GAFA 1
Maateˈne Hagiirraame Assiˈrate Maganu Seera Harunse
“Kalaqaanchu umonni labbaahanna meyaata asse kalaqinonsa.”—Maatewoosi 19:4
Umo adhanna adhama xintinohu Magano Yihowaati. a Qullaawu Maxaafi Yihowa umita meya mancho kalaqe kae ‘manchunniwa abbinota’ kulanno. Addaami tennera lowo geeshsha hagiidhe togo yiino: “Kuni miqichi miqqaˈyanni haaˈnoonniho, maaluno maaliˈyanni haaˈnoonniho.” (Kalaqo 2:22, 23) Xaano ikkiro Yihowa adhamino manni hagiirraamma ikkara hasiˈranno.
Adhantini yannara baalunkuri injaannonke yitine heddinoonniha ikkara dandaanno. Ikkollana, lubbora baxamanno minaanninna minaama mereero nafa qarru kalaqamasi digattanno. (1 Qorontoosi 7:28) Tenne birosherera nooha Qullaawu Maxaafiha xintu seera harunsitiniro maateˈne hagiirru noota ikkitanno. b—Faarso 19:8-11.
1 YIHOWA UYINOˈNEHA LOOSU QEECHA HUWATTE
QULLAAWU MAXAAFI MAYYAANNO? Minaanni maatete umoho.—Efesooni 5:23.
Minaanna, Yihowa minaamakki towaatattosera hasiˈranno. (1 Pheexiroosi 3:7) Yihowa ise kalaqinohu aggaare ikkitaheraati; qoleno ayirrinyunninna baxillunni amadattosera hasiˈranno. (Kalaqo 2:18) Minaamakki lowo geeshsha baxanna ise hasatto balaxisiisate maahoyye yaattoha ikka hasiissannohe.—Efesooni 5:25-29.
Minaama, Yihowa minaannakki lowo geeshsha ayirrisattaranna loosu qeechasi danchu garinni wonshanno gede kaaˈlattasira hasiˈranno. (1 Qorontoosi 11:3; Efesooni 5:33) Minaannikki muranno coyibba maahoyye yite adhi; hattono woˈmu wodaninni ledosi kaaˈlami. (Qolasiyaasi 3:18) Tenne assakki minaannikkinna Yihowa illera xuma ikkatta gede assitannohe.—1 Pheexiroosi 3:1-6.
MAA ASSA DANDIITINANNI?
-
Dancha minaanna woy dancha minaama ikkate woyyeessiˈra hasiissannoˈne coye kuˈu koˈoye xaˈme. Hakkiinni seekkitine macciishshe, hattono woyyeessiˈra hasiissannoˈnere woyyeessiˈrate sharramme
-
Cincaaleeyye ikke. Lamunkura mimmito hagiirsiissinanni gara rosate yanna hasiissannoˈne
2 GALTEˈNERA ADDINTA ASSAABBINANNITA LEELLISHSHE
QULLAAWU MAXAAFI MAYYAANNO? Galteˈne hasatto dea dihasiissannoˈne. (Filiphisiyusi 2:3, 4) Yihowa soqqamaasinesi “manna baalaho [jooguulle]” ikkitara hasiˈrannota qaaggine, galteˈne muxxe ikkitino gede assitine laˈe. (2 Ximootewosi 2:24) “Kaˈni gede coyiˈnanni coyi bisete gede madiissanno; hayyootu arrawi kayinni hursanno.” Konni daafira coyidhinanni coye seekkitine hedde. (Lawishsha 12:18) Yihowa ayyaani shaqqillunninna baxillunni coyidhinanni gede kaaˈlannoˈne.—Galaatiya 5:22, 23; Qolasiyaasi 4:6.
MAA ASSA DANDIITINANNI?
-
Galteˈne ledo jajjabba coyibba kayissine hasaabbinara albaanni, wodanaaˈmitine macciishshitinanni gedenna kuˈu kuˈuyi hedo adhate maahoyye yitinara kaaˈlannoˈne gede Yihowa huuccidhe
-
Coyidhinanni coyenna coyidhinanni gara seekkitine hedde
3 MITTO IKKITINOONNITA HEDDE
QULLAAWU MAXAAFI MAYYAANNO? Adhantini wote galteˈne ledo “mitto maala” ikkitinoonni. (Maatewoosi 19:5) Ikkollana lame addi addi manna ikkitinoonni daafira babbaxxitino hedo heedhaˈnera dandiitanno. Konni daafira hedoˈne xaadisidhinanni gara rosa hasiissannoˈne. (Filiphisiyusi 2:2) Mitto coye murtinanni wote mittimma lowo geeshsha hasiissannoˈne. Qullaawu Maxaafi, “Amaale heedhuro somu qinaanno” yaanno. (Lawishsha 20:18) Mitto coye murtinanni yannara Qullaawu Maxaafiha xintu seera harunse.—Lawishsha 8:32, 33.
MAA ASSA DANDIITINANNI?
-
Galteˈnera hedoˈne woy mittu coyira nooˈne lao calla ikkikkinni godowiˈneta fushshitine kulle
-
Mitto coye assate wolu manchira qaale eˈinara albaanni galteˈne ledo amaalamme