Pala o Matei 13:1-58

  • LE PILDE ANDA O REGATO (1-52)

    • O manuș cai șiol semințea andi phuv (1-9)

    • Sostar dea duma o Isus andel pilde (10-17)

    • Sar trebul hachiardi i pilda le manușesa cai șiol semințea andi phuv (18-23)

    • O ghiv hai le burra (24-30)

    • I cuchin muștareschi hai i drojdia (31-33)

    • Cana o Isus dea duma andel pilde pherdea iech profeția (34, 35)

    • Sar trebul hachiardi i pilda anda o ghiv hai le burra (36-43)

    • O barvalimos garado hai i perla cai cherel but love (44-46)

    • I plasa andal mașe (47-50)

    • Barvalimata neve hai purane (51, 52)

  • Le manușa anda o than cai barilea o Isus ci pachian ande leste (53-58)

13  Ande codo ghies, o Isus gălea avri anda o chăr hai șiutea-pe te beșel pașa o pai la mareaco. 2  Hai chidine-pe pașa leste cadea de but manușa, că vo trebuisardea te jial opre ande iech barca. Vo beșlea tele ande late hai le coaver manușa așile po malo. 3  Atunci vo sicadea-len but buchia andel pilde*. Hai phendea: „Dichta că iech manuș gălea te șiol semințea andi phuv. 4  Cana șiudelas le semințea, chichiva arăsle te peren pașa o drom, hai avile le ciriclea hai hale-len. 5  Aver arăsle te peren ande iech than barralo hai astarde te barion sigo, anda codoia că code ci sas but phuv. 6  Tha, cana vazdea-pe o cham, cado thabardea-len hai șuchiardea-len, anda codoia că ci sas-len rădăcina. 7  Aver arăsle te peren mașcar le canră, tha le canră barile hai tasade-len. 8  Aver arăsle te peren pi phuv lași hai astarde te barion hai te den rodo: iech 100, aver 60 hai aver 30. 9  Cas si can te așunel!”. 10  Hai le discipoli avile hai phende lesche: „Sostar des duma lența andel pilde?”. 11  Vo phendea lenghe: „Tumenghe sas mechlo te hachiaren le buchia garade hai sfânto anda o Regato le Devlesco*, tha lenghe ci sas mechlo te hachiaren cadaia. 12  Că codoles cai siles va mai dela-pe lesche hai va avela-les vi mai but, tha codoles cai na-i les va lela-pe lestar vi so siles. 13  Anda codoia dav duma lența andel pilde; că, chiar cana dichen, dichen de ivea hai, chiar cana așunen, așunen de ivea hai ci hachiaren. 14  Hai ande lende pherdiol-pe i profeția le Isaiaschi cai phenel: «Va așunena, tha ci va hachiarena, va dichena, tha va avena sar le corre. 15  Că o ilo cadale manușengo arăslea te avel zuralo sar o barr hai von așunde le canența, tha cărde-pe cașuche, hai phandade penghe iacha, ca na varesar te dichen le iachența, te așunen le canența, te hachiaren le ilesa hai te risaren-pe hai me te sastiarav-len». 16  Cu sea cadala, fericime si tumare iacha anda codoia că dichen hai tumare can anda codoia că așunen. 17  Ciaces phenav tumenghe că but profeți hai manușa orta camle te dichen le buchia cai dichen-len tumen, tha ci dichle-len, hai te așunen le buchia cai așunen-len tumen, tha ci așunde-len. 18  Acana așunen so si i pilda anda o manuș cai șiol i sămânța andi phuv. 19  Cana varecon așunel o cuvânto anda o Regato, tha ci hachiarel-les, avel codo nasul hai ciorel i sămânța cai sas șiuti ande lesco ilo. Cadaia si i sămânța cai pelea pașa o drom. 20  Tha i sămânța cai pelea ando than barralo si codo cai așunel o cuvânto hai pachial-les sigo bucuriasa. 21  Cu sea cadala, na-i les rădăcina ande leste. Vo așel iech timpo, tha, cana avel iech pharimos sau varecon așel lesche contra anda codoia că așunel o cuvânto, hasarel sigo pesco pachiamos. 22  Tha i sămânța cai pelea mașcar le canră si codo cai așunel o cuvânto, tha le pharimata la viațache hai o athaimos le barvalimasco tasaven o cuvânto hai cheren-les te na del rodo. 23  Tha i sămânța cai pelea pi lași phuv si codo cai așunel o cuvânto, hachiarel-les hai del rodo, hai cherel iech 100, aver 60 hai aver 30”. 24  Vo sicadea lenghe iech aver pilda hai phendea: „O Regato le Devlesco si sar iech manuș cai șiutea lași sămânța ande peschi phuv. 25  Cana le manușa sovenas, avilea lesco dușmano hai șiutea burra* mașcar o ghiv hai tiliardea. 26  Cana o ghiv barilea hai dea rodo, astarde te dichion-pe vi le burra. 27  Le sclavi le chăresche avile hai pușle-les: «Raia, ci șiutean tu sămânța lași ande chi phuv? Atunci sostar si burra mașcar late?». 28  Vo phendea lenghe: «Iech manuș, iech dușmano cărdea cadaia». Hai le sclavi phende lesche: «Atunci cames te jias avri hai te chidas-len?». 29  Vo phendea: «Na, ca na varesar, cana chiden le burra, te țârden avri ande iech than lența vi i rădăcina le ghiveschi. 