Ondrofenitori

Mi kisi deki-ati fu a bradafasi fu wi na heri grontapu

SOLEKI FA THOMSON KANGALE FRUTERI

Tapu 24 april 1993 mi ben kisi a kari fu go na a inwijding fu wan nyun bijkantoro na ini a foto Lusaka, na Sambia. A bijkantoro disi ben abi 13 gebow. Fu di mi no ben man waka bun, meki wan Kresten sisa di ben e sori den fisitiman a presi, aksi mi na wan switi fasi: „Mi musu tyari wan sturu gi yu so taki yu kan rostu te yu weri?” Mi blaka èn a sisa weti, ma a no ben abi trobi nanga dati. A sani disi di a sisa ben du, ben naki mi ati sote taki mi taigi en tangi, fu di a switifasi fu en meki taki mi ben man si ala den gebow fu a bijkantoro.

NA INI den yari di pasa, den sortu sani disi di mi ondrofeni waran mi ati. Den tranga na overtoigi fu mi taki a Kresten libimakandra fu Yehovah Kotoigi abi a lobi di Krestes ben taki dati den tru bakaman fu en ben o sori (Yohanes 13:35; 1 Petrus 2:17). Meki mi fruteri unu fa mi kon miti nanga den Kresten disi na ini 1931, a yari di den meki ala sma kon sabi taki den teki a nen Yehovah Kotoigi, wan nen di komoto fu Bijbel.—Yesaya 43:12.

A bigin fu mi preikiwroko na ini Afrika

Na ini november 1931, mi ben abi 22 yari èn mi ben e libi na ini Kitwe, wan foto na ini a kontren fu Noord-Rodesia (now Sambia) pe den ben abi kopro mijn. Wan mati di mi ben e prei futubal nanga en, meki mi kon sabi den Kotoigi. Mi ben go na wan tu fu den konmakandra fu den, èn mi ben skrifi wan brifi go na a bijkantoro na ini Kaapstad, Zuid-Afrika, fu aksi den a  bijbelstudie buku De Harp Gods. * A buku ben skrifi na ini Ingrisitongo, èn mi no ben man frustan en so krin, bika mi no ben sabi a tongo dati bun.

A kontren fu den kopro mijn, ben de sowan 240 kilometer zuid-westsei fu a Bangweulumeer, krosibei fu a presi pe mi gro kon bigi. Furu sma fu tra kontren fu a kondre ben kon drape fu wroko na ini den kopro mijn. Wan tu grupu fu Kotoigi ben kon makandra drape doronomo fu hori bijbelstudie. Baka wan pisi ten, mi froisi fu Kitwe go na a foto Ndola di ben de krosibei, èn mi bigin kon makandra nanga wan grupu Kotoigi fu a kontren dati. Na a ten dati, mi ben de kapten fu wan futubal grupu di ben nen Prince of Wales. Boiti dati, mi ben wroko leki wan futuboi gi wan weti basi fu na African Lakes Corporation, wan bisnis presi di ben abi wan lo wenkri na ini Centraal Afrika.

Mi no ben kisi furu skoroleri èn mi kon leri pikinso Ingrisitongo fu den sma fu Europa di mi ben e wroko gi den. Ma mi ben wani kisi moro skoroleri, èn fu dati ede mi ben gi mi nen fu go na wan skoro na ini a foto Plumtree, na Zuid-Rodesia (now Simbabwe). Ma na a srefi ten mi ben skrifi ete wan brifi go na a bijkantoro na ini Kaapstad. Mi fruteri den taki mi ben kisi a buku De Harp Gods èn taki mi ben wani du furuten diniwroko gi Yehovah.

Mi ben fruwondru srefisrefi taki den seni mi wan brifi baka, di ben taki: „Wi e prèise yu taki yu wani dini Yehovah. Wi wani gi yu a deki-ati fu taki nanga Yehovah fu a tori disi na ini begi èn a sa yepi yu fu kon frustan a waarheid moro bun, èn a sa feni wan presi gi yu fu dini en.” Baka di mi leisi a brifi wan tu leisi, dan mi aksi wan tu Kotoigi san mi ben musu du. Den taigi mi: „Efu yu wani dini Yehovah trutru, dan yu musu du dati èn yu musu bigin wantewante.”

