Maatewoosi Wongeella 19:1-30
19 Yesuusi konne coye coyiꞌre kaihu gedensaanni, Galiilunni kae Yordaanoosira widoonni noota Yihudu dannuwa dayi.
2 Lowo mannino hoodesi haꞌri; isino hakkiicho dhiwantinore hursi.
3 Hakkiinni Farisootu isiwa dagge jiffe laꞌasira yite togo yite xaꞌmitu: “Mittu manchi kairira baalaho minaamasi fushshe haꞌrisara seeru fajjanno?”
4 Isino togo yee qolinsa: “Kalaqaanchu umonni labbaahanna meyata asse kalaqinonsata dinabbabbinoonni?
5 Konni daafira manchu annasinna amasi agure minaamasi ledo quraanyamanno;* lamunku mitto maala ikkitanno.
6 Konnira, xaate insa mitto maalaati ikkinnina lame diꞌꞌikkitino. Hakko daafira, Maganu waaxinore mittu manchino badoonke.”
7 Insano togo yitusi: “Ikkina Muse, fushshe haꞌrisate woraqata oye haꞌrisannose gede hajajinohu mayiraati?”
8 Isino togo yiinsa: “Muse minaamaꞌne fushshitine haꞌrissinara fajjinoꞌnehu wodaniꞌne kakkachinota laeeti ikkinnina umo hatto diꞌꞌikkino.
9 Ani kayinni yeemmoꞌnena, foortukkinni* minaamasi fushshe haꞌrise wole adhannohu baalu soorrannoho.”
10 Rosaanosino, “Minaanninna minaama coyi hatto ikkiro adhammikki heeꞌra woyyate” yitusi.
11 Isino togo yiinsa: “Elto noonsare ikkituro ikkinnina, kuni baalunku manni dandaannore diꞌꞌikkino.
12 Korkaatuno, mureeyye ikkite ilantinori no; qoleno mannu qaare mureeyye assinori no; gordu Gashshootira yite insaneeto mureeyye assitinorino no. Konne coye adha dandaannohu heeꞌriro adhona.”
13 Hakkiinni Yesuusi anga aanaho woransaranna* huuccansara shiimmaadda qaaqquulle isiwa abbitu; rosaanosi kayinni uffunsa.
14 Ikkollana Yesuusi togo yii: “Qaaqquulle agurre; anewa daggannota hooltinoonte; gordu Gashshooti insa gedee mannihona.”
15 Isino angasi aanansa worihu* gedensaanni hakkiinni agure haꞌri.
16 Hakkiinni mittu wedellichi isiwa daye, “Rosiisaancho, hegere heeshsho afiꞌrate danchare maa assa hasiissannoe?” yiisi.
17 Isino togo yiisi: “Danchuri daafira ane mayira xaꞌmattoe? Danchu Magano callaho. Hakko daafira, hegere heeshsho afiꞌra hasiꞌrittoro woꞌmanka woyite Maganu hajajo agadhi.”
18 Wedellichuno, “Hiittenne hajajo?” yiisi. Yesuusino togo yii: “Shitooti, soorritooti, moortooti, kaphu naqaashshe ikkitooti,
19 annakkinna amakki ayirrisi, olliichokkino* umikki gede assite baxi.”
20 Wedellichuno, “Tini hajajo baala wonanni agadhe noommote; ikkina xeinoeri maati?” yiisi.
21 Yesuusino togo yiisi: “Guuta* ikka hasiꞌrittoro hadhe noohere hirte woxe buxanete uyi; iima jiro afiꞌrattona; hakkiinni dagge haꞌrunsie.”
22 Wedellichu konne coye macciishshiti, lowo jiro noosi daafira dadillanni haꞌri.
23 Hakkiinni Yesuusi rosaanosira togo yiinsa: “Halaale yeemmoꞌnena, dureessu manchira gordu Gashshoote ea lowo geeshsha qarraho.
24 Xaano lede kuleemmoꞌnena, dureessu manchi Maganu Gashshoote eantenni gaalu marfete xullo giddoonni lulluqqa roore shotate.”
25 Rosaanosi tenne macciishshite lowo geeshsha dhagge assidhe, “Hatto ikkiro ayi gatannoyya?” yitu.
26 Yesuusi insa seekke laꞌꞌanni togo yiinsa: “Kuni mannaho dandaamannokkireeti; Maganoho kayinni baalunku coyi dandaamanno.”
27 Hakkiinni Pheexiroosi qole togo yii: “Kuneeti ninke baalankare agurre hoodekki haꞌnanni heeꞌnoommo; afiꞌneemmori maatiyya?”
28 Yesuusino togo yiinsa: “Halaale yeemmoꞌnena, baalunku coyi haarooꞌmanno yannara,* manchi Beetti ayirrado zuufaanesira ofollanno woyite kiꞌne ane haꞌrunsitinoonniri 12 zuufaanera ofoltine 12nte Israeelete gaꞌrera yoo yitinanni.
29 Qoleno ane suꞌmira yee minna woy labballo roduuwa woy meya roduuwa woy anna woy ama woy ooso woy baatto agurinohu baalu xibbe ero adhanno; hegere heeshshono ragiꞌranno.
30 “Ikkollana lowohu albiidi manni gedensiidiha, gedensiidihu kayinni albiidiha ikkanno.
Lekkaalliidi Qaagiishshuwa
^ Noo gedeenni tirriro, “qaꞌmiꞌranno.”
^ Girikete Afiinni, poorniya. Qaallate Tiro lai.
^ Woy “maassiꞌransaranna.”
^ Woy “maassiꞌrinsahu.”
^ “Olliicho” yine tirroonnihu Girikete Afii qaali, qachu manna calla ikkikkinni manna baalano xawisara dandaanno.
^ Woy “woꞌma.”
^ Woy “galagale kalaqamanno yannara.”
