Amootsi 9:1-15

  • Maganu yoonni gata didandiinanni (1-10)

  • Daawiti daasi kaꞌꞌanno (11-15)

9  Yihowa kakkalote dargira aleenni uurre nooha laummo; isino togo yii: “Heellichote umo gani; safono tenqe yitanno. Umonsa muri; gattinoreno bisetenni sheemmo. Xooqannohu xooqe difulanno; gate fulate woꞌnaalannohurano diqinaannosi.  2  Waammate* giddo maaxantara bale uꞌmiturono,Angaꞌya hakkiinni fushshitannonsa;Gordu iimira fulturono,Hakkiinni dirriseemmonsa.  3  Qermeloosi guunxo fulte maaxanturono,Hakkiichinni hase fushsheemmonsa. Baaraho woroonni saꞌe illeꞌyanni goꞌliturono,Hakko hamashshu qasannonsa gede hajajeemmo.  4  Diinnansa qafadde adhite hadhunsaro,Hakko bise hajajeemmo; biseno shitannonsa;Danchate ikkikkinni bushate illeꞌya insa aana woreemmo.  5  Woꞌmunkura Aliidi Mootichi, olantote Magani Yihowa gobba* kisannona;Iseno daaqqanno; giddose heeꞌrannohu baaluno dadillanno;Baatto gudisidhe Abbay gede kaꞌanno;Gibitsete noohu Abbay way gedeno worora dirritanno.  6  ‘Dirimasi gordoho seekkiꞌrannohu,Baattote aleenni mine* miꞌnannohu,Uullate dunara baaru waa isiwa woshshannohu,Suꞌmisi Yihowaati.’  7  ‘Israeelete manna, kiꞌne anera Itiyophiyu* ooso gede diꞌꞌikkitinoonni?’ yaanno Yihowa. ‘Ani Israeele Gibitsete gobbanni,Filisxeemoota Qerxeesinni, Sooriyu dagano Qiirinni difushshoommo?’  8  ‘Kuneeti Woꞌmunkura Aliidi Mootichi Yihowa ille cubbaataamo gashshoote laꞌanni no;Isi konne gashshoote baattote aaninni hunanno. Yaaqoobi mine kayinni gudise dihuneemmo’ yaanno Yihowa.  9  ‘Kuneeti ani hajajo oommo;Mittu manchi gide meemotenni meemiissannohu gede,Carete giddo mittu nafa uulla uwannokkinte gede,Israeelete mine daga baalate mereero shafeemmo. 10  “Bao diꞌꞌiillitannonke woy mulinkera didagganno” yitannoriManniꞌya mereero noo cubbaataammi baalu bisetenni reytanno.’ 11  ‘Hakko barra diigaminoha Daawiti daase* kayseemmo;Huxxaho noo xulluwa* beeshsheemmo;Diigaminoha haaroonseemmo;Albi yannahu gede asse gatamareemmo; 12  Konnira manniꞌya Edoomi gattinorennaSuꞌmiꞌyanni woshshantino daga baala ragiꞌranno’ yaanno tenne assannohu Yihowa. 13  ‘Kuneeti togo ikkanno barri daanno’ yaanno Yihowa;‘Midannohu mide kaikkinni hawuurannohu mare iillanno;Woyne huuncannohu huunce kaikkinni wixannohu mare iillanno;Ilaallatenni coommitanno woyne coccoꞌanno;Tulluwateno woyne lolakkanno.* 14  Dagaꞌya Israeelete giddonni qafadamino manna wirro gamba asseemmo;Insano baꞌino katamma wirro minte hakko heedhanno;Woynete kaashsho kaasidhe woyne agganno;Kaashsho kaasidhe laalono ittanno.’ 15  ‘Baattonsara kaaseemmonsa;Oommonsa gobbanni layinkitaDibuqqisantanno’ yaanno Maganikki Yihowa.”

Lekkaalliidi Qaagiishshuwa

^ Woy “Sioolete.” Mannu ooso baalate waamma xawisanno. Qaallate Tiro lai.
^ Woy “baatto.”
^ Woy “gumaycho; qalcho.”
^ Woy “Kushi.”
^ Woy “dunkaana.”
^ Woy “Xulluwansa.”
^ Noo gedeenni tirriro, “Tulluwa baalano daaqqanno.”

Tenne borrota koppete qoosso