Ku itariki ya 9 Gashyantare 2025, hari porogaramu yihariye yabereye ku biro by’ishami bya Nijeriya biri mu gace ka Igieduma. Iyo porogaramu yitabiriwe n’abantu bagera ku 1.143 hamwe n’abandi bayikurikiye bakoresheje ikoranabuhanga rya videwo bagera ku 579.436 bari ku Mazu y’Ubwami n’Amazu y’Amakoraniro, mu duce dutandukanye tw’icyo gihugu.

Muri iyo porogaramu, umuvandimwe Samuel Olanrewaju wo muri Komite y’Ibiro by’Ishami bya Nijeriya yatangaje ko hasohotse Bibiliya—Ubutumwa bwiza bwanditswe na Matayo hamwe n’ivanjili ya Mariko mu rurimi rw’Abuwa, Ikigokana, Igihawusa, Igikana n’Icyope. Abari bakurikiye iyo porogaramu bahawe Bibiliya icapye y’igitabo cya Matayo buri wese mu rurimi rwe. Nanone hasohotse ibitabo bitandukanye byo mu Byanditswe by’Igiheburayo mu Gipijini cyo muri Afurika y’Iburengerazuba no mu Kiwurobo. Ibyo bitabo byose byasohotse byahise bishyirwa ku rubuga rwa jw.org no kuri porogaramu ya JW Library ku buryo umuntu yashoboraga guhita abivanaho.

Muri Nijeriya hari abantu barenga miliyoni 100 bavuga izo ndimi uko ari zirindwi, harimo n’abavandimwe na bashiki bacu bagera ku 95.000. Abo bavandimwe bacu bishimiye cyane kubona Bibiliya yumvikana neza bashobora gukoresha biyigisha, bari mu materaniro no mu murimo wo kubwiriza.