Maateˈne hagiirraame assiˈrate dandiitinannire baala assitinirono, hagiirreˈne hunannohu hedeweelchu coyi tuncu yaaˈnera dandaanno. (Mekibibi 9:11) Qarru tuncu yaannonke wote Maganu baxillunni kaaˈlannonke. Aane nooha Qullaawu Maxaafiha xintu seera harunsitinanniha ikkiro, kiˈnenna maateˈne buutote qarra nafa qeela dandiitinanni.

QULLAAWU MAXAAFI MAYYAANNO? “Yaachishannoˈne coye baalanka isi aana tuqqe, korkaatuno isi kiˈnera assaawanno.” (1 Pheexiroosi 5:7) Iillannoˈne fatana abbannohu Magano ikkinokkita woˈmanka wote qaagge. (Yaaqoobi 1:13) Maganunniwa shiqqinanniha ikkiro, isi baalunkunni woyyino garinni kaaˈlannoˈne. (Isayyaasi 41:10) “Wodaniˈneta fushshitine isira kuˈle.”—Faarso 62:8.

Qullaawa Maxaafa barru baala nabbawanna xiinxallano shesho afidhinanni gede assitannoˈne. Konni garinni, Yihowa “qarrinke baalunku yannara sheshifachishannonke” gara umiˈne heeshshonni laˈˈa dandiitinanni. (2 Qorontoosi 1:3, 4; Roomu Sokka 15:4) Isi ‘wodancha baalanta roortanno salaamesi’ aaˈnera qaale eino.—Filiphisiyusi 4:6, 7, 13.

MAA ASSA DANDIITINANNI?

• Wodanaaˈmitinanni gedenna garunni heddinara kaaˈlannoˈne gede Yihowa huuccidhe

• Nooˈne doorsha baalanka seekkitine laˈine woyyannore doodhe

QULLAAWU MAXAAFI MAYYAANNO? “Wodanchanno manchi wodani egenno afiˈranno; hayyichu manchi maccano egenno hasidhanno.” (Lawishsha 18:15) Woˈma mashalaqqe afiˈrate woˈnaalle. Maateˈne miillara mayi hasiisannoro huwatate woˈnaalle. Insa ledo hasaabbe. Coyidhanno wote macciishshe.—Lawishsha 20:5.

Shiidhinanni wotena? Waajjitine xissoˈne fuqqitinoonte. Yesuusi nafa “wiˈlinota” qaagge. (Yohaannisi 11:35; Mekibibi 3:4) Qoleno dancha gede fooliishshiˈranna goxa hasiissanno. (Mekibibi 4:6) Hatto assaˈne iillinoˈne qarra dandee saˈˈate kaaˈlitannoˈne.

MAA ASSA DANDIITINANNI?

• Maateˈne ledo hasaawa roso assiˈrate qarru iillaˈne geeshsha agartinoonte. Togoo rosichi heeˈriˈnero, qarru yannara kiˈne ledo hasaawa shota ikkitannonsa

• Kiˈnera iillinoˈnehu gedee qarri iillinonsarira hasaaphe

QULLAAWU MAXAAFI MAYYAANNO? “Halaalaanchu jaali ayewoteno baxillaanchoho; isi qarru barrira ilamanno rodooti.” (Lawishsha 17:17) Jaallaˈne kaaˈlitaˈnera hasidhannoha ikkirono, maa assitannoˈnero kayinni afa hooggara dandiitanno. Hasiisannoˈneri maatiro kullensa ikkinnina fokkifattinoonte. (Lawishsha 12:25) Hattono Qullaawa Maxaafa seekkite affinori ayyaanaamittetenni kaaˈlitannoˈne gede xaˈmidhe. Insa Qullaawu Maxaafi giddonni kultannoˈne biddishshi kaaˈlannoˈne.—Yaaqoobi 5:14.

Magano addaxxannonna isi uyino hexxo ammananno manni ledo ganyitine gamba yitinanniha ikkiro hasiissannoˈne irko afidhinanni. Qoleno jawaante hasiissannonsare kaaˈlitiniro lowo shesho afidhinanni. Yihowara nooˈne ammananna isi uyino hexxo kullensa. Qarrantinore kaaˈle, hattono baxannoˈnenna kiˈnera assaawanno manniwa aana agurtinoonte.—Lawishsha 18:1; 1 Qorontoosi 15:58.

MAA ASSA DANDIITINANNI?

• Muli jaaliˈnera giddoˈneta hasaaphe, hattono kaaˈlannoˈne wote maahoyye yiiyye

• Hasiisannoˈnere maaxxinikki baddine kulle