¿Yu Abi a Firi fu Handri, Neleki Yesus?
¿Yu Abi a Firi fu Handri, Neleki Yesus?
„A ben si wan bigi ipi, ma a ben firi sari nanga den, bika den ben de leki skapu sondro wan skapuman. Èn a ben bigin leri den.”—MARKUS 6:34.
1. Fu san ede wi kan frustan taki sma e sori moi eigifasi?
NA INI a heri historia furu sma ben sori kefalek moi eigifasi. Yu kan frustan fu san ede. Yehovah Gado abi èn e sori lobi, switifasi, lobi fu gi sani, nanga tra eigifasi di wi e warderi srefisrefi. Gado ben kria libisma akruderi a prenki fu En. Fu dati ede wi man frustan fu san ede so furu sma ben sa sori lobi, bun-ati, sari-ati, nanga tra eigifasi di Gado abi, neleki fa moro furu sma e sori taki den abi wan konsensi (Genesis 1:26; Romesma 2:14, 15). Ma yu kan frustan taki son sma e sori den eigifasi disi moro esi leki tra sma.
2. San na wan tu bun sani di sma kan du, èn e denki kande taki den e waka na baka Krestes?
2 Kande yu sabi man nanga uma di nofotron e fisiti noso e yepi den sikisma, e firi sari gi den malengriwan, noso di lobi fu gi den pôtisma wan sani. Prakseri so srefi den sma di e firi sari gi sma èn taki a sari dati e buweigi den fu gebroiki den libi fu wroko na ini gwasiman libimakandra. Noso prakseri so srefi den wan di e wroko na ini internaat gi pikin di no abi papa nanga mama, den wan di e du friwani wroko na ini ati-oso noso di e yepi sma na presi pe sikisma e tan di no man dresi moro, noso sma di e du muiti fu yepi sma di no abi oso, noso den wan di ben musu lowe gowe fu den kondre. Kande wan tu fu den e denki taki den e waka na baka na eksempre fu Yesus, di ben poti na eksempre gi Kresten. Wi e leisi na ini den Evangelie taki Krestes ben dresi den sikisma èn a ben gi den angribere sma nyanyan (Markus 1:34; 8:1-9; Lukas 4:40). A lobi di Yesus ben e sori, nanga a safu firi fu en, nanga a sari di a ben firi gi sma, ben de den fasi fa a ben sori „a denki fu Krestes”, èn Yesus fu en sei ben waka na baka na eksempre fu en Hemel Tata.—1 Korentesma 2:16.
3. San wi musu go ondrosuku efu wi wani abi wan balansi fasi fu denki fu den sani di Yesus ben du?
3 ¿Ma yu si taki furu fu den sma na ini a ten disi di ben lobi a fasi fa Yesus ben lobi sma èn a sari di a ben firi gi sma, ben frigiti wan prenspari pisi fu a denki fu Krestes? Wi kan kisi inzicht fu disi te wi e ondrosuku Markus kapitel 6 finifini. Wi e leisi drape taki sma ben tyari den sikisma kon na Yesus fu a kan betre den. A kontekst e leri wi tu taki di Yesus ben si taki den dusundusun sma di ben kon na en ben kon kisi angri, dan Yesus ben gi den nyanyan nanga yepi fu wan wondru (Markus 6:35-44, 54-56). Fu dresi den sikisma èn fu gi den angribere sma nyanyan ben de kefalek moi fasi fa Yesus ben sori a sari di a ben firi gi den bika a ben lobi den, ¿ma a ben de so, taki den ben de den moro prenspari fasi fa Yesus ben yepi tra sma? Èn fa wi kan waka na baka en volmaakti eksempre fu lobi, fu bun-ati, nanga sari-ati, neleki fa ensrefi ben waka na baka na eksempre fu Yehovah?
