Maatewoosi Wongeella 16:1-28
16 Hakkiinni Farisootunna Saduqootu isiwa daggu; jiffe laꞌasira yite gordunni malaate leellishansara xaꞌmitu.
2 Isino togo yee qolinsa: “Hawarranno woyite ‘Gordu duuꞌmino daafira birrichisharaati’ yitinanni;
3 soodo qole ‘Gordu duuꞌmirono gomichu noo daafira techo ayyare qiiddanno, xeenano gananno’ yitinanni. Gordo laꞌine diilallote gara afa dandiitinanni; diru malaati tiro kayinni afa didandiitinanni.
4 Bushanna foora* ilama woꞌmanka woyite malaate laꞌꞌa hasidhanno; ikkollana Yoonaasi malaate agurranna wole malaate dileellinshanninsa.” Hakkiinni Yesuusi insa hakko agure haꞌri.
5 Rosaanosi baara tayisse widoonni fultu; hakkawoyite insa daabbo adhitukkinni habbe hadhino.
6 Yesuusi togo yiinsa: “Farisootunna Saduqootu irsho qorophe.”
7 Konnira insa insanaawa, “Togo yiinonkehu daabbo adhinoommokki daafiraati” yitu.
8 Yesuusi tenne afe togo yii: “Kiꞌne ammana xeꞌinoꞌneri, daabbo adhinoommokki daafiraati yitine kiꞌne kiꞌnewa mayira hasaabbinanni?
9 Xaano coyi dileellinoꞌne? Onte daabbo 5,000 manni iteenna gatinoha meꞌꞌe gimboola gamba assitiniro diqaagginanni?
10 Woy lamala daabbo 4,000 manni iteenna gatinoha meꞌꞌe jajjabba gimboola gamba assitiniro diqaagginanni?
11 Kulanni noommoꞌnehu daabbote daafira ikkinokkita hiitto huwata hoogginanni? Maahoyyena Farisootunna Saduqootu irsho qorophe.”
12 Hakkiinni qorophe yiinonsahu daabbote irsho ikkikkinni Farisootunna Saduqootu roso ikkinoti leeltunsa.
13 Yesuusi, Filiphoosi Qiisaariya yinanni qooxeessa dayi yannara rosaanosi “Mannu manchi Beetto ayeti yaanno?” yee xaꞌminsa.
14 Insano “Mitu Cuuaancho Yohaannisiiti, mitu Eeliyaasiiti, mitu kayinni Ermiyaasiiti woy masaalaanote giddonni mittoho yaanno” yitu.
15 Isino “Kiꞌnena, ane ayeti yitinannie?” yee xaꞌminsa.
16 Simooni Pheexiroosi, “Ati heeshshote Magani Beetto Kiristoosiiti” yee qoli.
17 Yesuusino togo yee qolisi: “Yoonaasi beetto Simooni, ati baꞌraaꞌroottoho; korkaatuno tenne xawisinohehu maalanna mundee ikkikkinni* iima heeꞌranno Annaꞌyaati.
18 Qoleno yeemmohena, ati Pheexiroosiiti; konni kinchi aana songoꞌya miꞌneemmo; Waammate* waalchuwano diqeeltannose.
19 Atera gordu Gashshooti makafachuwa eemmohe; uulla usurattohu baalu balaxe gordoho usuraminoha ikkanno; uulla tirattohu baaluno balaxe gordoho tidhaminoha ikkanno.”
20 Hakkiinni rosaanosi, isi Kiristoosa ikkinota mittohono kultannokki gede seekke hajajinsa.
21 Hatte yannanni kayise Yesuusi, Yerusaalame haꞌra hasiissannosita, hattono cimeeyye, kakkalaanote roorrootinna borreessaano lowo geeshsha qarrissannositanna reyannota, qoleno sayikki barra kaꞌꞌannota rosaanosira kulinsa.
22 Hatte yannara Pheexiroosi Yesuusa bade qacce fushshe, “Mooticha, ateneeto togoonta gadadissooti; togoori horonta diꞌꞌiillannohe” yee seejjisi.
23 Yesuusi kayinni Pheexiroosira badhe wodhe togo yiisi: “Sheexaane,* badheꞌyaanni sai! Ati mannu hedo ikkinnina Maganu hedo hedattokki daafira guficho ikkoottoe.”
24 Hakkiinni Yesuusi rosaanosi togo yii: “Hoodeꞌya haꞌra hasiꞌrannohu aye manchino umosi kaado; qarru haqqasi* duqqe agurikkinni hoodeꞌya dayo.
25 Heeshshosi* gatisiꞌra hasiꞌrannohu baalu huꞌnanno; anera yee heeshshosi* huꞌnannohu baalu kayinni afiꞌranno.
26 Qoleno mittu manchi alame woꞌma isita assiꞌre heeshshosi* huꞌniro kayinni maa kaaꞌlitannosi? Woy mittu manchi heeshshosi* gatisiꞌrate maa aa dandaanno?
27 Manchi Beetti Annisi ayirrinyinni sokkaasinesi ledo daanno woyite, mittu mittunkura loosisi guma aanno.
28 Halaale yeemmoꞌnena, kowiicho uurritinori giddo mitu manchi Beetti Gashshootisinni daanna laꞌa geeshsha horonta reyo diqamassanno.”
Lekkaalliidi Qaagiishshuwa
^ Woy “Maganoho ammanantinokki ilama.”
^ Woy “tenne xawisinohehu manna ikkikkinni.”
^ Woy “Heedisi.” Mannu ooso baalate waamma xawisanno. Qaallate Tiro lai.
^ “Sheexaane” yaa hettisamaancho yaa ikkitino daafira, Yesuusi kowiicho Pheexiroosi “hettisamaancho” yaanni no.
^ Qaallate Tiro lai.
^ Woy “lubbosi.”
^ Woy “lubbosi.”
^ Woy “lubbosi.”
^ Woy “lubbosi.”
