DIANA pasa 80 yari kaba. En masra ben e kensi. A ben abi a siki Alzheimer èn a ben e tan na wan ati-oso wan tu yari fosi a dede. Den tu boi fu en dede tu èn ensrefi ben kisi kanker na en bobi. Ma te den sma fu Diana gemeente e si en na ini a Kownukondre zaal noso na ini a preikiwroko, den e si taki ala ten a de nanga prisiri.

John du a kringwroko moro leki 43 yari. A ben lobi a wroko disi. Noiti a ben denki taki a ben o du wan tra sani. Ma di wan famiri fu en kon siki, a ben musu tapu nanga a kringwroko fu go sorgu en. Now a e dini leki owruman na ini wan gemeente. Te brada nanga sisa di ben sabi John e si en na den kring konmakandra noso den kongres, den e si taki a no kenki srefisrefi. A de nanga prisiri ete.

San meki taki Diana nanga John de nanga prisiri? Fa wan sma di e sari èn di e siki kan de nanga prisiri? Èn fa wan sma di ben e du wan wroko di a lobi kan de nanga prisiri ete aladi a no e du a wroko moro? Bijbel e gi wi a piki. Psalm 64:10 e taki dati ’den reti-ati sma o breiti noso den o prisiri nanga den sani di Yehovah du gi den’. Wi kan frustan a tekst disi moro bun te wi e luku san e meki taki wan sma de nanga prisiri èn san kan meki taki a no de nanga prisiri.

Sortu sani e meki taki sma de nanga prisiri? Fu eksempre, a e gi prisiri te tu sma di lobi makandra e trow, te wan man nanga en uma e kisi wan pikin noso te wan sma e kisi wan grani na ini na organisâsi. Den sani disi e meki taki sma de nanga prisiri fu di den sani disi na kado di Yehovah e gi wi. Na en seti a trowlibi, na en meki taki man nanga uma kan kisi pikin èn na en e gi wi grani na ini a Kresten gemeente.​—Gen. 2:18, 22; Ps. 127:3; 1 Tim. 3:1.

Ma son leisi a prisiri e tan fu wan pisi ten nomo. A sari taki son trowpatna e waka gi den patna èn wan sma en trowpatna kan dede (Esek. 24:18; Hos. 3:1). Son pikin e trangayesi den papa nanga mama èn son leisi den e puru fu a gemeente fu di den e  trangayesi Gado srefi. Fu eksempre, den boi fu Samuel no ben e gi yesi na Yehovah èn David ben kisi furu problema na ini en osofamiri fu di a ben sondu nanga Batseiba (1 Sam. 8:1-3; 2 Sam. 12:11). Den sortu sani disi no e gi wi prisiri, ma den e meki taki wi e sari.

Na so a de tu taki son leisi wi no man du wan wroko moro di wi kisi na ini na organisâsi, fu di wi kon siki, fu di wi musu sorgu gi wi famiri noso fu di kenki kon na ini na organisâsi. Furu sma di ondrofeni a sani disi e taki dati den e misi a wroko di den ben e du fu di a ben gi den so furu prisiri.

Disi e sori taki son sani e gi wi prisiri fu wan pisi ten nomo. Ma wan sani de di kan gi wi prisiri fu ala ten, awinsi a libi e kon muilek? Wan sani musu fu de, fu di Samuel, David nanga tra futuboi fu Gado ben de nanga prisiri aladi tesi ben miti den.

Yesus ben sabi san a wani taki fu de nanga prisiri trutru. Fosi a kon na grontapu, Bijbel e taki dati ’ala ten a ben breiti, fu di a ben de nanga Yehovah’ (Odo 8:30). Ma di a kon na grontapu, a ben kisi hebi tesi. Toku a ben prisiri fu du a wani fu en Papa (Yoh. 4:34). Fa a ben de gi en den lasti yuru fosi a dede? Bijbel e taki: „Fu di a ben sabi taki prisiri ben e wakti en, meki a ben de klariklari fu dede na a pinapostu” (Hebr. 12:2). Sobun, wi kan leri furu fu Yesus. A ben taki fu tu sani di e meki taki wan sma kan de nanga prisiri.

Wan leisi Yesus ben seni 70 disipel go preiki. Di den drai kon baka, den ben de nanga prisiri fu di den ben du bigi sani. Den puru ogri yeye na sma tapu srefi. Ma Yesus taigi den: „Un no musu prisiri fu di den ogri yeye e du san unu e taki. Na presi fu dati un musu prisiri fu di un nen skrifi na ini hemel” (Luk. 10:1-9, 17, 20). Iya, aladi wi e prisiri te wi kisi wan moi grani fu Yehovah, toku a moro prenspari sani na taki Yehovah feni wi bun. Noiti a o frigiti san den 70 disipel dati du èn dati e gi trutru prisiri.