Wan heri wiki langa mi ben e begi fu a tori. Te fu kaba, mi teki a bosroiti fu libi a skoroleri di mi ben wani teki èn fu go doro nanga a bijbelstudie di mi ben kisi fu den Kotoigi. A yari baka dati, na ini yanuari 1932, mi teki dopu na ini watra fu sori taki mi gi misrefi abra na Yehovah Gado. Baka di mi froisi fu Ndola go na a foto Luanshya di ben de krosibei, dan mi miti Jeanette, wan Kotoigi, èn wi trow na ini september 1934. Di wi trow, Jeanette ben abi wan manpikin nanga wan umapikin kaba.

Safrisafri, mi ben e go na fesi na yeye fasi, èn na ini 1937, mi go na ini a furuten diniwroko. Wan syatu pisi ten baka dati, mi ben kisi a wroko fu dini leki kringopziener. Den kringopziener na brada di e go fu a wan gemeente fu Yehovah Kotoigi go na wan trawan fu tranga den na yeye fasi.

Fa a preikiwroko ben de na ini a bigin

Na ini yanuari 1938, mi ben musu go na wan Afrikan granman di nen Sokontwe. A man dati ben aksi efu Yehovah Kotoigi ben kan kon na en. Mi rei dri dei langa tapu  wan baisigri fu man doro a kontren pe a ben e libi. Di mi fruteri en taki mi ben de drape fu di a ben aksi fu dati na ini a brifi di a ben seni go na a kantoro fu wi na ini Kaapstad, dan a ben warderi dati trutru.

Mi ben waka go fu a wan kampu go na a tra kampu na ini a dorpu fu en, èn mi ben gi den sma drape wan kari fu kon na a insaka (a kampu pe den e hori konmakandra). Di den ben kon makandra, dan mi taki nanga na ipi sma. Leki bakapisi fu dati, furu sma ben teki wan bijbelstudie. A granman fu a dorpu, èn sosrefi a yepiman fu en, ben de den fosiwan di tron opziener fu den gemeente drape. Now, sowan 50 gemeente de na ini a kontren dati, di sma sabi now leki a Samfya distrikt.

Fu 1942 te go miti 1947, mi du diniwroko na ini a kontren lontu a Bangweulumeer. Mi ben tan tin dei nanga ibri gemeente. Fu di furu wrokoman no ben de fu teki prati na a kotiwroko na yeye fasi na ini a ten dati, meki wi ben e firi neleki wi Masra, Yesus Krestes, di ben taki: „Iya, a kotiwroko bigi, ma furu wrokoman no de. Fu dati ede, begi a Masra fu a kotiwroko fu seni wrokoman go na ini a kotiwroko fu en” (Mateyus 9:36-38). Na ini den fosi yari dati, a no ben makriki fu go fu a wan presi go na wan trawan. Fu dati ede, Jeanette furu tron ben tan na ini Luanshya nanga den pikin te mi ben e go na den gemeente. Na a ten dati, mi nanga Jeanette ben abi ete tu pikin, ma wan fu den dede di a ben abi tin mun.

Furu wagi no ben de na ini a ten dati. Sobun, furu pasi no ben de tu. Wan dei, mi rei sowan 200 kilometer tapu a baisigri fu Jeanette. Son leisi te mi ben musu koti wan pikin liba abra, dan mi ben poti a baisigri na tapu mi skowru. Mi ben e hori a baisigri nanga a wan anu, dan mi ben e swen abra nanga a trawan. Bun furu sma na ini Luanshya tron Kotoigi, èn na ini 1946, sowan 1850 sma ben de na a Memrefesa fu a dede fu Krestes.

