Bainhira Jeová kria ita, nia fó prezente furak ida mai ita. Neʼe mak abilidade atu koʼalia. Jeová interese ka lae kona-ba dalan neʼebé ita uza prezente neʼe? Sin, nia interese duni! (Lee Tiago 1:26.) Entaun oinsá mak ita bele uza ita-nia abilidade atu koʼalia iha dalan neʼebé halo Jeová kontente?

1. Oinsá mak ita bele uza prezente husi Jeová iha dalan neʼebé diʼak?

Bíblia haruka ita atu “fó aten-brani ba malu no hametin malu”. (1 Tesalónika 5:11) Ita bele hanoin kona-ba ema neʼebé presiza hetan anima ka lae? Ita bele halo saida atu halo sira sente diʼak? Hatete ba sira katak Ita hanoin sira. Karik ita bele koʼalia kona-ba ninia hahalok diʼak neʼebé ita hafolin. Ita bele hanoin eskritura neʼebé bele anima ema ruma neʼebé Ita koñese? Iha eskritura barak neʼebé Ita bele hili. Hanoin-hetan, dalan neʼebé ita koʼalia mós bele anima ema seluk. Tan neʼe sempre koʼalia ho laran-diʼak no laran-maus.​—Provérbios 15:1.

2. Ita labele koʼalia liafuan hanesan saida?

Bíblia hatete: “Keta husik liafuan aat sai husi imi-nia ibun.” (Lee Éfeso 4:29.) Neʼe katak ita la uza liafuan tolok, liafuan kroʼat, soe piadas ka koʼalia buat ruma atu hakanek ema seluk nia laran. Ita mós labele konta ema nia vida ka hafoʼer ema seluk nia naran.​—Lee Provérbios 16:28.

3. Oinsá mak Ita bele koʼalia iha dalan neʼebé anima ema seluk?

Baibain ita koʼalia kona-ba buat neʼebé iha ita-nia neon ka laran. (Lucas 6:45) Tan neʼe, ita presiza treinu ita-nia an atu fokus ba buat neʼebé pozitivu, hanesan ‘buat neʼebé loos, buat neʼebé moos, buat neʼebé haburas domin, buat neʼebé merese hahiʼi’. (Filipe 4:8) Atu bele fokus ba buat sira-neʼe, ita presiza hili ho didiʼak ita-nia kolega no buat neʼebé ita halo iha tempu halimar. (Provérbios 13:20) Diʼak mós atu hanoin uluklai antes koʼalia. Hanoin didiʼak oinsá mak Ita-nia liafuan bele fó impaktu ba ema seluk. Bíblia hatete: “Liafuan neʼebé koʼalia sai hodi la hanoin uluk mak hanesan sona ho surik, maibé ema matenek nia nanál mak bele kura.”​—Provérbios 12:18.

 KEʼE KLEʼAN

4. Kontrola Ita-nia liafuan

Ita hotu dala ruma koʼalia buat neʼebé ikusmai ita arrepende. (Tiago 3:2) Lee Galásia 5:22, 23, depois koʼalia hamutuk kona-ba pergunta tuirmai:

• Ita hakarak husu Jeová atu ajuda Ita haburas hahalok saida hodi bele kontrola Ita-nia liafuan? Oinsá mak hahalok sira-neʼe bele ajuda Ita?

Lee 1 Korinto 15:33, depois koʼalia hamutuk kona-ba pergunta tuirmai:

• Oinsá mak kolega no diversaun neʼebé Ita hili bele fó impaktu ba dalan neʼebé Ita koʼalia?

Lee Eclesiastes 3:1, 7, depois koʼalia hamutuk kona-ba pergunta tuirmai:

• Bainhira mak tempu neʼebé diʼak atu nonook ka hein ba tempu seluk atu koʼalia?

 5. Koʼalia buat pozitivu kona-ba ema seluk

6. Hatudu laran-diʼak bainhira koʼalia ho Ita-nia família

 PONTU IMPORTANTE

Liafuan iha kbiit. Ita presiza hanoin didiʼak kona-ba saida mak ita koʼalia, bainhira mak ita koʼalia, no oinsá mak ita koʼalia.

Rezumu

• Iha dalan saida deʼit mak Ita bele uza Ita-nia liafuan atu ajuda ema seluk?

• Ita labele koʼalia liafuan hanesan saida?

• Saida mak bele ajuda ita atu sempre koʼalia ho laran-diʼak no anima ema seluk?