Maatewoosi Wongeella 26:1-75
-
Kakkalaano Yesuusa shitara gano gantu (1-5)
-
Mitte mancho Yesuusi umira shitto duntu (6-13)
-
Jeefote Faasikanna Yihudi Yesuusa sayise uyino gara (14-25)
-
Mootichu Hurbaate xintini (26-30)
-
Yesuusi, Pheexiroosi kaadannosita balaxe coyiꞌri (31-35)
-
Yesuusi Geetesemaane yinanniwa huuccatto assiꞌri (36-46)
-
Yesuusa amandi (47-56)
-
Yoo yinasira Sanihediriini shongo shiqinshi (57-68)
-
Pheexiroosi Yesuusa kaadi (69-75)
26 Yesuusi konne coye baala coyiꞌre kaihu gedensaanni rosaanosi togo yiinsa:
2 “Lamu barri gedensaanni Faasika ayirrinsannita affinoonni; manchi Beettono haqqaho sutamara sayinse uyinanni.”
3 Hatte yannara kakkalaanote roorrootinna cimeeyye Qeyyaafa yinannihu kakkalaanote biili hoowera gamba yite,
4 Yesuusa amadatenna* shaate gano gantu.
5 Ikkollana insa togo yitu: “Mannu cancamannokki gede, iso ayyaanu yannara amandoonke.”
6 Yesuusi Biitaaniyaho Simooni yinannihu dhiigu dhibbi amadinosi manchi mine heeꞌreenna,
7 mitte mancho albaasxiroosi yinanni gujuujjera lowo woxi shitto* haadhe isiwa shiqqu; isi sagale itanni heeꞌreenna shitto umisira duntu.
8 Rosaanosi tenne laꞌuti hanqite togo yitu: “Shitto mulla mayira hunanni heeꞌnoonni?
9 Lowo woxira hirre woxe buxanete diuyinanni?”
10 Yesuusi insa maa hasaabbanni nooro afe togo yiinsa: “Mancho mayira qarrissinannise? Ise anera danchare assitinoe.
11 Buxane woꞌmanka woyite kiꞌne ledo heedhanno; ani kayinni woꞌmanka woyite kiꞌne ledo diheeꞌreemmo.
12 Ise bisiꞌyara shitto duntinohu ane waammate qixxeessateeti.
13 Halaale yeemmoꞌnena, konne dancha duduwo alame woꞌmate dudumbanniwa baalankawa tini mancho assitinoreno ise qaaggora kullanni.”
14 Hakkiinni Tonaalamu giddo mittu Asqorootu Yihuda yinannihu kakkalaanote roorrootiwa mare,
15 “Iso sayise uummoꞌnero maa uyitinannie?” yii. Insano 30 birru saante* uyitasira sumuu yitu.
16 Konnira isi hatte yannanni kayise Yesuusa sayise aara injo hasiꞌranni keeshshi.
17 Timu Ayyaanira* umi barra rosaano Yesuusiwa shiqqe togo yitu: “Faasiku hurbaate mama qixxeessinammohera hasiꞌratto?”
18 Isino togo yiinsa: “Katama hadhine Ewelo yinanni mancho togo yiiyye: ‘Rosiisaanchu togo yiino: “Yannaꞌya* iillitino; rosaanoꞌya ledo Faasika ate mine ayirriseemmo.”’”
19 Konnira rosaano Yesuusi hajajinonsa gede assitu; Faasikaho hasiisannore baalano qixxeessitu.
20 Hashshita Yesuusi 12 rosaanosi ledo hurbaateho ofolli.
21 Hurbaate ittanni heedheenna isi, “Halaale yeemmoꞌnena, kiꞌne giddo mittu sayise aannoe” yii.
22 Insa tennera lowo geeshsha dadillite mittu mittunku iso, “Mooticha, hakku aneetini?” yitu.
23 Isino qole togo yii: “Sayise aannoehu ane ledo sayinete anga wore tima qasiꞌranni nooho.
24 Hige manchi Beetti balanxe isi daafira borreessinoonni garinni reyanno; manchi Beetto sayise aannohura kayinni aanneꞌe! Hakku manchi ilama hoogoommero woyyannosihu baino.”
25 Sayise aasira kae noohu Yihudi qole, “Rosiisaancho, hakku aneetini?” yii. Yesuusino “Atinniwe yiitto” yiisi.
26 Sagale ittanni heedheenna Yesuusi tima haaꞌre maassiꞌrihu gedensaanni, hiiqqaqqe rosaanosira aanni, “Hiiꞌe, itte. Kuni maaliꞌyara lawishshaho” yiinsa.
