Pala o Matei 9:1-38

  • O Isus sastiarel ieche manușes cai ci daștilas te phirel (1-8)

  • O Isus acharel le Mateios te jial pala leste (9-13)

  • Pușimata anda o posto (14-17)

  • I șei le Iairoschi; iech jiuvli șiol o vast po-l thava catar o hureaimos le Isusosco (18-26)

  • O Isus sastiarel duie manușen corre hai ieches cai ci daștil te del duma (27-34)

  • „I recolta cai trebul chidini si bari, tha codola cai cheren buchi si țâra” (35-38)

9  Atunci o Isus gălea opre andi barca, nachlea pi coaver rig le paieschi hai gălea ande pesco foro. 2  Tha dichta că chichiva manușa andine leste ieche manușes pi targa, cai ci daștilas te phirel. Cana dichlea lengo pachiamos, o Isus phendea codolesche cai ci daștilas te phirel: „Mânro șiavo, na dara! Che păcatea sile iertime!”. 3  Atunci chichiva sicaitori la Legeache* phenenas ande pende: „Cado manuș cușel* le Devles”. 4  O Isus, cai prinjianelas lenghe gânduri, phendea: „Sostar gândin buchia nasul ande tumaro ilo? 5  So si mai ușoro? Te phenes: «Che păcatea sile iertime» sau te phenes: «Vazde tut opre hai phir»? 6  Tha te jianen că le Șiaves le manușesco siles zuralimos pi phuv te iertil le păcatea”. Pala codoia risailea caring o manuș cai ci daștilas te phirel hai phendea lesche: „Vazde tut opre, le chi targa hai jia chăre!”. 7  Hai vo vazdea-pe opre hai gălea chăre. 8  Cana dichle cadai buchi, le manușa daraile, hai astarde te așaren le Devles, codo cai dea le manușen iech zuralimos cadea de baro. 9  Pala so tiliardea de othar, o Isus dichlea ieche manușes cai bușiolas Matei, sar beșelas ando than cai pochinenas-pe le love andal taxe hai phendea lesche: „Av pala mande!”. Atunci o Matei vazdea-pe hai gălea pala leste. 10  Mai târzio, cana o Isus halas ca i meseili ando chăr, avile but jene cai chidenas le love* hai vi manușa păcătoși hai astarde te han lesa hai lesche discipolența. 11  Tha, cana dichle cadaia, le farisei* pușle lesche discipolen: „Sostar hal tumaro sicaitoro codolența cai chiden le love hai le manușența păcătoși?”. 12  Cana așundea-len, vo phendea lenghe: „Na le manușen sasteveste trebul-len doctoro, tha codolen nasfale. 13  Cadea că jian hai sichion so si: «Mila camav, na jertfe!». Anda codoia că ci avilem te acharav codolen orta, tha codolen păcătoși”. 14  Atunci le discipoli le Ioanosche avile leste hai pușle-les: „Amen hai le fariseien si amen o obiceio te na has chanci caște încăras posto, tha che discipoli sostar ci cheren cadaia?”. 15  O Isus phendea lenghe: „Si le amalen le jiamutresche* sostar te roven chichi timpo o jiamutro silo lența? Tha va avena ghiesa cana o jiamutro va avela lino lendar hai atunci ci va mai hana chanci. 16  Chonic ci suvel ca iech hureaimos purano iech nevo cotor cai ci sas-lo șiuto ando pai, anda codoia că o nevo cotor țârdel o purano hureaimos hai o șinimos cărdiol vi mai baro. 17  Nici na șiol-pe mol nevi ande purane burdufuri*. Dacă cherelas-pe cadea, le burdufuri pharavenas-pe, i mol șiordiolas avri hai le burdufuri ci mai avenas lașe chancesche. I nevi mol șiol-pe ande burdufuri neve hai cadea încăren-pe mișto vi le dui”. 18  Cana phenelas cadala buchia, dichta că iech conducătoro pașilea lestar, banghilea tele angla leste hai phendea: „Mânri șeiorri daștil-pe că mulea deja, tha av, șiu chio vast opral late hai va avela pale viațate”. 