Den Firi fu En Ben Pusu En fu Sorgu gi den Sani Di Sma Abi Fanowdu na Yeye Fasi
4. San ben de a situwâsi fu a tori di skrifi na ini Markus 6:30-34?
4 Yesus ben firi sari gi den sma di ben de lontu en, na a fosi presi fu di den ben abi sani fanowdu na yeye fasi. Den sani disi di den ben abi fanowdu ben moro prenspari, moro leki den sani di den ben abi fanowdu na skin fasi. Luku a tori na ini Markus 6:30-34. A sani disi di skrifi dyaso ben feni presi na a syoro fu a Se fu Galilea, pikinmoro na a ten fu a Paskafesa na ini 32 G.T. Den apostel ben prisiri srefisrefi, èn nanga reti tu. Fu di didyonsro den ben kaba wan bigi waka, meki den ben kon na Yesus, èn den ben de fayafaya fu fruteri en den ondrofenitori fu den. Ma wan bigi ipi sma ben kon makandra. A ben de so bigi taki Yesus nanga den apostel fu en no ben man nyan noso rostu. Yesus ben taigi den apostel: „Kon, unu wawan, na wan tiri presi èn rostu pikinso” (Markus 6:31). Di den ben go na ini wan boto, kande krosibei fu Kaperna-um, den ben seiri go abrasei fu a Se fu Galilea go na wan tiri presi. Ma a bigi ipi sma ben lon na sei a syoro èn ben doro fosi a boto. Fa Yesus ben o handri na tapu dati? ¿A ben atibron fu di den ben kon ala di A ben wani de en wawan? ¡Kwetikweti!
5. Fa Yesus ben denki fu den ipi sma di ben kon na en, èn san a ben du tapu dati?
5 Na ati fu Yesus ben naki en di a ben si a situwâsi fu den dusundusun sma disi, so srefi den sikisma di ben wakti fayafaya na en tapu (Mateus 14:14; Markus 6:44). Markus ben skrifi san na a sani di ben wiki a sari-ati fu Yesus èn fa a ben handri na tapu dati: „A ben si wan bigi ipi sma, ma a ben firi sari nanga den, bika den ben de leki skapu sondro wan skapuman. Èn a ben bigin leri den furu sani” (Markus 6:34). Yesus ben si moro leki wan heri ipi sma wawan. A ben si ibriwan sma aparti di ben abi sani fanowdu na yeye fasi. Den ben de leki lasi skapu di no ben abi yepi, di no abi skapuman di musu tyari den go na grun weigron noso fu kibri den. Yesus ben sabi taki den relisi fesiman di no abi firi gi sma, èn di ben musu de skapuman di lobi den skapu, ben wisiwasi a gewoon pipel èn den no ben sorgu gi den sani di a pipel ben abi fanowdu na yeye fasi (Esekièl 34:2-4; Yohanes 7:47-49). Yesus ben o handri wan tra fasi nanga den, fu di a ben o du a moro bun sani gi den. A ben bigin leri den fu a Kownukondre fu Gado.
6, 7. (a) San ben de a moro prenspari sani gi Yesus di a ben sorgu gi den sani di sma abi fanowdu, soleki fa den Evangelie e sori? (b) San ben buweigi Yesus fu preiki èn fu leri sma?
6 Luku den sani di a ben du fosi èn di e sori san ben moro prenspari gi en, soleki fa a de fu si na ini a srefi tori disi di Lukas ben skrifi tu. Lukas, di ben de wan datra èn di ben broko en ede trutru nanga a gosontu fu tra sma na skin fasi, ben skrifi a tori disi. „Den bigi ipi sma . . . ben waka na [Yesus] baka. Èn a ben ontfanga den na wan switi fasi èn ben bigin taigi den fu a kownukondre fu Gado, èn a ben dresi den wan di ben abi dati fanowdu” (Lukas 9:11; Kolosesma 4:14). San a tori fu Lukas, di skrifi na ondro a krakti fu Gado en santa yeye, e sori taki Yesus ben du fosi, ala di a no de so na ini ibri kefal pe Yesus ben du wan wondru? A ben de a leri di Yesus ben leri a pipel.
