Markus skrifi en 2:1-28
2 Ma baka wan tu dei, a kon baka na Kaperna-um èn ala sma kon yere taki a ben de na oso.
2 Dati meki so furu sma kon drape, taki srefi na a mofodoro presi no ben de moro fu sma tnapu. Dan a bigin taki nanga den fu a wortu fu Gado.
3 Ne fo man tyari wan lanman kon na en.
4 Ma fu di so furu sma ben de drape, meki den no ben man tyari en langalanga go na Yesus. Dati meki den puru wan pisi fu a dak na loktusei fu Yesus. Baka dati den meki wan olo na ini a dak, dan den saka a lanman nanga a bedi go na ondro.
5 Di Yesus si a bribi fu den, a taigi a lanman: „Mi pkin, yu kisi pardon fu yu sondu.”
6 Ma son leriman fu a Wet di ben sdon drape ben prakseri:
7 „Fa a man disi kan taki so wan sani? A e wiswasi Gado. Na Gado w’wan man gi sma pardon fu sondu.
8 Ma Yesus ben sabi direk taki na dati den ben e taigi makandra. Dati meki a taigi den: „Fu san ede unu e denki so?
9 San moro makelek fu taigi a lanman: ’Yu kisi pardon fu yu sondu’, of ’Opo tnapu, teki yu bedi èn waka’?
10 Ma mi o sori unu taki a Manpkin fu libisma abi a makti na grontapu fu gi sma pardon fu sondu.” Ne a taigi a lanman:
11 „Mi e taigi yu: Opo tnapu, teki yu bedi èn go na yu oso.”
12 Direk a man opo teki en bedi èn leti na fesi ala sma a waka go na dorosei. Den alamala ferwondru èn den gi Gado glori. Den taki: „Noiti ete wi si so wan sani.”
13 Yesus go baka na dorosei èn a go na sekanti. Furu sma ben tan kon na en èn a gi den leri.
14 Di a ben de na pasi a si Leifi, a manpkin fu Alfeyus. A ben e sdon na a kantoro pe sma e go fu pai belasting. Yesus taigi en: „Tron wan bakaman fu mi.” Ne Leifi opo èn a bigin waka na en baka.
15 Bakaten Yesus nanga den disipel fu en ben e sdon nyan* na ini na oso fu Leifi. Furu sondari nanga sma di e teki belasting gi lanti ben sdon* nanga den tu fu di furu fu den ben tron bakaman fu Yesus.
16 Ma di den leriman fu a Wet, di ben de Fariseiman tu, si taki a ben e nyan nanga den sondari èn nanga den sma di e teki belasting gi lanti, den aksi den disipel fu Yesus: „A leriman fu unu e nyan nanga den sma di e teki belasting gi lanti èn nanga sondari?”
17 Di Yesus yere dati, a taigi den: „Gosontu sma no abi datra fanowdu, ma siki sma abi datra fanowdu. Mi no kon fu kari sma di e du san reti, ma mi kon fu kari sondari.”
18 Den disipel fu Yohanes nanga den Fariseiman ben e faste.* Dati meki den sma kon na en èn den aksi en: „Fu san ede den disipel fu Yohanes nanga den disipel fu den Fariseiman e faste, ma den disipel fu yu no e du dati?”
19 Ne Yesus taigi den: „Un denki taki den mati fu a trowmasra o faste te a trowmasra de nanga den ete? No tòg! Solanga a trowmasra de nanga den, den no kan faste.
20 Ma a ten o kon te sma o puru a trowmasra na den mindri. Dan den o faste!
21 Nowan sma e nai wan nyun pisi krosi na tapu wan owru dyakti. Efu wan sma ben o du dati, dan a nyun pisi krosi ben o hari na owru dyakti priti èn a priti ben o kon moro bigi.
22 Na so a de tu taki nowan sma e poti nyun win na ini owru winsaka. Efu wan sma ben o du dati, a win ben o priti den saka. Dan a o lasi a win nanga den winsaka. Dati meki sma e poti nyun win na ini nyun winsaka.”
23 Na wan Sabat-dei a ben waka psa na ini den aleisigron. Ne den disipel fu en bigin broko wan tu taki aleisi fu nyan.
24 Dati meki den Fariseiman taigi en: „Luku san den e du! Fu san ede den e du wan sani di den no mag du na a Sabat-dei?”
25 Ma a taigi den: „Noiti unu no leisi san David du di en nanga den man fu en no ben abi n’nyan moro èn di angri ben kiri den?
26 Na ini a ten di Abiatar ben de edeman fu den priester, David go na ini na oso fu Gado èn a nyan den brede di ben poti na fesi Gado leki wan ofrandi, aladi nowan sma ben mag nyan den brede boiti den priester. David ben gi den man fu en a brede dati tu tòg?”
27 Ne Yesus taigi den: „A Sabat-dei seti fu yepi libisma, ma a no prenspari moro libisma.
28 A Manpkin fu libisma na Basi fu a Sabat.”
