Pala o Matei 4:1-25
4 Atunci o spirito sfânto le Devlesco* îngărdea le Isusos ando șuco than, cai sas-lo zumado le Benghestar.
2 Pala so încărdea posto hai ci halea chanci 40 ghiesa hai 40 ratia, lea-les i boch.
3 Atunci avilea leste o Athaitorii hai phendea lesche: „Dacă san iech șiavo le Devlesco, phen cadale barrenghe te cărdion manre”.
4 Tha vo phendea lesche parpale: „Si scriime: «O manuș te na trail numai manresa, tha orisave cuvântosa cai înclel anda o mui le Iehovasco»”.
5 Pala codoia, o Beng îngărdea-les pesa ando foro sfânto, șiutea-les po mai ucio than anda o templo*
6 hai phendea lesche: „Dacă san iech șiavo le Devlesco, șiude tut tele, anda codoia că si scriime: «Vo va dela porunca pesche îngerenghe anda tute» hai «Von va phiravena tut pe lenghe vast caște na des tut dab le pânresa ande vroiech barr»”.
7 O Isus phendea lesche: „Tha si scriime vi cadaia: «Te na șios co zumaimos le Iehovas, chio Del»”.
8 Pala codoia, o Beng îngărdea-les pesa pe iech plain zurales ucio hai sicadea lesche sea le regatea la lumeache hai lengo barvalimos.
9 Hai phendea lesche: „Sea cadala buchia va avela te dav-len tuche dacă des cianga numai iech data angla mande hai anes manghe închinarea”.
10 Atunci o Isus phendea lesche: „Jiatar mandar, Satan! Anda codoia că si scriime: «Numai angla o Iehova, chio Del, te des cianga hai numai anda leste te cheres iech buchi sfânto»”.
11 Atunci o Beng tiliardea lestar hai dichta că avile chichiva îngeri hai astarde te len sama lestar.
12 Cana așundea că o Ioan sas-lo phandado, o Isus gălea andi Galileea.
13 Pala codoia tiliardea anda Nazareto hai gălea te beșel ando Capernaum, pașa i marea, andel thana le Zabulonosche hai le Neftaliosche,
14 caște pherel-pe so sas phendo prin o profeto* Isaia:
15 „O, tu Galileea, ande savi beșen manușa anda aver neamuri, anda o them le Zabulonosco hai anda o them le Neftaliosco, cai arachen-pe po drom de pașa i marea, pi coaver rig le Iordanoschi!
16 Le manușa cai beșenas ando tunearico dichle iech bari lumina, hai opral codola cai beșenas ando them cai si i ușial* le merimaschi vazdea-pe i lumina”.
17 Anda codo ghies, o Isus astardea te phenel savorenghe: „Sicaven că fal tumen nasul anda tumare păcatea*, că o Regato le Devlesco* pașilea!”.
18 Cana nachelas pașa i Marea Galileei, vo dichlea duie phralen sar șiudenas andi marea iech plasa caște astaren mașe, că cadaia sas lenghi buchi. Iech mașcar lende sas o Simon, cai phenel-pe lesche Petru, hai o coaver sas o Andrei, lesco phral.
19 Hai vo phendea lenghe: „Aven pala mande hai va astarena manușen cadea sar astaren mașe!”.
20 Pe thaneste, von mechle penghe plase andal mașe hai găle pala leste.
21 De othar, vo gălea mai dur hai dichlea avere duie phralen: o Iacov, o șiavo le Zebedeiosco, hai lesco phral, o Ioan. Von sas-le andi barca penghe dadesa, o Zebedei, hai lașiarenas penghe plase andal mașe. Hai vo achardea vi len te jian lesa.
22 Atunci von mechle pe thaneste i barca hai penghe dades hai găle pala leste.
23 Pala codoia, vo phirdea ande sea i Galileea, sicadea le manușen ande lenghe sinagogi*, phendea i vestea lași anda o Regato hai sastiardea le manușen sea lenghe nasfalimatandar.
24 I vestea anda leste așundea-pe andi sasti Siria. Hai anenas leste sea le manușen cai sas-len mai but nasfalimata hai bare ducha. Vo sastiarelas codolen cai sas-len benga, codolen cai sas-len epilepsia* hai codolen cai ci daștinas te phiren.
25 Cadea că, but manușa găle pala leste andai Galileea, anda o Decapole*, anda o Ierusalimo, andai Iudeea hai vi pa i coaver rig le Iordanoschi.
Note de subsol
^ Sau „o zuralimos le Devlesco”. Dich o Dicționaro.
^ Sau „parapeto le templosco”.
^ Dich o Dicționaro.
^ Sau „umbra”.
^ Sau „căin tumen”, „sicaven căința”. Dich o Dicționaro.
^ Sau „O Regato le cerurengo”. Cado si o Raimos sau o Guverno le Devlesco cai rail andal ceruri.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Si iech nasfalimos cai cherel le manușen te peren tele ca i phuv hai te avel-len crize.
^ Sau „le deș foruria”.