7 Disi de akruderi a prenspari sani pe krakti e poti na tapu di wi e feni na ini Markus 6:34. A vers dati e sori krinkrin san ben buweigi Yesus na a fosi presi fu sori a sari di a ben firi gi den sma. A ben gi a pipel leri, fu di den ben abi yepi fanowdu na yeye fasi. Moro fruku na ini en diniwroko, Yesus ben taki: „Mi musu meki a bun nyunsu fu a kownukondre fu Gado bekènti na tra foto tu, bika fu a sani disi ede den ben seni mi kon” (Lukas 4:43). Ma wi ben o fowtu efu wi ben prakseri taki Yesus ben meki a Kownukondre boskopu bekènti soso fu di a ben de en plekti, neleki a ben de soso wan gwenti di a abi fu du a preikiwroko di a ben musu fu du. Nôno, a sari di a ben firi gi a pipel fu di a ben lobi den, ben de wan prenspari sani di ben buweigi en fu fruteri den a bun nyunsu. A moro bun sani di Yesus ben kan du gi den — so srefi gi den sikisma, den wan di ben kisi kwinsi fu ogri yeye, den pôtiwan, noso den angriberewan — ben de fu yepi den fu kon sabi, fu erken, èn fu lobi a waarheid fu Gado Kownukondre. A waarheid dati ben de a moro prenspari sani bika a Kownukondre sa regtfardiki a soevereiniteit fu Yehovah èn a sa tyari têgo blesi kon gi libisma.
8. Fa Yesus ben si a preikiwroko nanga a leriwroko fu en?
8 A preiki di Yesus ben preiki fayafaya fu a Kownukondre ben de a prenspari reide fu san ede a ben kon na grontapu. Pikinmoro na a kaba fu en diniwroko na grontapu, Yesus ben taigi Pilatus: „Na fu a sani disi ede mi gebore, èn na fu a sani disi ede mi kon na grontapu, so taki mi ben sa musu gi kotoigi fu a waarheid. Ibriwan sma di de na a sei fu a waarheid, e arki mi sten” (Yohanes 18:37). Wi si na ini den tu artikel na fesi taki Yesus ben de wan sma di ben abi safu firi — a ben broko en ede nanga sma, sma ben man go na en makriki, a ben hori sma na prakseri, a ben frutrow sma, èn moro leki dati srefi, a ben lobi sma. Wi musu frustan den sei dati fu en persoonlijkheid, efu trutru wi wani frustan a denki fu Krestes. A de prenspari tu fu frustan taki a denki fu Krestes wani taki so srefi taki a ben poti a preikiwroko nanga a leriwroko fu en na a fosi presi.
A Ben Gi Tra Sma Deki-ati fu Gi Kotoigi
9. Gi suma a preikiwroko nanga a leriwroko musu kon na tapu a fosi presi?
9 A poti di a preikiwroko nanga a leriwroko ben musu poti tapu a fosi presi — leki wan buweisi fu a lobi nanga a sari di a ben firi gi sma — no ben de wan sani di Yesus wawan ben musu du. A ben gi den bakaman fu en deki-ati fu abi den srefi firi di ben pusu en fu du sani, fu poti den srefi sani tapu a fosi presi tu, èn fu du den srefi sani di a ben du. Fu eksempre, baka di Yesus ben teki den 12 apostel fu en, dan san den ben musu du? Markus 3:14, 15 e taigi wi: „A ben seti wan grupu fu twarfu sma, di a ben kari „apostel” tu, so taki den ben sa kan go doro nanga en èn so taki a ben sa kan seni den go preiki èn fu abi makti fu puru ogri yeye na sma tapu.” ¿Yu si san ben musu kon tapu a fosi presi gi den apostel?
10, 11. (a) ¿Di Yesus ben seni den apostel fu en go, dan san a ben taigi den fu du? (b) San ben de a moro prenspari sani di Yesus ben seni den apostel go du?
