira atu hadomi Maromak no aprende husi nia. (Éfeso 6:4) Se inan-aman hatudu katak sira hadomi Maromak, neʼe bele book oan sira-nia laran. Kuandu inan-aman hanorin oan sira husi Maromak nia Liafuan, neʼe sei treinu oan sira atu iha hanoin neʼebé loos.​—Lee Deuteronómio 6:4-7; Provérbios 22:6.

Kuandu inan-aman gaba no fó laran-manas ba oan sira, neʼe sei halo sira kontente. Sira mós presiza inan-aman atu korrije no fó dixiplina. Treinu hanesan neʼe sei proteje oan husi hahalok neʼebé ikusmai bele lori susar ba sira-nia an. (Provérbios 22:15) Maski nuneʼe, inan-aman labele fó dixiplina makaʼas liu ka siʼak demais oan sira.​—Lee Koloso 3:21.

Testemuña ba Jeová iha livru balu neʼebé bele ajuda inan-aman no oan sira. Matadalan husi livru sira-neʼe mai husi Bíblia.​—Lee Salmo 19:7, 11.