Sma e gens a wroko fu wi

Na ini a pisi ten fu a di fu Tu Grontapufeti, a distrikt komsarsi di ben e tiri kondre afersi na ini Kawambwa seni kari mi wan leisi, èn a taigi mi: „Mi no wani fu yu gebroiki den buku fu a Watch Tower Society moro, bika lanti tapu a wroko fu den now. Ma mi kan gi yu sani di kan yepi yu fu skrifi tra buku fu gebroiki na ini a wroko fu yu.”

„Mi breiti kaba nanga den buku di wi abi now”, mi taki. „Mi no abi nowan tra sani fanowdu.”

„Yu no sabi den Amerkansma”, a taki (na a ten dati den buku fu wi ben meki na ini Amerkankondre). „Den sma dati o kori yu.”

„Nôno, den wan di mi e wroko nanga den, no sa kori mi”, mi piki.

Ne a aksi mi: „Yu no man taigi den gemeente fu yu fu gi wan moni fu horibaka gi a feti, soleki fa tra kerki e du dati?”

„Dati na wan wroko gi den boskopuman fu lanti”, mi taigi en.

„Yu kan go na oso fu denki a tori”, a taki.

„Na Exodus 20:13 nanga 2 Timoteyus 2:24, Bijbel e komanderi wi taki wi no musu kiri sma èn taki wi no musu feti”, mi piki.

Aladi a ben taigi mi taki mi kan gowe, toku wan pisi ten baka dati, a distrikt komsarsi di ben e tiri kondre afersi na ini Fort Rosebery, wan foto di sma e kari Mansa now, seni kari mi. A taigi mi: „Mi meki yu kon dyaso fu taigi yu taki lanti no wani taki yu e prati den buku fu yu moro.”

„Iya. Mi yere fu a tori dati”, mi taki.

„Fu dati ede, yu musu go na ala den gemeente fu yu èn yu musu taigi den sma fu yu kerki taki den musu tyari ala den buku kon dyaso. Yu e frustan?”

„Dati a no mi wroko”, mi piki. „Dati na a frantwortu fu den boskopuman fu lanti.”

Wan takimakandra di ben abi bun bakapisi

Baka a feti, wi ben e tan go doro nanga a preikiwroko. Wan dei na ini 1947, mi ben kaba dini wan gemeente na ini a dorpu Mwanza, dan mi aksi wan sma pe mi ben kan bai te. A sma taigi mi fu go na a oso fu Masra Nkonde di ben abi wan pikin presi pe sma ben kan bai nyanyan  nanga dringi. Masra Nkonde nanga en wefi ben gi mi wan switikon. Mi aksi Masra Nkonde efu a ben wani leisi a kapitel „Hell, a Place of Rest in Hope” (Hel, wan presi pe sma e rostu nanga wan howpu) na ini a buku „Let God Be True”, aladi mi ben o dringi mi te.

Di mi ben kaba dringi mi te, dan mi aksi en: „We, dan san yu e denki fu hel?” Fu di a ben fruwondru fu san a ben leisi, dan a bigin studeri Bijbel nanga den Kotoigi, èn bakaten a teki dopu makandra nanga en wefi. Aladi a no ben tan wan Kotoigi, a wefi fu en èn sosrefi wan tu fu den pikin fu en de Kotoigi ete. Fu taki en leti, wan umapikin fu en, Pilney, e dini ete na a bijkantoro fu Yehovah Kotoigi na ini Sambia. Èn aladi a mama fu Pilney kon grani srefisrefi, toku a de wan getrow Kotoigi ete.

Wan syatu fisiti na ini Oost-Afrika

A bijkantoro fu wi na ini Noord-Rodesia di ben seti na ini 1948 na ini Lusaka, ben seni mi fu go dini na ini Tanganyika (now Tansania). Mi nanga mi wefi, makandra nanga wan tra Kotoigi, ben e waka nanga futu go na a presi dati na ini wan kontren di lai bergi nanga hei presi. Wi ben musu waka dri dei langa, èn wi ben kon weri srefisrefi. Mi ben syow a bondru nanga buku, mi wefi ben syow den krosi fu wi, èn a tra Kotoigi ben tyari den sani di wi ben e sribi na tapu.

