Pala o Matei 3:1-17
3 Ande codola ghiesa, o Ioan o Botezătorii avilea te phenel* o cuvânto le Devlesco ando șuco than andai Iudeea;
2 vo phenelas: „Sicaven că fal tumen nasul anda tumare păcatea*, anda codoia că o Regato le Devlesco* pașilea!”.
3 Mai but, vo si codo anda savo dea duma o profeto* Isaia cana phendea: „O glaso varecasco del cingar ando șuco than: «Lașiaren o drom le Iehovasco! Cheren orta lesche droma!»”.
4 O Ioan phiravelas iech hureaimos cărdo anda bal cămilaco hai po mașcar sas-les iech haravli* andai morci; vo halas lăcuste* hai mierea vășeschi*.
5 Le manușa anda o Ierusalimo, anda sea i Iudeea hai anda sea o than de pașa o Iordano jianas co Ioan.
6 Von cherenas prinjiande penghe păcatea hai vo bolelas-len* ando pai le Iordanosco.
7 Cana dichlea că but mașcar le farisei* hai le saduchei* avenas code cai bolelas, vo phendea lenghe: „Tumen cai san sar le sapa cai dandaren*, con phendea tumenghe te nașen la holiatar cai va avela?
8 Mai anglal, cheren buchia cai sicaven că fal tumen nasul anda tumare păcatea.
9 Na den tumen bare că tumaro dad si o Avraam. Că me phenav tumenghe că o Del daștil te vazdel șiave le Avraamosche anda cadala barra.
10 O tover silo deja ca i rădăcina le caștenghi. Orisavo cașt cai ci del lașe fructea va avela șindo hai șiudino andi iag.
11 Anda codoia că fal tumen nasul anda tumare păcatea, me bolav tumen paiesa, tha codo cai avel pala mande si mai zuralo mandar hai me ci som lașio nici te încalavav lesche sandale andal pânre. Vo va bolela tumen le spiritosa sfânto le Devlesco* hai iagasa.
12 Les siles ando vast iech lopata ghiveschi hai ujiarel mișto peschi phuv; va chidela o ghiv ande pesco hambaro, tha le suluma* va thabarela-len ande iech iag cai ci daștil te avel mudardi”.
13 Atunci o Isus avilea anda Galileea co Iordano caște avel boldo le Ioanostar.
14 Tha cado camlea te așiavel-les hai phendea: „Me som codo cai trebul te avel boldo tutar, hai tu aves mande?”.
15 O Isus phendea lesche: „Mech cadea acana, că cadea si mișto te cheras, caște pheras sea so si orta”. Atunci vo ci mai camlea te așiavel-les.
16 Pala so sas-lo boldo, o Isus vazdea-pe anda o pai. Hai dichta că le ceruri pâtărdile hai vo dichlea sar o spirito sfânto le Devlesco mechlea-pe tele sar iech porumbelo hai avilea pe leste.
17 Vi mai but, andal ceruri așundea-pe iech glaso cai phendea: „Cado si mânro Șiavo, codo iubime, cai bucuril mânro ilo”.
Note de subsol
^ Lit. „te predichil”.
^ Sau „căin tumen”, „sicaven căința”. Dich o Dicționaro.
^ Sau „O Regato le cerurengo”. Cado si o Raimos sau o Guverno le Devlesco cai rail andal ceruri.
^ Dich o Dicționaro.
^ Sau „bricinari”.
^ Dich o Dicționaro.
^ Sau „avghin sălbatico”.
^ Dich o Dicționaro.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Le saduchei sas iech secta iudaico cai ci pachianas ando jiuvindimos hai andel îngeri.
^ Sau „șiave le sapenghe cai dandaren”.
^ Sau „o zuralimos le Devlesco”. Dich o Dicționaro.
^ Lit. „pleava”. Cadaia si i coaja cai pachiarel i cuchin le ghiveschi.
