Internationaal Kongres sa hori na ini 2003

TAPU satra 7 oktober 2001, na alayari konmakandra fu den memre fu a Waktitoren Bijbel nanga Traktaat Genootschap fu Pennsylvania ben hori, na Jersey City, New Jersey, na ini Amerkankondre. Baka a konmakandra dati, dan den memre fu a genootschap, makandra nanga den tra sma di ben kisi wan kari, ben kan nyan bun fu wan tra spesrutu programa. A dei na baka, wan tu tra konmakandra ben hori na ini fo difrenti foto fu Kanada nanga Amerkankondre. Baka di memre fu a Tiri Skin fu Yehovah Kotoigi ben hori den lasti lezing, dan den meki a sani bekènti di e kon now:

„Na a srefi momenti di wi e wakti fu si san a tamara o tyari kon, dan a de tumusi prenspari gi wi alamala leki a pipel fu Gado fu no libi den konmakandra fu wi. Boiti dati, na apostel Paulus ben frumane wi sosrefi fu tan gi makandra deki-ati. A ben taki dati wi musu du disi moro nanga moro, spesrutu te wi e si a bigi èn frede dei fu Yehovah e kon moro krosibei (Hebrewsma 10:24, 25). Akruderi a komando disi di skrifi na ini Bijbel, dan wi abi na prakseri fu hori distrikt kongres na ala sei fu grontapu na ini a yari di e kon [2002]. Èn efu a de a wani fu Yehovah, dan na ini 2003 wi wani hori wan tu spesrutu internationaal kongres na difrenti pisi fu grontapu. Now na a ten fu de na ai èn fu tan poti prakseri finifini na a fasi fa sani e waka na ini grontapu.”

Moro nanga moro bruya e kon na ini grontapu èn moro nanga moro kesekese e opo kon, fu di a disiten seti fu sani e kon na wan kaba. Ma aladi dati de so, toku a wroko di a pipel fu Gado e du musu tan go doro. A bun nyunsu fu a Kownukondre, di abi fu du sosrefi nanga a warskow boskopu fu Bijbel, musu preiki gi sma fu ala kondre, lo, tongo, nanga pipel, èn den musu kisi a kari fu ’frede Gado èn gi en glori, bika dei fu dei a yuru pe a sa tyari krutu e kon moro krosibei’ (Openbaring 14:6, 7). Fu dati ede, efu wi Tata na hemel wani en so èn efu a feni en bun, dan na ini a yari 2003 wi wani seti sani fu hori internationaal kongres na difrenti pisi fu grontapu.

Na a momenti disi wi abi na prakseri fu hori kongres na wan tu foto na ini Noord-Amerika èn syatu baka dati na ini Europa. Pikinso moro lati na ini a yari 2003, wi wani seti sani so taki grupu fu sma fu difrenti kondre kan go na den kongres na ini wan tu foto fu Asia; èn na a kaba fu a yari, wan tu tra grupu sa man go na kongres na ini Afrika, Zuid-Amerika, èn na den kontren fu a Stille Zuidzee. Difrenti bijkantoro sa kisi na okasi fu seni wan spesrutu nomru fu sma go na den difrenti presi disi. Sobun, a no sa de so taki iniwan sma di wani go sa man kisi na okasi fu go. Toku a sa gi furu deki-ati fu man miti wan spesrutu nomru fu sma fu difrenti kondre, na ibriwan fu den presi pe den kongres disi sa hori.

Heri esi den difrenti gemeente fu Yehovah Kotoigi sa yere moro fu den konmakandra disi. Den difrenti bijkantoro sa fruteri den gemeente soifri na sortu foto den kisi a kari fu go, èn o ten a kongres sa de. Fu dati ede wi wani aksi unu, grantangi, fu no skrifi noso bel fu a pisi tori disi nownow.

Den wan di sa kisi na okasi fu go na den kongres te fu kaba, sa de soso Kotoigi di gi densrefi abra na Gado èn di teki dopu. Den musu de sma sosrefi di sa de wan bun eksempre èn di sa sori lobi gi den brada fu a kondre di den o fisiti. Na a tra sei den brada dati, sa abi na moi okasi fu gi den wan di e fisiti den wan switi kon, èn fu sori taki den lobi fu teki sma na oso trutru (Hebrewsma 13:1, 2). Disi sa abi leki bakapisi taki den sa man „gi makandra deki-ati” (Romesma 1:11, 12). Bakaten den bijkantoro di sa kisi a kari fu seni sma go na wán noso moro fu den kongres disi sa fruteri moro fini fa sani seti.

Neleki fa wi gwenti, dan na ini a yari 2003 wi sa seti sani sosrefi fu hori distrikt kongres fu dri dei na ala den difrenti kondre. Te wi sa kon makandra, dan ala sma sa kisi na okasi fu ’arki, fu leri, èn fu kisi deki-ati’ (Deuteronomium 31:12; 1 Korentesma 14:31). Disi sa gi a heri pipel fu Gado na okasi fu „tesi èn si taki Yehovah bun” (Psalm 34:8). Na ala den internationaal kongres, èn sosrefi na furu fu den distrikt kongres, yu sa abi zendeling. A no de fu taki dati a sa moi srefisrefi fu arki den te den sa teki prati na a programa.

Na ini a yari disi [2002], wi sa nyan bun fu den „Fayafaya Kownukondre preikiman” Distrikt Kongres, di e gi wi deki-ati fu gi kotoigi na moro sma. A no de fu taki dati te wi nyan bun fu den kongres dati, dan wi sa angri fu kon sabi san Yehovah abi na prakseri gi wi na ini a yari di e kon. Disi sa yepi wi fu ’tan na ai èn de srekasreka’ na ini den tranga ten disi, di prenspari srefisrefi.—Mateyus 24:42-44.