Pala o Matei 16:1-28
16 Cade le farisei* hai le saduchei* pașile lestar hai, caște zumaven-les, mangle lestar te sicavel lenghe iech semno anda o cerii.
2 Vo phendea lenghe: „Cana mechel-pe i riat, tumen phenen: «Va avela vremea lași, anda codoia că o cerii si lolo sar i iag»,
3 hai de teharin phenen: «Aghies i vremea ci va avela lași hai va dela o brâșând, anda codoia că o cerii si lolo sar i iag, hai si vi but nori». Tumen jianen te phenen sar va avela i vremea cana dichen o cerii, tha ci daștin te hachiaren le buchia cai întâmplon-pe acana.
4 Le manușa nasul cai train ande cadala ghiesa hai cai mechle le Devles* roden sea o timpo iech semno, tha o corcoro semno cai va dichena-les si o semno le Ionasco”. Pala codoia tiliardea hai mechlea-len code.
5 Le discipoli nachle pi coaver rig le paieschi, tha bâstărde te len manro.
6 O Isus phendea lenghe: „Pâtren tumare iacha hai ferin tumen la drojdiatar le fariseienghi hai le saducheienghi!”.
7 Atunci von astarde te den duma mașcar pende hai phende: „Ci leam amența manro”.
8 O Isus, cai prinjianelas cadai buchi, phendea lenghe: „Sostar den duma mașcar tumende că na-i tumen manro, manușa cai si tumen țâra pachiamos?
9 Nici acana ci hachiaren? Bâstărdean anda le panji manre anda save hale 5 000 murșa hai chichi coșuri chidean?
10 Sau anda le efta manre anda save hale 4 000 murșa hai chichi coșuri bare chidean?
11 Sostar ci hachiaren că ci dem duma anda o manro? Ferin tumen la drojdiatar le fariseienghi hai le saducheienghi”.
12 Atunci hachiarde că phendea lenghe te ferin-pe na la drojdiatar le manreschi, tha le sicaimastar le fariseiengo hai le saducheiengo.
13 Cana avilea ando than andai Cezareea le Filiposchi, o Isus pușlea pesche discipolen: „Con phenen le manușa că si o Șiavo le manușesco?”.
14 Von phende: „Chichiva phenen o Ioan o Botezătorii; aver, o Ilie, hai aver, o Ieremia sau iech mașcar le profeți”.
15 Vo phendea lenghe: „Tha tumen con phenen că som?”.
16 O Simon Petru phendea lesche: „Tu san o Cristoso, o Șiavo le Devlesco jiuvindo!”.
17 Atunci o Isus phendea lesche: „Fericime san tu, Simon, o șiavo le Ionasco, anda codoia că na iech manuș cărdea tuche prinjiandi cadai buchi, tha mânro Dad, cai si andel ceruri.
18 Sa cadea, phenav tuche: Tu san o Petru hai pe cado barr* va avela te vazdav mânri congregația, hai le udara le Mormântosche* ci va peravena-la.
19 Va avela te dav tut le chei le Regatosche le Devlesco* hai sea so va avela te phandes pi phuv va avela deja phanglo ando cerii, hai sea so va avela te pâtres pi phuv va avela deja pâtărdo ando cerii”.
20 Pala codoia poruncisardea le discipolenghe te na phenen chanicasche că vo si o Cristoso.
21 Anda codo ghies, o Isus astardea te phenel pesche discipolenghe că vo trebul te jial ando Ierusalimo, te nachel prin but ducha anda i doș le phurenghi, le bare rașaienghi, le sicaitorenghi la Legeache* hai te avel mudardo, hai o trinto ghies te avel uștiado andal mule*.
22 Atunci o Petru lea-les de iech rig hai astardea te ortosarel-les hai phendea: „Av lașio tusa, Raia! Ci va avela te naches niciechdata prin cadala buchia”.
23 Tha o Isus risailea hai phendea caring o Petru: „Duriar tut mandar, Satan! San iech barr cai cherel man te hasarav mânro pachiamos, anda codoia că gândis sar le manușa, na sar o Del”.
24 Atunci o Isus phendea pesche discipolenghe: „Dacă varecon camel te avel pala mande, te na mai trail anda peste, tha te lel pesco stâlpo* hai te avel vi mai dur pala mande.
25 Că con camel te salvil peschi viața va hasarela-la, hai con hasarel peschi viața anda mande va arachela-la.
26 Cadea că, so miștimos si ieche manușes dacă del peschi zor te avel-les sea i lumea tha hasarel peschi viața? Sau so daștil te del iech manuș ando than pesca viațaco?
27 Că o Șiavo le manușesco va avela ando zuralimos* pesche Dadesco pesche îngerența hai atunci va pochinela fiesavesche pala lesco phiraimos.
28 Ciaces phenav tumenghe că chichiva mașcar codola cai beșen cade ci va jianena so si o merimos ji cana ci va dichena mai anglal le Șiaves le manușesco sar avel ande pesco Regato”.
Note de subsol
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Le saduchei sas iech secta iudaico cai ci pachianas ando jiuvindimos hai andel îngeri.
^ Lit. „iech generația adultero”.
^ Sau „stânca”.
^ Sau „Hades”. Dich o Dicționaro.
^ Sau „O Regato le cerurengo”. Cado si o Raimos sau o Guverno le Devlesco cai rail andal ceruri.
^ Lit. „scribi”.
^ Sau „jiuvindime”.
^ Cade o stâlpo referil-pe ca le pharimata hai ducha cai anel-len o fapto te aves iech discipolo le Isusosco. Dich o Dicționaro.
^ Lit. „gloria”.