19  Atunci o Isus vazdea-pe opre hai, ande iech than pesche discipolența, gălea pala leste. 20  Hai dichta că iech jiuvli cai de 12 bărșa sas nasfali hai hasarelas rat, avilea pala lesco dumo* hai șiutea o vast po thava lesche hureaimasco*, 21  că voi phenelas ande pesco ilo: „Dacă șioav o vast numai pe lesco hureaimos, va avela te avav sastiardi”. 22  O Isus risailea hai, cana dichlea-la, phendea: „Na dara, mânri șei! Chio pachiamos sastiardea tut”. Hai pe thaneste i jiuvli sastilea. 23  Cana arăslea co chăr le conducătorosco hai dichlea codolen cai ghilabenas ghilea duchache* hai le bute manușen cai rovenas, 24  o Isus phendea lenghe: „Înclen avri* catar, că i șeiorri ci mulea, numai sovel!”. Atunci von astarde te asan lestar. 25  Pala so savore încliste avri, vo gălea andre, lea o vast la șeiorraco hai voi uștilea opre. 26  Cadea că le manușa anda sea le foruria hai gava de pașa codo than așunde so cărdea o Isus. 27  Cana tiliarelas de othar, dui corre manușa jianas pala leste hai denas cingar: „Sicav mila caring amende, Șiavo le Davidosco!”. 28  Pala so gălea andre ande iech chăr, le corre manușa avile leste hai o Isus pușlea-len: „Pachian că daștiv te cherav cadai buchi?”. Von phende lesche: „Da, Raia”. 29  Atunci vo șiutea o vast pe lenghe iacha hai phendea: „Te cărdiol-pe pala tumaro pachiamos”. 30  Hai lenghe iacha pâtărdile. Pala codoia o Isus phendea lenghe: „Len sama te na jianel chonic anda cadaia”. 31  Tha, pala so găle avri, von dine duma anda leste ande sea codo than. 32  Cana von tiliarenas, dichta că chichiva manușa andine leste ieche murșes cai ci daștilas te del duma, hai ande savo sas iech beng. 33  Pala so încaladea avri le benghes anda leste, cado murș astardea te del duma. Le manușa așile zurales uimime hai phende: „Iech buchi sar cadaia ci mai sas dichli niciechdata ando Israelo!”. 34  Tha le farisei phenenas: „O conducătoro le benghengo del-les zuralimos te încalavel avri benga”. 35  Hai o Isus phirdea ande sea le foruria hai gava, hai sicavelas le manușen ande lenghe sinagogi*, phenelas i vestea lași anda o Regato hai sastiarelas le manușen orisave nasfalimastar. 36  Cana dichlea le bute manușen, cărdilea lesche mila lendar, anda codoia că sas-le duchade* hai șiudine anda iech than ande aver sar le bacrea cai na-i len păstoro. 37  Hai vo phendea pesche discipolenghe: „Da, i recolta cai trebul chidini si bari, tha codola cai cheren buchi si țâra. 38  Anda codoia, manghen le Raiestar saveschi si i phuv te bișialel manușen caște avel chidini i recolta”.

Note de subsol

^ Lit. „scribi”.
^ Lit. „blasfemia”. Referil-pe ca le dumes nasul sau jiungale phende caring o Del sau le buchia sfânto.
^ Lit. „le jene cai chidenas le taxe”. Cadala manușa chidenas love anda le taxe șiute le guvernostar Romano; von sas-le urâme le coavere evreiendar.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Sau „mire”.
^ Cadala sas gone cărde andai morci le animalenghi cai încărelas-pe i mol. Dich o Dicționaro.
^ Sau „pala lesche zăia”.
^ Sau „franjuri”, „i partea de telal le hureaimaschi”.
^ Lit. „bașavenas co flauto ghilea de jale”.
^ Sau „Jian avri”.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Sau „jupuime”. Cadaia însemnolas că lenghi morci sas tele țârdini pa lende.

Le drepturi de autor anda cadai publicația