Wan tra leisi di Yesus ben e taki nanga wan bigi grupu sma, wan Dyu uma taigi en taki a  mama di meki en musu fu de nanga prisiri. Ma Yesus taigi en: „Nôno, koloku fu den sma di e yere a wortu fu Gado èn di e du san a wortu e taki!” (Luk. 11:27, 28) Te den pikin fu wi e du wan bun sani, dan dati e gi wi prisiri. Toku wan sani di e gi moro prisiri srefi na te wi e gi yesi na Yehovah èn te wi abi wan bun matifasi nanga en.

Iya, te wi sabi taki Yehovah feni wi bun, dan dati e gi wi furu prisiri. Aladi a no switi te wi e kisi tesi, toku wi no o lasi wi prisiri. Fu taki en leti, te wi e horidoro te wi e kisi tesi, dan dati e gi wi moro prisiri srefi (Rom. 5:3-5). Boiti dati, Yehovah e gi en yeye na den sma di e frutrow na en tapu èn prisiri na wan fu den fasi di a yeye e meki wi kisi (Gal. 5:22). Dati meki wi kan frustan fu san ede Psalm 64:10 e taki dati ’den reti-ati sma o breiti noso den o prisiri nanga den sani di Yehovah du gi den.’

Now wi kan frustan fu san ede Diana nanga John di kari na a bigin ben de nanga prisiri aladi di den ben de na ini muilek situwâsi. Diana e taki: „Mi go suku kibri na Yehovah neleki fa wan pikin e go kibri na en papa nanga mama.” Fa a du sabi taki Yehovah ben de nanga en? „Mi si taki a gi mi a krakti fu tan preiki doronomo nanga prisiri.” John, di tan du a preikiwroko fayafaya aladi a no ben e du a kringwroko moro, e taki san yepi en. A e taki: „Sensi 1998 di mi kisi a grani fu gi leri na tapu a Dinariskoro, mi ben e studeri Bijbel moro furu leki fosi.” A taki dati en nanga en wefi ben man go doro nanga a diniwroko fu den, fu di ala ten den ben de klariklari fu du iniwan wroko di Yehovah gi den. A e taki moro fara: „Wi breiti taki wi du disi.”

Furu trawan ondrofeni taki a sani di skrifi na ini Psalm 64:10, tru. Luku na eksempre fu wan trowpaar di wroko moro leki 30 yari na Betel na ini Amerkankondre. Den ben yere taki den ben o tron spesrutu pionier. Den e taki: „A no de fu taki dati yu o sari te yu no man du wan sani moro di yu ben lobi.” Ma den e taki tu: „Yu no man tan sari fu ala ten.” Wantewante di den komoto na Betel den bigin preiki nanga a gemeente. A trowpaar disi e taki moro fara: „Wi begi fu spesrutu sani. Di wi si fa Yehovah piki den begi fu wi, dan dati gi wi deki-ati èn a gi wi prisiri tu. Syatu baka di wi doro na ini a gemeente, tra sma bigin pionier tu. Boiti dati wi feni tu Bijbelstudie di ben e go na fesi.”

A tru taki a no makelek fu de nanga prisiri ala ten. Son leisi wi o firi sari. Ma Yehovah e trowstu wi nanga den wortu fu Psalm 64:10. Srefi te wi brokosaka, wi kan de seiker taki efu wi e tan du a wani fu Yehovah, wi o de nanga prisiri, awinsi sortu tesi wi kisi. Boiti dati, wi e wakti a ten te „nyun hemel nanga wan nyun grontapu” o de. Na a ten dati nowan sma o abi sondu moro. A pipel fu Gado o ’breiti srefisrefi èn den o prisiri fu têgo’ nanga den sani di a o meki.​—Yes. 65:17, 18.

Prakseri fa a ten dati o de: Wi o de gosontu èn ibri dei wi o wiki nanga furu krakti. Awinsi sortu sari sani wi ben miti na ini a ten disi, den sani dati no o kon na ini wi prakseri moro. Wi de seiker taki wi „no o memre den fositen sani moro èn den sani dati no o abi krakti na [wi] tapu moro”. Wi o gi den lobiwan fu wi di kisi wan opobaka, wan switikon. Milyunmilyun sma o „prisiri srefisrefi” neleki a papa nanga mama fu a meisje fu 12 yari di Yesus ben gi wan opobaka (Mark. 5:42). Na a ten dati ala ’reti-ati sma o breiti noso den o prisiri nanga den sani di Yehovah du gi den’.