Di wi doro na Mbeya na ini maart 1948, dan furu wroko ben de fu du fu yepi den brada nanga sisa fu tyari kenki kon, so taki den ben o libi moro akruderi den leri fu Bijbel. Wan fu den sani, na taki den sma na ini a kontren dati ben kari wi den Waktitoren-sma. Aladi den brada ben teki a nen Yehovah Kotoigi, toku den no ben e gebroiki en ete na publiki. Boiti dati, son Kotoigi ben musu tapu nanga wan tu gwenti di abi fu du nanga a gi di sma e gi grani na den dedewan. Ma kande a moro muilek sani di furu fu den ben musu du, na fu trow akruderi lantiwet, so taki den ben kan abi wan krin trowlibi.—Hebrewsma 13:4.

Bakaten, mi ben abi a grani fu dini na ini tra kontren na Oost-Afrika, èn wan fu den ben de Uganda. Mi ben tan sowan siksi wiki na ini Entebbe nanga Kampala, pe furu sma ben kisi yepi fu kon sabi Bijbel waarheid.

Mi kisi a kari fu go na New York City

Baka di mi dini wan pisi ten na ini Uganda, dan mi doro na Dar es Salaam na a bigin fu 1956. Dati ben de a mamafoto fu Tanganyika. Drape mi ben kisi wan brifi fu na edekantoro fu Yehovah Kotoigi. A brifi dati ben taki dati mi ben musu bigin sreka sani fu kon na New York, so taki mi ben kan go na wan kongres pe Kotoigi fu heri grontapu ben o kon makandra. A kongres dati ben o hori fu 27 yuli te go miti 3 augustus 1958. A no de fu taki dati mi ben prisiri srefisrefi nanga a kari dati.

Di a ten ben doro fu gowe, dan mi nanga wan tra kringopziener, Luka Mwango, frei nanga opolani fu Ndola go na Salisbury (now Harare), wan foto na ini Zuid-Rodesia. Baka dati wi go na a foto Nairobi, na ini Kenia. Fu drape wi frei nanga opolani go na Londen, Ingrisikondre, pe wi ben kisi wan waran switikon. Di wi go sribi a neti di wi doro na Ingrisikondre, dan wi ben de nanga prisiri srefisrefi èn wi ben e taki nomonomo fa weti sma ben sorgu so bun gi wi aladi wi ben de Afrikansma. A sani disi ben gi wi deki-ati srefisrefi.

 Te fu kaba, wi doro na New York, a foto pe a kongres ben o hori. Tapu wan fu den dei fu a kongres, mi ben e fruteri fa a wroko fu Yehovah Kotoigi ben e waka na ini Noord-Rodesia. Tapu a dei dati, sowan 200.000 sma ben de na Polo Grounds nanga Yankee Stadion na ini New York City. Mi no ben man sribi a neti dati, bika mi ben prakseri a kefalek moi grani di mi ben kisi.

A kongres ben kaba heri esi, èn wi ben drai go baka na oso. Di wi ben de na pasi fu go na oso, dan agen wi ben ondrofeni a lobi nanga a switifasi fu den brada nanga sisa na ini Ingrisikondre. Noiti wi sa frigiti a ten dati di wi ben si a wánfasi fu a pipel fu Yehovah, awinsi fu sortu ras noso kondre den de!

Mi e go doro nanga mi diniwroko èn mi e kisi tesi tu

Na ini 1967, mi ben poti na wroko leki distrikt dinari. Dati na wan brada di e go luku den difrenti grupu fu gemeente na ini a kondre. Na a ten dati, moro leki 35.000 Kotoigi ben de na ini Sambia. Bakaten a gosontu fu mi ben e go na baka, èn fu dati ede mi ben kisi fu dini leki kringopziener baka na ini a kontren fu den kopro mijn. Te fu kaba, Jeanette ben kon siki èn na ini december 1984 a dede getrow na Yehovah.