27 Hakkiinni finiincho haaꞌre Magano galatihu gedensaanni togo yee uyinsa: “Baalunku kawiinni agge;
28 Tini lowo manni cubbo agursiisate duꞌnantannote qaalu gondoori mundeeꞌyara lawishshaho.
29 Kayinni kuleemmoꞌnena, Anniꞌya Gashshootira kiꞌne ledo haaro woyine agammo geeshsha tenne woyine layinkimeeshsho horonta diageemmo.”
30 Jeefoteno guweenyu faarso faarsituhu gedensaanni, Ejedhete Ilaala hadhu.
31 Hakkiinni Yesuusi togo yiinsa: “‘Allaalaancho ganeemmo; geꞌreewu hoshshano billaallitanno’ yine borreessinoonnina, konne hashsha kiꞌne baalunku anenni kainohunni gufidhinanni.
32 Ikkollana reyotenni kaummohu gedensaanni kiꞌne balaxe Galiila saeemmo.”
33 Pheexiroosi kayinni togo yiisi: “Atenni kainohunni wolootu baalu gufidhurono, ani horonta digufiꞌreemmo!”
34 Yesuusino togo yiisi: “Halaale yeemmohena, techo hashsha lukkichu ganikkinni sase higge kaadattoe.”
35 Pheexiroosino togo yiisi: “Reya hasiissuero nafa, ate ledo reyemmo ikkinnina horonta dikaadeemmohe.” Wole baalanti rosaanono hatto yitu.
36 Hakkiinni Yesuusi insa ledo Geetesemaane yinanni base daye rosaanosi togo yiinsa: “Ani kooꞌꞌo mare huuccatto assiꞌrammo geeshsha, kiꞌne kowiicho ofolle.”
37 Pheexiroosinna lamenta Zebidewoosi ooso ledosi haaꞌre haꞌri; hakkiicho dadillunna lowo yaaddo amaddusi.
38 Hakkiinni Yesuusi togo yiinsa: “Yaaddo shitanni nooe.* Kowiicho heedhine ane ledo baqqi yitine agadhe.”
39 Hakkunni gedensaanni insawiinni shiima geeshsha haꞌre alba hige kumbuule togo yee huucciꞌri: “Annaꞌya, dandaamannoha ikkiro kuni finiinchi anewiinni saona. Kayinni ane hedo gede ikkikkinni ate hedo gede ikkona.”
40 Rosaanosiwa higi woyite goxxe noore afe Pheexiroosi togo yii: “Ane ledo mitte saate nafa baqqi yitine agadha hooggini?”
41 Jifamate giddora eꞌinannikki gede baqqi yitine agadhe; qoleno agurtinikkinni huuccidhe. Hige ayyaanu qixxaawaho; maalu* kayinni daafuraamoho.”
42 Xaano layinkimeeshsho haꞌre togo yaanni huucciꞌri: “Annaꞌya, kuni finiinchi agummokki saꞌꞌannokkiha ikkiro, ati hedootto gede ikkona.”
43 Galagale dayi woyiteno mugichu amadeennansa goxxe noore afi.
44 Xaano insa agure haꞌre sayikkimeeshsho wona yiita yaanni lede huucciꞌri.
45 Hakkiinni galagale rosaanosiwa hige togo yiinsa: “Tini gonxanninna fooliishshiꞌnanni yanna diꞌꞌikkitino! Kuneeti manchi Beetto cubbaataammu angara sayinse uyinanni saate iillitino.
46 Kaꞌe haꞌnona. Kuneeti sayise aannoehu dayino.”
47 Yesuusi coyiꞌranni heeꞌreenna, Tonaalamu wido ikkinohu Yihudi kae dayi; kakkalaanote roorrootinna cimeeyye sokkinohu bisenna dulla adhinohu lowo manni ledosi no.
48 Sayise aannosihuno, “Hasidhinannihu ani sunqeemmohona iso amadde” yee malaate kulinonsa.
49 Hakkiinni isi Yesuusiwa mare, “Rosiisaancho keereho?” yee kimmi asse sunqisi.
50 Yesuusi kayinni “Jaala, kawira dayoottohu mayiraati?” yiisi. Hakkunni gedensaanni mannu mare Yesuusa amade usuri.
51 Ikkollana Yesuusi ledo noori giddo mittu bise fushshiꞌre kakkalaanote biili borojjichira macca gane tayisi.
52 Hakkiinni Yesuusi togo yiisi: “Bise fushshidhannori baalu bisetenni baꞌannona, bisekki bayichose qoli.
53 Konni lipheessi giddo Anniꞌya 12 leegiyoone* saꞌanno sokkaasine soyannoe gede huucciꞌra dandeemmokkiha lawihe?
54 Ikkollana, hatto assummoro Qullaawa Borro konni garinni ikka hasiissannosi yitannori hiitto ikke woꞌmanno?”
55 Yesuusi hatte yannara mannaho togo yii: “Mulqiꞌrannoha amandannihu gede bisenna dulla adhitine dagginihu ane amadateeti? Barru baala qullaawu mini giddo ofolle rosiisoommo; kiꞌne kayinni hakkawoyite diamaddinoonnie.
