Markus skrifi en 1:1-45
-
Yohanes a Dopuman e preiki (1-8)
-
Yesus dopu (9-11)
-
Satan kon tesi Yesus (12, 13)
-
Yesus bigin preiki na ini Galilea (14, 15)
-
Yesus kari den fosi disipel fu en (16-20)
-
Yesus puru wan ogri yeye na wan man tapu (21-28)
-
Yesus e dresi furu sma na Kaperna-um (29-34)
-
A e begi na wan presi pe a de en w’wan (35-39)
-
A dresi wan gwasiman (40-45)
1 Na so a bun nyunsu fu Yesus Krestes, a Manpkin fu Gado, e bigin:
2 Na ini a buku fu a profeiti Yesaya skrifi: „(Luku! Mi e seni mi boskopuman go na yu fesi èn a o sreka a pasi gi yu.)
3 Wan sma e bari na ini a sabana: ’Sreka a pasi fu Yehovah!* Meki den pasi fu en kon reti.’”
4 A boskopuman disi ben de Yohanes a Dopuman. A ben de na ini a sabana e preiki taki sma musu dopu fu sori taki den abi berow, so taki den kan kisi pardon fu sondu.
5 Dan ala den sma na ini a kontren fu Yudea nanga ala den sma di ben e libi na ini Yerusalem kon na en. Ne den taki krin sortu sondu den ben du èn a dopu* den na ini Yordan-liba.
6 Yohanes ben e weri krosi di meki fu kameili-w’wiri, a ben tai wan leer riem na en bere èn a ben e nyan sprenka nanga busi-oni.
7 A ben e preiki: „Baka mi wan sma o kon di bigi moro mi. Mi no warti srefi fu bukundu lusu a banti fu en susu.
8 Mi dopu unu nanga watra, ma en o dopu unu nanga santa yeye.”
9 Baka wan tu dei, Yesus kmoto fu Nasaret di de na ini Galilea èn Yohanes dopu en na ini Yordan-liba.
10 Fa yu si Yesus opo kmoto na ini a watra, a si hemel e opo èn Gado en yeye e saka kon na en tapu leki wan doifi.
11 Dan wan sten kmoto fu hemel. A taki: „Yu na mi Manpkin. Mi lobi yu èn mi feni yu bun.”
12 Direk baka dati a yeye meki Yesus go na ini a sabana.
13 Yesus tan 40 dei na ini a sabana pe Satan kon tesi en. A ben tan na mindri den meti fu a sabana, ma den engel ben e yepi en.
14 Baka di den sroto Yohanes, Yesus go na Galilea fu preiki a bun nyunsu fu Gado.
15 A ben e taki: „A reti ten doro èn a Kownukondre fu Gado kon krosbei. Abi berow èn bribi a bun nyunsu.”
16 Di a ben e waka na a syoro fu a Se fu Galilea, a si Simon nanga en brada Andreas e trowe den fisinet fu den go na ini a se, bika den ben de fisiman.
17 Ne Yesus taigi den: „Un tron bakaman fu mi, dan mi o meki unu tron fisiman di e fanga libisma.”
18 Direk den libi den fisinet fu den, dan den go waka na en baka.
19 Di a waka go pkinso moro fara a si den tu brada Yakobus nanga Yohanes, den manpkin fu Sebedeyus. Den ben de na ini a boto fu den e meki den fisinet fu den.
20 Sondro fu draidrai a kari den kon. Dan den gwe libi den p’pa Sebedeyus na ini a boto nanga den wrokoman èn den go waka na Yesus baka.
21 Baka dati den go na Kaperna-um.
Fa Sabat-dei doro, Yesus go na ini a snoga èn a bigin gi den sma leri.
22 Den sma ben ferwondru fu a fasi fa a ben e gi leri, bika a ben e gi leri leki wan sma di kisi makti fu Gado. A no ben e gi leri leki den leriman fu a Wet.
23 Na a srefi ten dati, wan man di ben abi wan ogri yeye na en tapu ben de na ini a snoga tu. A man bari:
24 „Fu san ede yu kon muilek wi, Yesus fu Nasaret. Na kon yu kon dya fu kiri wi? Mi sabi heri bun suma na yu. Yu na a Santawan fu Gado!”
25 Ma Yesus pir’ai gi na ogri yeye èn a taki: „Tapu yu mofo èn kmoto na a man tapu!”
26 Baka di na ogri yeye meki a man kisi stoipi, a bari bun tranga, dan a kmoto na a man tapu.
27 Den sma ferwondru so te, taki den ben e taigi makandra: „San na a sani disi? Na wan nyun leri! A man disi e taigi den ogri yeye san den musu du èn den e arki en.”
28 Na so a tori fu Yesus panya es’esi go na ala sei na ini a heri kontren fu Galilea.
29 Baka dati den kmoto na ini a snoga, dan den go na a oso fu Simon nanga Andreas, makandra nanga Yakobus nanga Yohanes.
30 Ma a m’ma fu a frow fu Simon ben d’don na bedi nanga korsu. Fa yu si Yesus doro den ferteri en taki a siki.
31 Yesus waka go na a uma, dan a hori en anu meki a opo. A korsu saka èn na uma go sreka n’nyan gi den.
32 Moro lati na ini a dei, di a son ben saka kba, sma bigin tyari ala den sikisma nanga den sma di ben abi ogri yeye na den tapu kon drape.
33 Ala sma fu a foto kon tnapu leti na a doro.
34 Dan a meki furu sma di ben abi difrenti sortu siki kon betre baka. A puru furu ogri yeye na sma tapu, ma a no ben gi den ogri yeye okasi fu taki, fu di den ben sabi taki en na Krestes.*
35 Fruku m’manten di a ben dungru ete, a opo go na dorosei na wan presi pe a ben kan de en w’wan èn a bigin begi.
36 Ma Simon nanga den tra sma di ben de nanga en, ben e suku en na ala sei.
37 Di den feni en den taigi en: „Ala sma e suku yu.”
38 Ma a taigi den: „Kow go na wan tra presi. Wi o go na den pkin foto na ini a birti fu preiki drape tu, bika na fu dati ede mi kon.”
39 Ne a go preiki na ini den snoga fu den na ini heri Galilea èn a puru ogri yeye na sma tapu.
40 Wan gwasiman ben kon na en tu. A man saka na tapu en kindi srefi èn a begi Yesus: „Mi sabi taki efu yu wani, yu kan meki mi kon krin.”
41 Di Yesus yere disi, a ben e sari. Dati meki a langa en anu fasi en èn a taigi en: „Mi wani. Kon krin.”
42 Direk a gwasi kmoto na a man tapu èn a kon krin.
43 Yesus seni en gwe direk, ma a taigi en krin tu san a ben musu du.
44 A taki: „Sorgu taki yu no ferteri nowan sma. Ma go meki a priester luku yu, dan yu musu tyari wan ofrandi soleki fa Moses taki, bika yu kon krin. Dati musu de wan bewijs gi den.”
45 Ma baka di a man gwe, a bigin taigi ala sma san psa èn a go ferteri a tori na ala sei. Dati meki Yesus no ben man go moro na ini den foto sondro fu sma si en. Fu dati ede a ben e tan na den fara presi dorosei fu den foto. Tòg sma ben e tan kmoto na ala sei fu kon na en.
