Maatewoosi Wongeella 21:1-46
21 Yerusaalame iilla rakkutanna Ejedhete Ilaali aana noota Beetefaage iillituta Yesuusi lame rosaanosi soyi;
2 togo yiinsa: “Kooee laꞌinanni qacha marre; martinanni heedhinenni hakkiicho usurantino harricho darmichose ledo affinannina tirtine anewa abbe.
3 Xaꞌmannoꞌnehu heeꞌriro ‘Mootichu hasiꞌrino daafiraati’ yiiyye. Hakkawoyite isi bayichonkonni soyanno.”
4 Kuni ikkinohu masaalaanchu togo yee coyiꞌrinori woꞌmanno gedeeti:
5 “Tsiyooni beetto togo yiiyye: ‘Kuneeti mootekki jooga ikke harricho gulufe, ee harrichote qaaqqo darmicho gulufe atewa daanno.’”
6 Rosaanosino hadhe Yesuusi hajajinonsa gede assitu.
7 Harrichonna darmichose haadhe abbitu; uddannansano harrete aana worteenna Yesuusi aanansa* ofolli.
8 Rooru manni uddannansa doogote kari; wolu manni kayinni haqqete sinna murmure doogote kari.
9 Qoleno, albasiinninna badhesiinni haꞌranni noohu lowo manni togo yaanni qeexaaꞌli: “Magano, Daawiti Beetto gatisattosi gede huucciꞌneemmohe!* Yihowa* suꞌminni daannohu maassaminoho! Iima heeꞌrattohu, gatisattosi gede huucciꞌneemmohe!”
10 Yesuusi Yerusaalame iilli yannara katamu woꞌmu, “Kuni ayeti?” yaanni hembeelami.
11 Mannuno, “Kuni Galiilu gobbanni Naaziretete kataminni dayinoho masaalaancho Yesuusaati” yii.
12 Yesuusi qullaawa mine eꞌꞌe qullaawu mini giddo hirtanninna hidhitanni noore baala fushshe shorri; woxe soorritannori xarapheeyyenna lemboola hirtannori wombarrano galche uullate gani.
13 Qoleno togo yiinsa: “Mineꞌya ‘Huuccattote mineeti’ yinanni yine borreessinoonni; kiꞌne kayinni mulqiꞌraanote goda assitinoonni.”
14 Qullaawa mine heeꞌreenna ballootunna naafootu isiwa daggu; isino hursinsa.
15 Kakkalaanote roorrootinna borreessaano isi assinoha dhagge ikkanno coyenna qaaqquullu qullaawu mini giddo “Daawiti Beetto gatisattosira huucciꞌneemmohe” yite cancitanna laꞌe hanqite
16 togo yitusi: “Kuri qaaqquulli yitannore macciishshitto?” Yesuusino togo yiinsa: “Ee macciishshoommo. ‘Oosotenna qaaqquullu afiira galata qixxeessootto’ yaannoha horo dinabbabbinoonni?”
17 Hakkiinni insa hakko agure katamunni fule Biitaaniya haꞌre hashsha hakko gali.
18 Soodo guto galagale katama higanni heeꞌre hudiꞌri.
19 Doogote balasete haqqicho lae hatte haqqichowa mari; ikkollana daro agurranna aanase mittoreno afinokki daafira togo yii: “Layinkita guma laaltooti ati.” Balasete haqqichono bayichonkonni mooltu.
20 Rosaanosi tenne laꞌe dhagge assidhe, “Tini balasete haqqicho hiikkite anga aana mooltu?” yitu.
21 Yesuusi qole togo yiinsa: “Halaale yeemmoꞌnena, ammana heedhuꞌneronna huluullama hoogginiro ani tenne balasete haqqicho assummota assitinanniha calla ikkikkinni konne ilaala ‘Kawiinni kaꞌe baaru giddo uwi’ yitiniro nafa yitinita ikkanno.
22 Ammana heedhuꞌnero huuccidhinannire baala afidhinanni.”
23 Qullaawu minira eꞌꞌe rosiisanni heeꞌreenna kakkalaanote roorrootinna cimeeyye isiwa dagge togo yitu: “Konne coye assattohu mayi silxaanenniiti? Tenne silxaane uyinohehu ayeti?”
24 Yesuusino qole togo yiinsa: “Anino mitto coye xaꞌmeemmoꞌne. Kultiniero anino konne coye asseemmohu mayi silxaanenniitiro kuleemmoꞌne.