56 Ikkollana kuni baalu ikkinohu masaalaanote maxaaffara* borreessinoonniri woꞌmanno gedeeti.” Hatte yannara rosaanosi baalanti iso hunte xooqqu.
57 Yesuusa amadduri iso haadhe kakkalaanote biili Qeyyaafawa massitu; hakkiicho borreessaanonna cimeeyye gamba yite no.
58 Ikkollana Pheexiroosi Yesuusiwiinni xeertiꞌre kakkalaanote biili Qeyyaafa hoowe geeshsha hoodesi haꞌri; hoowete giddoonni eihu gedensaanni coyi gawalo laꞌꞌara mini soqqamaano ledo ofolli.
59 Kakkalaanote roorrootinna Sanihediriini shongo woꞌma Yesuusa shaate kaphu naqaashshe hasidhanni no.
60 Naqaashshe ikkara lowo manni dayinoha ikkirono, ammansiissanno taje diafidhino. Gedensoonni lamu manni naqaashshe ikke shiqe
61 togo yii: “Kuni manchi ‘Maganunniha qullaawa mine diige sasu barri giddo mina dandeemmo’ yiino.”
62 Hatte yannara kakkalaanote biili kae uurre togo yiisi: “Mitte dawarono diqolatto? Mannu mayyee kassasanni noohero dimacciishshootto?”
63 Yesuusi kayinni sammi yee giwi. Konnira kakkalaanote biili togo yiisi: “Ati Maganu Beetto Kiristoosiitironna teꞌee kulattonke gede heeshshote Maganinni xaarsiiseemmohe!”
64 Yesuusino togo yiisi: “Atinni yiittowe. Ani kayinni yeemmoꞌnena, xaa kaꞌa manchi Beetti Wolqaataamu qiniiteenni ofolle gordu gomichinni daanna laꞌinanni.”
65 Hakkiinni kakkalaanote biili uddanosi dare togo yii: “Maganowe xoni! Wole naqaashshe mayira hasiꞌneemmo? Kune xonanna kiꞌneno macciishshitinoonni.
66 Tennera kiꞌne mayitinanni?” Insano, “Reya hasiissannosi” yite qoltu.
67 Hakkiinni albaho anja tuffusi, hattono tuntuꞌmotenni gantusi. Wolootuno qawaaddanni
68 togo yitusi: “Kiristoosi, hanni ati masaalaanchohoro ganihehu ayetiro kulinke.”
69 Pheexiroosi minu gobbaanni hoowete giddo ofolle heeꞌreenna mitte soqqamaancho isiwa dagge “Atino Galiilu Yesuusi ledoho” yitu.
70 Pheexiroosi kayinni, “Maricho coyidhanni noottaronni diafoommo” yee mannu baalu albaanni kaadi.
71 Hoowete xullichira heeꞌreenna wole beetto affe, hakko noo mannira “Kuni manchi Naaziretete Yesuusi ledoho” yitu.
72 Isi kayinni xaaranni, “Ati yaatta mancho diegennoommo!” yee xaano kaadi.
73 Shiima yanna gedensaanni hakko uurrite noori dagge Pheexiroosi togo yitu: “Atino insa widiho; coyiꞌratto gari leellishanni no.”
74 Hakkiinni isi, “Konne mancho diegennoommo” yee xaaranni isonooto rumi. Hakkawoyintenni lukkichu gani.
75 Hatte yannara Pheexiroosira Yesuusi “Lukkichu ganikkinni sase higge kaadattoe” yiinoti qulli yitusi. Hakkiinni gobbara fule hururame wiꞌli.
Lekkaalliidi Qaagiishshuwa
^ Woy “usuratenna.”
^ Noo gedeenni tirriro, “tanni yite suꞌniitanno zayite.”
^ Birra yinanni siwiila tumme seekkinoonni saanteeti.
^ Qaallate Tiro lai.
^ Woy “hirqinoonnie yanna.”
^ Woy “lubboꞌya reyote geeshsha dadillitino.”
^ Mannu ooso cubbaataammanna guuntete xeꞌne noonsare ikkitinota leellishanno.
^ Leegiyoone hundi waro Roomu olanto gaamooti. Mitte leegiyoone giddo 4,000 kayisse 6,000 geeshsha ikkitanno olanto heedhanno. Kowiicho kuni qaali batinye kulannoho.
^ Woy “qullaawa borrora.”