30  Mechen-len te barion ande iech than ji cana chidel-pe i recolta, hai atunci va avela te phenav codolenghe cai chiden i recolta: Chiden mai anglal le burra hai șion-len ande iech than caște den-len iag, pala codoia chiden o ghiv ande mânro hambaro»”. 31  Vo sicadea lenghe iech aver pilda hai phendea: „O Regato le Devlesco si cadea sar iech cuchin muștareschi* cai iech manuș lea-la hai șiutea-la ande peschi phuv. 32  Cadaia si i mai țâni mașcar sea le semințea, tha, pala so bariol, si i mai bari mașcar sea le plante andai bar hai cărdiol iech cașt, cadea că le ciriclea le cerosche aven hai beșen pe lesche ranica”. 33  Vo phendea lenghe aver pilda: „O Regato le Devlesco si sar iech drojdia cai iech jiuvli lea-la hai hamisardea-la ande deș kilogramea arro hai sea o aluato* phuchilea”. 34  O Isus phendea sea cadala buchia le manușenghe prin pilde. Si ciaces, vo ci delas duma bi te folosil pilde, 35  caște pherel-pe so sas phendo prin o profeto* cai phendea: „Va avela te pâtrav mânro mui hai te phenav pilde; va avela te sicavav le buchia cai sas garade de cana sas cărdi i lumea”. 36  Pala so dea drom le manușen, gălea andre ando chăr. Lesche discipoli avile leste hai phende: „Phen amenghe sar te hachiaras i pilda anda le burra cai barile andai phuv”. 37  Atunci vo phendea lenghe: „Codo cai șiol andi phuv i lași sămânța si o Șiavo le manușesco; 38  i phuv si i lumea; i lași sămânța si le șiave le Regatosche, hai le burra si le șiave codolesche nasul; 39  hai o dușmano cai șiutea mașcar o ghiv le burra si o Beng. O chidimos la recoltaco si o sfârșito cadala lumeaco*, hai codola cai chiden i recolta si le îngeri. 40  Cadea sar le burra sile chidine hai thabarde andi iag, sa cadea va avela vi o sfârșito cadala lumeaco. 41  O Șiavo le manușesco va bișialela pesche îngeren, hai cadala va chidena anda lesco Regato sea le buchia cai cheren averen te hasaren pengo pachiamos hai codolen cai cheren o nasulimos 42  hai va șiudena-len andi iag*. Code va rovena hai va izdrana lenghe danda daratar*. 43  Ande codo timpo, codola orta va strălucina sar o cham ando Regato lenghe Dadesco. Cas si can te așunel! 44  O Regato le Devlesco si sar iech barvalimos garado po câmpo. Iech manuș arachlea-les hai garadea-les pale, hai pala codoia, pherdo bucuria, gălea hai bichindea sea so sas-les hai chindea codo câmpo. 45  O Regato le Devlesco si sar iech manuș cai phirel te bichinel hai rodel cuci perle*. 46  Cana arachlea iech perla cai cherelas but love, gălea, bichindea sigo sea so sas-les hai chindea-la. 47  O Regato le Devlesco si vi sar iech plasa șiudini andi marea, cai astarel mașe de orisavo felo. 48  Cana pherdilea, codola cai astarenas mașe țârdine-la avri anda o pai, beșle tele, chidine le mașen cai sas-le lașe andel pirea, hai șiudine codolen cai ci sas-le lașe. 49  Sa cadea va avela o sfârșito cadala lumeaco. Le îngeri va înclena hai va dena rigate codolen nasul codolendar orta 50  hai va șiudena-len andi iag. Code va rovena hai va izdrana lenghe danda daratar. 51  Hachiardean sea cadala buchia?”. Von phende lesche: „Da”. 52  Atunci vo phendea lenghe: „Dacă cadea așen le buchia, te jianen că orisavo sicaitoro cai silo sicado te jianel sea so trebul anda o Regato le Devlesco si sar iech manuș, o rai ieche chăresco, cai lel avri anda pesco barvalimos buchia neve hai buchia purane”. 53  Pala so phendea sea cadala pilde, o Isus tiliardea de othar. 54  Hai, pala so arăslea ando than cai barilea, astardea te sicavel le manușen ande lenghi sinagoga*, hai von așenas uimime hai phenenas: „Catar si cadale manușes iech goghiaverimos sar cado hai catar siles o zuralimos te cherel cadala miracolea? 55  Na-i vo o șiavo le tâmplarosco? Ci bușiol leschi dei Maria, hai na-i lesche phrala o Iacov, o Iosif, o Simon hai o Iuda? 56  Hai lesche pheia ci beșen savore mașcar amende? Atunci sar daștil vo te phenel hai te cherel sea cadala buchia?”. 57  Hai ci pachianas ande leste. Tha o Isus phendea lenghe: „Le profetosche del-pe pachiv oricai, tha na vi ando than cai barilea hai ande lesco chăr”. 58  Hai vo ci cărdea niciech miracolo code, anda codoia că ci sas-len pachiamos.

Note de subsol

^ Sau „ilustrări”.
^ Sau „O Regato le cerurengo”. Cado si o Raimos sau o Guverno le Devlesco cai rail andal ceruri.
^ Sau „neghina”. Cadaia si iech planta cai si sar o ghiv tha sili otrăvitoro.
^ Sau „bobo muștaresco”.
^ Sau „humer”.
^ Lit. „thabardo bov”, „cuptorii iagaco”.
^ Cadai expresia sicavel i dar hai i holi cai caliarel lengo ilo.
^ Sau „bisorra”, „miriclea”.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.

Le drepturi de autor anda cadai publicația