25 Yohaannisi manna cuuate silxaane afiꞌrinohu gordunniitinso mannuwiinniiti?” Insa kayinni togo yitanni insa insanaawa hasaabbu: “Gordunniiti yinummoro ‘Iso mayira ammana gibbiniyya?’ yaannonke.
26 ‘Mannuwiinniiti’ yinummoro kayinni baalunku Yohaannisi masaalaanchu gede asse laꞌꞌanno daafira manna waajjinoommo.”
27 Konnira insa Yesuusira, “Dianfoommo” yite qoltu. Yesuusino “Anino konne coye asseemmohu mayi silxaanenniitiro dikuleemmoꞌne” yiinsa.
28 “Kiꞌnera ma lawannoꞌne? Mittu manchira lame ooso noosi. Kuni manchi bayiru beettisiwa mare, ‘Beettoꞌya techo hadhe woyinete irsha loosi’ yii.
29 Beettuno, ‘Dihaꞌreemmo’ yee qoli; gedensoonni kayinni gaabbe woyinete irsha haꞌri.
30 Maaꞌniidi beettisiwano mare wona kuꞌunnira yiita yii. Beettuno, ‘Maahoyye anna, haꞌreemmona’ yii; kayinni dihaꞌrino.
31 Lamunku giddo annisi fajjo assinohu hiikkonneeti?” Insano, “Bayiriidiho” yitu. Yesuusino togo yiinsa: “Halaale yeemmoꞌnena, qaraxaasinenna foortannori Maganu Gashshoote ea balaxxannoꞌne.
32 Korkaatuno, Yohaannisi keeraanchimmate doogo leellishaꞌnera dayino; kiꞌne kayinni diammantinoonnisi. Qaraxaasinenna foortannori kayinni ammantinosi; kiꞌne tenne laꞌinihu gedensaanni nafa gaabbitine diammantinoonnisi.
33 “Wole lawishshano macciishshe: Woyine kaasiꞌrinohu mittu qaete anni no; isi hatte woyine gaangeesse huxxa huxxi; hakkiicho woyine huuncinanni darga ume qixxeessi; hattono agarranni shae seekki; hakkiinni gate loossannorira guto oye wole gobba haꞌri.
34 Woyinete laalo gamba assinanni yanna iillituta, qeechasi abbitara borojjootasi gate loossannoriwa soyi.
35 Ikkollana gatu loosaasine borojjootasi amadde mitto gantu, mitto shitu, mitto kinnatenni awwaaltu.
36 Xaano isi kiiro albirinni roortannore wole borojjoota soyi; insa kayinni kurino albire assitu gede assitu.
37 Jeefote ‘Beettoꞌya ayirrissanno’ yee iso insawa soyi.
38 Gatu loosaasine beettosi laꞌuti insa insanaawa, ‘Ragiꞌrannohu konneeti. Amme shine raggesi adhinona!’ yitu.
39 Konnira iso amadde woyinete irshinni goshooshshe fushshite shitu.
40 Hakko daafira, woyinete irshi anni daanno woyite kuri gatu loosaasine ma assannoha lawannoꞌne?”
41 Kakkalaanote roorrootinna cimeeyyeno togo yitusi: “Insa bushuulle ikkitinohura shee gudanno; hakkiinni woyinete irsha guma yanna yannante uyitannosirira wole loosaasinera guto aanno.”
42 Yesuusino togo yiinsa: “Qullaawa Borro giddo, ‘Mine mintannori mishshe agurtino kinchi, qara dhaawate kincho ikkino. Kuni dhaawate kinchi dayinohu Yihowawiinniiti;* illenkerano maalalete’ yaannoha horo dinabbabbinoonni?
43 Gordu Gashshoote kiꞌnewiinni haaꞌne guma laaltanno dagara uyinanni yeemmoꞌnehu iseraati.
44 Qoleno konni kinchi aana uwannohu lowo geeshsha madiꞌranno. Kuni kinchi aanasi uwannohu baalu kayinni cancanamanno.”
45 Kakkalaanote roorrootinna Farisootu tenne lawishshuwa macciishshituta, coyiꞌranni noohu insa daafira ikkinota affu.
46 Insa amaddasira* hasidhinoha ikkirono, manna waajjitu; korkaatuno mannu iso masaalaanchu gede asse laꞌꞌanno.
Lekkaalliidi Qaagiishshuwa
^ “Aanansa” yiniti uddanna ikkitukkinni digattino.
^ Girikete Afiinni, Hosaina.
^ Guwuursha A5 lai.
^ Guwuursha A5 lai.
^ Woy “usurtasira.”
