Markus skrifi en 11:1-33
11 Di den ben de krosbei fu Yerusalem, den doro na Olèif-bergi pe den dorpu Betfage nanga Betania ben de. Drape Yesus seni tu disipel fu en go na a dorpu.
2 A taigi den: „Go na a dorpu di unu e si drape. Solanga unu doro na ini a dorpu, unu o feni wan pkin buriki di tai. Noiti ete wan sma sdon na en tapu. Lusu en, dan un tyari en kon gi mi.
3 Efu wan sma aksi unu: ’Fu san ede unu e lusu a pkin buriki?’, dan un musu taki: ’Masra abi en fanowdu, ma solanga a kba a o seni en kon baka.’”
4 Dati meki den gwe èn den feni a pkin buriki di ben tai na a doro fu wan oso na ini wan pasi. Ne den lusu en.
5 Ma wan tu sma di ben e tnapu drape aksi den: „Fu san ede unu e lusu a pkin buriki?”
6 Den taigi den sma precies san Yesus taigi den. Ne den sma libi den meki den gwe nanga a buriki.
7 Baka dati den tyari a pkin buriki go na Yesus, den poti den krosi fu den na tapu a buriki, dan Yesus go sdon na en tapu.
8 Furu sma ben e bradi den krosi fu den na tapu a pasi tu èn trawan ben e koti taki puru fu den bon di ben de na den gron.
9 Den sma di ben e waka na fes’sei èn den sma di ben e waka na bakasei, ben e tan bari: „Gado wi e begi yu, tyari ferlusu kon! Blesi fu a sma di e kon na ini Yehovah* nen!
10 Blesi fu a Kownukondre di e kon, a di fu wi p’pa David! Grantangi, wi e begi, meki a sma di de na ini den moro hei presi na hemel tyari ferlusu kon!”
11 Baka dati a go na ini a tempel na Yerusalem. A luku ala sani drape, ma fu di a ben kon lati kba, meki a go na Betania nanga den 12 apostel.
12 A tamara fu en di den kmoto fu Betania, angri bigin kiri en.
13 Ne a si wan figabon moro fara. A bon ben abi w’wiri èn dati meki a go luku efu a ben kan feni froktu na en. Ma di a doro drape, a si taki na soso w’wiri a bon ben abi, bika a ten no ben doro gi den figabon ete fu gi froktu.
14 Dati meki a taigi a bon: „Noiti moro wan sma o nyan wan froktu fu yu.” Den disipel fu en yere di a taki a sani disi.
15 Now den doro na Yerusalem. Drape Yesus go na ini a tempel èn a bigin yagi den sma go na dorosei di ben e bai èn seri sani na ini a tempel. A drai den tafra tapu fu den sma di ben e wissel moni èn den bangi fu den sma di ben e seri doifi.
16 A no ben meki nowan sma waka psa na ini a tempel nanga den wrokosani fu den.
17 A ben gi sma leri tu èn a ben taigi den: „Unu no leisi san skrifi na ini Gado Buku? Drape skrifi: ’Sma o kari mi oso wan oso pe sma fu ala kondre e kon begi.’ Ma unu meki a kon tron wan presi pe fufurman e tan.”
18 Di den edeman fu den priester nanga den leriman fu a Wet yere disi, den bigin suku wan fasi fu kiri en. Ma den ben e frede en bika ala den sma ben e ferwondru fa a ben e gi leri.
19 Di a ben kon lati kba, den kmoto na ini a foto.
20 Ma fruku m’manten di den ben e waka psa a figabon, den si taki a bon kon drei te na a rutu.
21 Petrus ben memre san Yesus ben taigi a bon. Dati meki a taigi Yesus: „Leriman, luku! A figabon di yu ben fluku kon drei.”
22 Ne Yesus taigi den: „Bribi na ini Gado.
23 Unu kan bribi mi taki efu wan sma e taigi a bergi disi: ’Opo trowe yusrefi go na ini se’, èn a sma dati no e tweifri na ini en ati, ma a e bribi taki san a e taki o psa trutru, dan na so a o psa tu.
24 Dati meki mi e taigi unu: Awinsi san unu e aksi Gado, un musu bribi taki unu kisi en kba, dan unu o kisi en tu.
25 Te unu e tnapu e begi èn unu abi wan sani nanga wan sma, dan gi a sma dati pardon, so taki un P’pa di de na hemel kan gi unu pardon tu fu den sondu fu unu.”
26 * ——
27 Baka dati den kon baka na Yerusalem. Di a ben e waka na ini a tempel, den edeman fu den priester, den leriman fu a Wet nanga den fesiman kon na en.
28 Den taigi en: „Suma gi yu a reti fu du den sani disi? Suma gi yu a makti fu du den sani disi?”
29 Yesus taigi den: „Mi o aksi unu wan sani. Efu unu piki mi, dan mi o taigi unu suma gi mi a reti fu du den sani disi.
30 Suma gi Yohanes a reti fu dopu sma? Na Gado* noso na libisma? Un piki mi.”
31 Ne den taigi makandra: „Efu wi taki: ’Na Gado’, dan a o taki: ’Dan fu san ede unu no ben bribi en?’
32 Ma san o psa nanga wi efu wi taki: ’Na libisma’?” Den ben frede a pipel, bika den alamala ben e si Yohanes leki wan trutru profeiti.
33 Dati meki den piki Yesus: „Wi no sabi.” Dan Yesus taigi den: „Dan mi no o taigi unu tu suma gi mi a reti fu du den sani disi.”