10 Baka ten, Yesus ben meki den 12 apostel ben man betre tra sma èn puru ogri yeye na sma tapu (Mateus 10:1; Lukas 9:1). Dan a ben seni den fu bigin wan waka go na „den lasi skapu fu na oso fu Israèl”. Fu du san? Yesus ben taigi den: „Preiki te un de na pasi, èn taki: ’A Kownukondre fu hemel kon krosibei.’ Dresi siki sma, opo den dedewan baka, krin den gwasiman, puru ogri yeye na sma tapu” (Mateus 10:5-8; Lukas 9:2). Èn san na a sani di den ben du trutru? „Dati meki den ben gowe èn [1] ben preiki so taki den sma ben sa kan abi berow; èn [2] den ben puru furu ogri yeye na sma tapu, èn ben lobi oli gi furu siki sma èn ben dresi den.”—Markus 6:12, 13.
11 A no ala leisi den e taki fosi fu a kisi di sma musu kisi leri. ¿A no de so dan taki a sori di wi e sori na tapu a volgorde fu den penti di kari didyonsro, e poti tumusi furu prakseri tapu sani di de moro prenspari noso tapu den reide fu san ede sma e du sani? (Lukas 10:1-8) We, wi no musu denki taki a no prenspari omeni leisi den e kari a leriwroko bifo a betre di den e meki sma kon betre. Luku a kontekst na ini a kefal disi. Leti bifo Yesus ben seni den 12 apostel go, a situwâsi fu den bigi ipi sma ben naki Yesus ati. Wi e leisi: „Yesus ben bigin wan waka fu go na ala den foto nanga dorpu, ala di a ben gi leri na ini den snoga fu den èn ben preiki a bun nyunsu fu a kownukondre èn ben dresi ala sortu siki èn ibri sortu mankeri. Di a ben si a bigi ipi sma a ben firi sari nanga den, bika den ben kisi kwinsi èn den ben panya leki skapu sondro skapuman. Ne a ben taigi den disipel fu en: ’Iya, a kotiwroko bigi, ma furu wrokoman no de. Fu dati ede, begi a Masra fu a kotiwroko fu seni wrokoman go na ini a kotiwroko fu en.’”— Mateus 9:35-38.
12. Sortu tra marki den wondru wroko fu Yesus nanga den apostel ben kan doro?
12 Fu di den apostel ben de nanga en, meki den ben kan teki a denki fu Krestes na ini den. Den ben kan firi taki a lobi di den musu lobi sma èn a sari-ati di den musu abi gi sma, abi so srefi fu du nanga a preikiwroko nanga a leriwroko fu a Kownukondre — dati ben musu de a moro prenspari pisi fu den bun wroko di den e du. Akruderi disi, den bun sani di den ben du na skin fasi, soleki a dresi di den ben dresi sikisma, ben du moro leki nomo fu yepi den sma di de na ini nowtu. Soleki fa yu kan frustan, a dresi di den ben dresi sma èn a gi di den ben gi sma nyanyan nanga wan wondru, ben kan hari son sma (Mateus 4:24, 25; 8:16; 9:32, 33; 14:35, 36; Yohanes 6:26). Ma boiti taki den sani disi ben yepi sma na skin fasi, den ben buweigi den sma di ben si den wroko dati fu erken taki Yesus ben de a Manpikin fu Gado èn „a profeiti” di Moses ben taki na fesi fu en.—Yohanes 6:14; Deuteronomium 18:15.
