Amootsi 7:1-17
7 Woꞌmunkura Aliidi Mootichi Yihowa tenne leellishinoe: Kuneeti gedensiidi wixi* muꞌri yannara, isi kanchafaru hoshsha soy. Kuni mootete saadara hayisso mindihu gedensaanni, gedeꞌne muꞌrino gideeti.
2 Kanchafaru hoshsha gobbate noo muꞌro baala itte gudduhu gedensaanni togo yuummo: “Woꞌmunkura Aliidi Mooticha Yihowa, ballo gatona yii! Yaaqoobi tenne hiitto ikke dandaanno?* Wolqiweelohona!”
3 Hakko daafira Yihowa konne coye wirro hedi.* Yihowa “Kuni coy diꞌꞌikkanno” yii.
4 Woꞌmunkura Aliidi Mootichi Yihowa tenne leellishinoe: Kuneeti Woꞌmunkura Aliidi Mootichi Yihowa giiratenni qorichishannota coyiꞌri. Giirano halaꞌlado diimete waa ittu; baattono gama wido ittu.
5 Hakkiinni togo yuummo: “Woꞌmunkura Aliidi Mooticha Yihowa, ballo tenne badhera qoli. Yaaqoobi tenne hiitto ikke dandaanno?* Wolqiweelohona!”
6 Hakko daafira Yihowa konne coye wirro hedi.* Woꞌmunkura Aliidi Mootichi Yihowa, “Kuni coyno diꞌꞌikkanno” yii.
7 Isi tenne leellishinoe: Kuneeti Yihowa tumbetenni huxxinoonni huxxi aana uurre no; angano tumbe adhe no.
8 Hakkiinni Yihowa, “Amootsi, may leellannohe?” yiie. Anino “Tumbe leeltannoe” yuummo. Yihowano togo yiie: “Kuneeti manniꞌya Israeelete mereero tumbe woreemmo. Xaate insa gatona diyeemmo.
9 Yisaaqiti gotti yitino darguwa diigantanno; Israeelihu qullaawu dargisino baꞌꞌanno; qoleno Iyyoorbiaami minira bise adhe dayemmo.”
10 Beetelete kakkalaanchi Ameesiyaasi Israeelete mootera Iyyoorbiaamira togo yee sokka soy: “Amootsi Israeelete mini mereero atera gano gananni no. Baattono isi qaale baala baydhe diaffanno.
11 Korkaatuno Amootsi, ‘Iyyoorbiaami bisetenni reyanno; Israeelino gobbasinni qafadame haꞌrasi horo digattanno’ yaanni no.”
12 Hakkiinni Ameesiyaasi Amootsi togo yii: “Koo ajuujaanchu, haꞌri; Yihudu gobba xooqi; sagale hakko hasiꞌri;* masaalono hakko coyiꞌri.
13 Xaate Beetelete masaalo coydhooti; Beetele mootete qullaawa dargaatinna mootimmate mineetina.”
14 Hakkiinni Amootsi Ameesiyaasira togo yee qoli: “Ani masaalaancho woy masaalaanchu beetto diꞌꞌikkoommo; saada allaaꞌle galoommohonna odahete haqqe towaateemmoho.*
15 Yihowa kayinni saada allaaꞌle noommowiinni haaꞌrie; Yihowano ‘Hadhe, manniꞌyara Israeelete masaalo coyiꞌri’ yiie.
16 Konnira xa Yihowa qaale macciishshi: ‘Ati “Israeelete masaalo coydhooti; Yisaaqi mineno sabbakkooti” yootto.
17 Hakko daafira Yihowa togo yaanno: “Galtekki katamu giddo foortannota* ikkitanno; labballi oosokkinna seennikki bisetenni reyanno. Baattokkino siiwotenni bikkine beenkanni; ati umikki battaabbino gobbara reyatto; Israeelino gobbasinni qafadame haꞌrasi horo digattanno.”’”
Lekkaalliidi Qaagiishshuwa
^ Arfaasunna Ammajje aganira winxanni wixaati.
^ Noo gedeenni tirriro, “hiitto ikke kaꞌꞌanno?”
^ Woy “gaabbi.”
^ Noo gedeenni tirriro, “hiitto ikke kaꞌꞌanno?”
^ Woy “gaabbi.”
^ Noo gedeenni tirriro, “daabbo hakko iti.”
^ Woy “odahete laalo qaseemmoho.”
^ Kowiicho kulloonni mancho woxeho yite foortannote.
