Maatewoosi Wongeella 25:1-46
25 “Qoleno gordu Gashshooti, idayicho haaꞌrara caabbichonsa adhe fulinori tonne seemo gedeeti.
2 Insa giddo onte gowwootaho, onte kayinni busulootaho.*
3 Gowwootu caabbichonsa adhinoha ikkirono, gooffuro wodhanno zayite* diadhino;
4 busulootu kayinni zayite uduunnichoho wodhe caabbichinsa ledo adhe no.
5 Idayichu keeshshita baalunku mugiseennansa goxe bai.
6 Hashshu taalootira mannu, ‘Idayichu dayinona fultine haadhe!’ yaanni canci.
7 Hakkiinni tonnenti seemo kae caabbichonsa biddi assiꞌri.
8 Gowwootu busuloota, ‘Caabbichinke xoaraatina zayiteꞌne aaninni shiima uyiyyenke’ yitu.
9 Busulootuno togo yite qoltu: ‘Uyinummoꞌnero ninkerano kiꞌnerano ikka hooggara dandiitanno daafira, hadhine hiranno manniwiinni hidhe.’
10 Hidhitara hadhe heedheenna, idayichu dayi. Qixxaawe noo seemooti isi ledo sargete jila ei; waalchono cunfi.
11 Hakkunni gedensaanni gatino seemooti daye ‘Mooticha, Mooticha, faninke!’ yii.
12 Isino qole, ‘Halaale kuleemmoꞌnena, ani diegennoommoꞌne’ yiinsa.
13 “Konnira, barranna saate affinoonnikki daafira, woꞌmanka woyite baqqi yitine agadhe.
14 “Qoleno gordu Gashshooti, borojjootasi woshshe jajjasi insara hadara wodhe wole gobba haꞌrara kaino manchi gedeeti.
15 Kuni manchi mittu mittunkura dandoosi garinni mittoho onte taalaante,* mittoho lame, mittoho kayinni mitte oye wole gobba haꞌri.
16 Onte taalaante adhihu bayichonkonni haꞌre daddale wole onte taalaante tirfi.
17 Lame taalaante adhihuno wole lame taalaante tirfi.
18 Mitte taalaante calla adhi borojjichi kayinni, haꞌre mootichisi woxe* baatto ume waami.
19 “Lowo yanna gedensaanni hakko borojjooti mootichi daye insawiinni woxesi gamba assiꞌri.
20 Onte taalaante adhino borojjichi wole onte taalaante lede haaꞌre shiqe togo yii: ‘Mooticha, ati onte taalaante oottoe; kuneeti ani tirfise onte taalaante lede abboommo.’
21 Mootichisino togo yiisi: ‘Hashshu worbaꞌya! Ati danchahonna ammanamootto borojjichooti! Shiimu coyira ammanamoottona, lowo coyira shoomeemmohe. Mootichikki ledo hagiidhi.’
22 Hakkiinni lame taalaante adhino borojjichi daye togo yii: ‘Mooticha, ati lame taalaante oottoe; kuneeti ani tirfise lame taalaante ledoommo.’
23 Mootichisino togo yiisi: ‘Hashshu worbaꞌya! Ati danchahonna ammanamootto borojjichooti! Shiimu coyira ammanamoottona, lowo coyira shoomeemmohe. Mootichikki ledo hagiidhi.’
24 “Jeefote, mitte taalaante adhino borojjichi daye togo yii: ‘Mooticha, ati wixiꞌroottokkiha mixxattohanna loosiꞌroottokkiha gamba assiꞌrattoha kaajjado mancho ikkoottota afoommo.
25 Konnira waajjoommo daafira haꞌre taalaantekki baattote giddo waamoommo. Woxikki kuneeti.’
26 Mootichisino qole togo yiisi: ‘Ati bushunna ceeꞌmaleessu borojjichi, ane wixiꞌrinokkiha mixxannohonna loosiꞌrinokkiha gamba assiꞌrannoho yiittoena,
27 dayemmo woyite qallonte ledo adheemmo gede woxeꞌya* qalamannowa mayira wora giwittoyya?