13. Na tapu sortu rol a profeititori na ini Deuteronomium 18:18 ben poti krakti, di „a profeiti” di ben o kon ben o abi?
13 Fu san ede a ben de prenspari taki Yesus ben de „a profeiti”? We, san ben de a prenspari rol gi a sma dati, soleki fa dati ben taki na fesi? ¿„A profeiti” ben musu de pôpi fu di a du wondru sani fu dresi sma, noso fu di a ben firi sari gi sma meki a ben meki nyanyan gi den angribere sma? Deuteronomium 18:18 ben taki na fesi: „Mi sa opo wan profeiti gi den puru na mindri den brada fu den, leki yu [Moses]; èn fu tru mi sa poti den wortu fu mi na ini en mofo, èn a sa taigi den ala sani trutru di mi sa komanderi en.” So bun, soleki fa den apostel ben leri fu abi èn fu sori safu firi, den ben kan si taki a denki fu Krestes ben musu de fu si tu na ini a preikiwroko nanga a leriwroko fu den. Dati ben o de a moro bun sani di den ben kan du gi sma. Nanga dati den sikiwan nanga den pôtiwan ben kan kisi wini fu têgo, no soso den wini di den kan kisi na ini wan syatu libi nomo, noso wan tu porsi nyanyan nomo di den kan kisi.—Yohanes 6:26-30.
Leri a Denki fu Krestes Nownow
14. San a denki fu Krestes abi fu du nanga a preikiwroko fu wi?
14 No wan fu wi ben sa si a denki fu Krestes leki wan sani di de soso gi a fosi yarihondro — soso gi Yesus nanga den fosi disipel fu suma na apostel Paulus ben skrifi: „Wi trutru abi a denki fu Krestes” (1 Korentesma 2:16). Èn wi ben o erken wantewante taki a de wan plekti fu preiki a bun nyunsu èn fu meki disipel (Mateus 24:14; 28:19, 20). Toku a bun fu denki fu den reide fu san ede wi e du a wroko dati. A no ben sa musu de soso fu di wi e firi taki wi abi a plekti. Lobi gi Gado na a moro prenspari reide fu san ede wi e du a diniwroko, èn fu tru, efu wi wani de leki Yesus dan dati wani taki tu taki a sari di wi e firi gi sma musu de a reide tu fu san ede wi e preiki èn e gi sma leri.—Mateus 22:37-39.
15. Fu san ede a abi di wi musu abi sari-ati de wan prenspari sani na ini wi publiki diniwroko?
15 A tru, a no makriki ala ten fu firi sari gi sma di no abi a srefi bribi leki wi, spesrutu te wi e miti mi-no-ke fasi, noso sma e yagi wi, noso e gens wi. Ma efu wi lasi wi lobi gi sma noso wi no e firi sari gi den moro, dan wi kan lasi wan prenspari reide fu san ede wi wani du a Kresten diniwroko. So bun, fa wi kan kisi a firi fu firi sari gi sma? Wi kan pruberi fu si sma soleki fa Yesus ben si den, leki sma di „ben kisi kwinsi èn den ben panya leki skapu sondro skapuman” (Mateus 9:36). ¿Dati no e taki fa furu sma de na ini a ten disi? Den falsi relisi skapuman no ben sorgu den èn ben meki den kon breni na yeye fasi. Fu dati ede den no sabi a soifri tiri di de fu feni na ini Bijbel, èn den no sabi a paradijs situwâsi di Gado Kownukondre sa tyari kon heri esi gi wi grontapu. Den e ondrofeni den problema fu na aladei libi — so srefi pôtifasi, pratifasi na ini na osofamiri, siki, nanga dede — sondro fu abi a Kownukondre howpu. ¡Wi abi san den abi fanowdu: a bun nyunsu fu Gado Kownukondre di seti kaba na ini hemel, èn di kan kibri sma libi!
16. Fu san ede wi musu wani fruteri tra sma a bun nyunsu?
16 ¿Te yu e prakseri na so fasi fu den sani di den sma na yu lontu abi fanowdu na yeye fasi, dan dati no e buweigi yu ati fu du ala san yu man fu fruteri den a lobi-ati prakseri fu Gado? Iya, a wroko di wi e du, wi e du fu di wi e firi sari gi sma. Te wi e firi gi sma soleki fa Yesus ben du dati, dan sma sa yere dati na a sten fu wi, a sa de fu si na wi fesi, èn na a fasi fa wi e gi sma leri. Ala den sani dati sa meki a boskopu fu wi e hari sma moro, den sma di „abi a yoisti yeye gi a têgo libi”.—Tori fu den Apostel 13:48.