Baka a dede fu en, mi ben sari trutru di a famiri fu mi wefi di no ben de Kotoigi, ben e taki dati mi kiri mi wefi nanga bonu. Ma sonwan fu den di ben sabi sortu siki Jeanette ben abi èn di ben taki nanga a datra fu en, ben fruteri den famiriman disi san ben pasa trutru. Baka dati mi ben kisi wan tra tesi. Wan tu famiriman ben wani taki mi musu hori misrefi na a gwenti di den e kari ukupyanika. Na a presi pe mi komoto, a gwenti disi wani taki dati te wan trowpatna dede, dan a patna di tan na libi, musu abi seks nanga wan krosibei famiri fu a dedesma. A no de fu taki dati mi weigri fu du dati.

Baka wan pisi ten, den famiriman no ben dwengi mi moro. Mi ben breiti srefisrefi taki Yehovah ben yepi mi fu kakafutu gi a tesi dati. Wan mun baka a beri fu mi wefi, wan brada kon na mi èn a taki: „Brada Kangale, yu ben gi wi deki-ati trutru di yu wefi dede, fu di yu no ben teki prati na nowan fu den takru gwenti. Wi wani taki yu furu tangi fu dati.”

Wan bigi kotiwroko

A de 65 yari kaba sensi di mi bigin nanga mi furuten diniwroko leki wan Kotoigi fu Yehovah. A gi mi prisiri srefisrefi na ini ala den yari dati fu si fa hondrohondro gemeente kon de, èn fa furu Kownukondre zaal ben bow na ini kontren pe mi ben e dini fosi leki kringopziener! Na ini 1943, sowan 2800 Kotoigi ben de, ma now wi abi moro leki 122.000 Kownukondre preikiman na ini Sambia. Iya, a yari di pasa sowan 514.000 sma ben kon na a Memrefesa na ini a kondre disi di abi pikinmoro 11 milyun sma.

Na a srefi ten, Yehovah e sorgu bun gi mi. Te mi musu go na datra, dan wan Kresten brada e tyari mi go na ati-oso. Den gemeente e aksi mi ete fu hori publikitaki na den, èn disi e gi mi na okasi fu ondrofeni furu sani di e gi mi deki-ati. A gemeente pe mi de e seti sani so, taki difrenti Kresten sisa e kon fu krin mi oso, èn brada e kon fu tyari mi fu go na den konmakandra ibri wiki. Mi sabi taki sma noiti no ben o sorgu mi so bun efu mi no ben e dini Yehovah. Mi e taki en tangi taki a e tan gebroiki mi na ini a furuten diniwroko èn taki a gi mi den furu frantwortu di mi ben man tyari teleki now.

Mi no man si bun moro, èn te mi e waka go na a Kownukondre zaal, dan mi abi fu rostu furu leisi te mi de na pasi. A gersi leki a tas fu mi kon moro hebi leki fosi, èn fu dati ede mi e puru den buku di mi no sa abi fanowdu na a konmakandra. A preikiwroko di mi e du na fu hori bijbelstudie nanga den sma di e kon na mi oso. Ma a e gi mi prisiri srefisrefi te mi e prakseri den yari di pasa, èn fa den Kotoigi kon so furu! Den wortu fu Yehovah di skrifi na ini Yesaya 60:22, kon tru na wan kefalek moi fasi na ini a kontren pe mi e dini. Drape e taki: „A pikinwan srefi sa tron wan dusun, èn a pikinwan sa tron wan makti nâsi. Misrefi, Yehovah, sa meki a go moro esi na ini en eigi ten.” Iya, mi si a sani disi pasa trutru, a no ini Sambia wawan, ma sosrefi na heri grontapu. *

[Futuwortu]

[Prenki na tapu bladzijde 24]

Brada Thomson, nanga a bijkantoro fu Sambia na en baka

[Prenki na tapu bladzijde 26]

A bijkantoro fu Sambia now