Skip to content

Kursu Bíblia hanesan saida mak Testemuña ba Jeová oferese?

Kursu Bíblia hanesan saida mak Testemuña ba Jeová oferese?

 Kursu Bíblia neʼe halaʼo oinsá?

 Testemuña ida sei ajuda Ita atu aprende Bíblia tuir tópiku ida-idak. Hodi uza livru Moris Haksolok ba Nafatin, Ita sei hatene saida mak Bíblia hanorin no oinsá mak ida-neʼe bele ajuda Ita. Atu hatene liután, haree vídeo neʼe.

 Haʼu presiza selu ka lae?

 La presiza. Testemuña ba Jeová halo tuir mandamentu neʼebé Jesus fó ba ninia dixípulu sira, dehan: “Imi simu hodi la selu, tan neʼe fó mós hodi la hein atu ema selu imi.” (Mateus 10:8) Ita mós bele hetan matéria ba kursu Bíblia ho gratuitu, neʼe inklui Bíblia no livru Moris Haksolok ba Nafatin.

 Kursu neʼe kleur oinsá?

 Kursu kompletu fahe ba lisaun 60. Ita bele deside atu halaʼo kursu neʼe lalais ka kleur, maibé ema barak gosta estuda lisaun ida ka liu iha semana ida nia laran.

 Oinsá mak haʼu bele komesa kursu neʼe?

  1.  1. Prenxe formuláriu online. Ami sei uza deʼit informasaun neʼebé Ita hatama atu ema ida husi Testemuña ba Jeová bele kontaktu Ita tuir buat neʼebé Ita husu.

  2.  2. Testemuña ba Jeová ida sei kontaktu Ita. Nia sei esplika oinsá atu halaʼo kursu Bíblia neʼe no hatán ba pergunta sira neʼebé Ita husu.

  3.  3. Deside oinsá no bainhira mak Ita hakarak estuda. Ita bele hili atu testemuña ida ba vizita ita, ka estuda liuhusi telefone, konferénsia vídeo, ka hakerek karta ba malu. Baibain kursu neʼe halaʼo ba oras ida, maibé Ita bele hili atu estuda lalais deʼit ka kleur liu hodi tuir Ita-nia situasaun.

 Haʼu bele koko estuda ba dala ida deʼit ka lae?

 Bele. Se hakarak hanesan neʼe, Ita bele prenxe formuláriu online. Kuandu Testemuña ida kontaktu Ita, fó-hatene nia katak Ita hakarak deʼit atu koko estuda ba dala ida atu bele hatene se Ita gosta ka lae. Nia sei uza broxura Moris Haksolok ba Nafatin, neʼebé iha lisaun tolu deʼit nuʼudar introdusaun, no Ita bele deside se Ita hakarak kontinua estuda ka lae.

 Se haʼu simu atu estuda Bíblia, ema sei obriga haʼu atu sai Testemuña ba Jeová ka lae?

 Lae. Ami Testemuña ba Jeová kontente atu hanorin ema kona-ba Bíblia, maibé ami la obriga ema atu tuir ami-nia relijiaun. Ami ho respeitu fó sai buat neʼebé Bíblia hatete, no rekoñese katak ema ida-idak iha direitu atu hili rasik sira-nia fiar.—1 Pedro 3:15.

 Haʼu bele uza haʼu-nia Bíblia ka lae?

 Bele, Ita bele uza tradusaun Bíblia naran deʼit tuir Ita-nia hakarak. Ami gosta uza Bíblia Sagrada Tradusaun Mundu Foun, neʼebé tradús ho loloos no fasil atu komprende. Maibé ema barak gosta liu atu uza tradusaun Bíblia neʼebé baibain sira toman ona atu uza.

 Haʼu bele konvida ema seluk atu tuir estuda ka lae?

 Bele. Ita bele konvida Ita-nia kolega ka família tomak.

 Oinsá se uluk haʼu estuda ona Bíblia ho Testemuña ba Jeová, haʼu bele estuda fali ka lae?

 Bele. Karik Ita sei gosta liu kursu Bíblia ida agora, tanba ami hafoun ami-nia programa atu bele ajuda ema tuir situasaun ohin loron. Iha kursu foun neʼe, Ita sei haree dezeñu no vídeo barak, no sei iha diskusaun barak liu fali programa estuda uluk nian.

 Bele ka lae haʼu estuda Bíblia mesak no la presiza ajuda husi ema ruma?

 Sin, bele. Baibain estudante sira aprende diʼak liu kuandu hetan ajuda husi ema ida neʼebé hatene didiʼak Bíblia, maibé ema balu hakarak koko atu estuda mesak. Iha pájina Ajuda atu estuda Bíblia, iha buat oioin neʼebé bele ajuda Ita atu estuda Bíblia. Porezemplu:

  •   Kursu Bíblia online. Iha parte neʼe, Ita bele hetan kursu Bíblia iha língua oioin, porezemplu língua Inglés, Portugés no Xinés. Kursu interativu neʼe sei ajuda Ita atu hetan resposta ba pergunta oioin neʼebé importante, hanesan: Sé mak Maromak? Tanbasá mak terus no buat aat barak akontese? Maromak sei halakon ema nia terus ka lae?

  •   Vídeo sira kona-ba Bíblia. Vídeo badak sira-neʼe esplika hanorin importante oioin husi Bíblia.

  •   Pergunta kona-ba Bíblia. Parte neʼe hatán ba pergunta oioin neʼebé ema barak husu kona-ba Bíblia.

  •   Esplikasaun kona-ba eskritura. Parte neʼe esplika kona-ba signifikadu husi eskritura no fraze sira husi Bíblia neʼebé ema barak hatene.