17. (a) San na wan tu fasi fa wi kan sori a lobi di wi abi gi tra sma èn a sari-ati di wi abi nanga den? (b) Fu san ede wan sma no kan bosroiti taki a sa du bun wroko, ofu a sa abi wan prati na a publiki diniwroko?
17 A no de fu taki dati a lobi nanga a firi di wi e firi sari gi sma musu de fu si na ini wi heri libi. Disi wani taki dati wi musu abi switifasi gi den sma di swaki na materia sei, den sikiwan, nanga den pôtiwan — èn wi musu du na wan reidelek fasi san wi man fu lekti a pina fu den. A abi fu du so srefi nanga den muiti di wi e du nanga wortu èn nanga den sani di wi e du, fu puru a sari fu den sma di lasi wan lobiwan na ini dede (Lukas 7:11-15; Yohanes 11:33-35). Toku a lobi, a bun-ati, nanga a sari-ati di wi e sori na den fasi disi, no musu de a moro prenspari sani pe wi e poti prakseri na tapu na ini den bun wroko fu wi, soleki fa son sma e du di e wroko fu meki a libi fu sma kon moro bun. Ma wan sani di de moro prenspari na den muiti di sma e du bika den abi den srefi eigifasi disi di Gado abi, ma di den e sori te den e du a Kresten preikiwroko nanga a leriwroko. Memre san Yesus ben taki fu den Dyu relisi fesiman: „Unu e gi a di fu tin pisi fu a munt èn fu a dille èn fu a komijn, ma unu no poti prakseri na tapu den moro prenspari afersi fu a Wet, dati wani taki, retidu nanga sari-ati nanga getrowfasi. Den sani disi unu ben musu du, èn toku unu no ben musu libi den tra sani tu” (Mateus 23:23). Gi Yesus a no ben de a wan noso a trawan — efu a e yepi sma di abi sani fanowdu na skin fasi, noso a e leri den yeye afersi di kan kibri den libi. Yesus ben du ala tu. Toku a de krin fu si taki en leriwroko ben de a moro prenspari sani bika a bun di a ben kan du na so fasi ben kan yepi sma fu têgo.—Yohanes 20:16.
18. San na ondrosuku di wi ben ondrosuku a denki fu Krestes musu buweigi wi fu du?
18 ¡Wi kan de nanga tangi srefisrefi taki Yehovah meki wi kon sabi a denki fu Krestes! Nanga yepi fu den Evangelie wi kan sabi moro bun den prakseri, den firi, den eigifasi, den aktiviteit, nanga den moro prenspari sani fu a moro bigi man di oiti ben libi. A e didon na wi fu leisi, prakseri dipi, èn gebroiki den sani di Bijbel e tyari kon na krin fu Yesus. Hori na prakseri, efu wi wani handri trutru leki Yesus, dan wi musu leri fosi fu denki, firi, èn ondrosuku sani fa en ben du dati, na a moro bun fasi fa wi man leki onvolmaakti libisma. Fu dati ede, abi a fasti bosroiti fu kweki èn fu sori a denki fu Krestes. Wan moro betre fasi fu libi no de, wan moro betre fasi fu handri nanga sma no de, èn no wan moro betre fasi no de gi wi èn gi tra sma fu kon krosibei na wi lobi-ati Gado, Yehovah.—2 Korentesma 1:3; Hebrewsma 1:3.
San Yu Ben Sa Piki?
• Sortu inzicht Bijbel e gi wi fu a fasi fa Yesus ben handri nofotron nanga sma di ben abi yepi fanowdu?
• Na tapu san Yesus ben poti krakti di a ben taigi den bakaman fu en san den musu du?
• Fa wi kan sori taki wi abi „a denki fu Krestes” na ini den aktiviteit fu wi?
[Aksi fu a tori disi]
[Wan prenki di e tapu heri bladzijde 23]
[Prenki na tapu bladzijde 24]
San na a moro bun sani di Kresten kan du gi tra sma?