28 “‘Konnira taalaante isiwiinni haadhine tonne taalaante noohura uyiyye.
29 Korkaatuno noosihura baalaho lendannisi; woꞌmeno duꞌnamannosi. Noosikkihura baalaho kayinni hakkonne noosinka haaꞌne hoollanni.
30 Konne tidhinokki borojjicho fushshitine gobba tunsote tugge. Hakkiicho wiꞌlona, hinkono gaꞌmiꞌrona.’
31 “Manchi Beetti sokkaasinesi ledo ayirrinyisinni daanno woyite, ayirrado zuufaanesira ofollanno.
32 Allaalaanchu geꞌreewo meuwiinni badannonte gede, isino manna lame gaamo asse badanno.
33 Geꞌreewo qiniitesiinni, meꞌꞌe kayinni gurasiinni qolanno.
34 “Hakkiinni Moote qiniitesiinni noore togo yaanno: ‘Kiꞌne Anniꞌya maassiꞌrinoꞌneri amme, alame xintantuhunni* kayise qixxaawinoꞌneha gordu Gashshoote ragidhe.
35 Korkaatuno hudiꞌreenna itissinoonnie; gooꞌreenna hayikkissinoonnie. Wosinimma dayenna wosinsitinoonnie;
36 kalleenna* uddisiissinoonnie. Dhiwameenna towaattinoonnie. Usurameenna xaꞌmitinoonnie.’
37 Hakkiinni keeraano togo yite qoltannosi: ‘Mooticha, hudiꞌroottoha mama anfe itinsummohe? Woy gooꞌroottoha mama anfe hayikkinsummohe?
38 Wosinimma dayottoha mama anfe wosinsiꞌnummohe? Woy kalloottoha mama anfe uddisiinsummohe?
39 Dhiwamoottoha mama anfe laꞌnummohe? Woy usuramoottoha mama anfe xaꞌminummohe?’
40 Mooteno qole togo yaannonsa: ‘Halaale yeemmoꞌnena, kuri baalunkunni ajjino roduuwiꞌya giddo mittoho assitinoonnihu anera assitinoonnihu gedeeti.’
41 “Hakkiinni gurasiinni noore togo yaanno: ‘Kiꞌne rumantinoonniri anewiinni faffe; Daawuloosiranna sokkaasinesira qixxeessinoonnita hegere giira eꞌe.
42 Korkaatuno hudiꞌreenna diꞌꞌitissinoonnie; gooꞌreenna dihayikkissinoonnie.
43 Wosinimma dayeenna diwosinsitinoonnie; kalleenna diuddisiissinoonnie; dhiwameenna dilaꞌinoonnie; usurameenna dixaꞌmitinoonnie.’
44 Insano qolte togo yitannosi: ‘Mooticha, hudidheenna woy goodheenna woy wosinimma daggeenna woy kalliteenna woy dhiwanteenna woy usuranteenna mama anfe kaaꞌla hoongummohe?’
45 Hakkiinni isi togo yee qolannonsa: ‘Halaale yeemmoꞌnena, kuri baalunkunni ajjinori giddo mittoho assitinikki gattinoonnihu, anera assitinikki gattinoonnihu gedeeti.’
46 Kuri hegere baowa hadhanno;* keeraano kayinni hegere heeshshowa hadhanno.”
Lekkaalliidi Qaagiishshuwa
^ Woy “hayyootaho, wodanaammaho.”
^ Hundi waro xawisiꞌrate horoonsiꞌnannite ejersu zayiteeti.
^ Mitte Girikete taalaante 20.4 kg ikkitanno. Guwuursha B14 lai.
^ Noo gedeenni tirriro, “birra.” Birra yinanni siwiila tumme seekkinoonni womaashshaati.
^ Noo gedeenni tirriro, “birraꞌya.”
^ Addaaminna Heewani ooso leellishshannote.
^ Woy “gari uddano hoogeenna.”
^ Noo gedeenni tirriro, “murantanno, gondolchantanno.” Heeshshotewiinni murantannota leellishshanno.
