Pala o Matei 1:1-25
1 Cado si o lil cai sicavel o neamo anda savo țârdel-pe o Isus Cristos*, o șiavo le Davidosco, o șiavo le Avraamosco:
2 Le Avraamosche cărdilea o Isaac;le Isaacosche cărdilea o Iacob;le Iacobosche cărdilea o Iuda hai lesche phrala;
3 le Iudasche cărdilea o Pereț hai o Zerah prin i Tamar;le Perețosche cărdilea o Hețron;le Hețronosche cărdilea o Ram;
4 le Ramosche cărdilea o Aminadab;le Aminadabosche cărdilea o Nahșon;le Nahșonosche cărdilea o Salmon;
5 le Salmonosche cărdilea o Boaz prin i Rahav;le Boazosche cărdilea o Obed prin i Rut;le Obedosche cărdilea o Iese;
6 le Iesesche cărdilea o rege David.
Le Davidosche cărdilea o Solomon prin i rromni le Urieschi;
7 le Solomonosche cărdilea o Roboam;le Roboamosche cărdilea o Abiia;le Abiiasche cărdilea o Asa;
8 le Asasche cărdilea o Iosafat;le Iosafatosche cărdilea o Ioram;le Ioramosche cărdilea o Ozia;
9 le Oziasche cărdilea o Iotam;le Iotamosche cărdilea o Ahaz;le Ahazosche cărdilea o Ezechia;
10 le Ezechiasche cărdilea o Manase;le Manasesche cărdilea o Amon;le Amonosche cărdilea o Iosia;
11 le Iosiasche cărdilea o Ieconia hai lesche phrala cana sas-le îngărde ando Babilono.
12 Pala so sas-le îngărde ando Babilono, le Ieconiasche cărdilea o Șealtiel;le Șealtielosche cărdilea o Zorobabel;
13 le Zorobabelosche cărdilea o Abiud;le Abiudosche cărdilea o Eliachim;le Eliachimosche cărdilea o Azor;
14 le Azorosche cărdilea o Țadoc;le Țadocosche cărdilea o Achim;le Achimosche cărdilea o Eliud;
15 le Eliudosche cărdilea o Eleazar;le Eleazarosche cărdilea o Matan;le Matanosche cărdilea o Iacob;
16 le Iacobosche cărdilea o Iosif, o rrom la Mariaco, i dei le Isusoschi, cai bușiol Cristoso.
17 Cadea că, le Avraamostar ji co David sas 14 generații*, le Davidostar ji cana le iudei sas-le îngărde ando Babilono, 14 generații, hai de cana sas-le îngărde ando Babilono ji co Cristoso, 14 generații.
18 Cadea cărdilea o Isus Cristos: Cana leschi dei, i Maria, sas promitime sar rromni le Iosifosche, mai anglal ca von te len-pe, voi așilea phari prin o spirito sfânto le Devlesco*.
19 Tha o Iosif, laco rrom, cai sas iech manuș lașio, ci camlea te cherel-la lajiavestar angla le manușa hai gândisardea-pe te mechel-la garades.
20 Tha, pala so gândisardea-pe cadale buchiande, dichta că o îngero* le Iehovasco* sicadea-pe lesche ando suno hai phendea: „Iosif, șiavo le Davidosco, na dara te anes chăre la Maria, chi rromni, că voi așilea phari prin o spirito sfânto le Devlesco.
21 Voi va cherela iech șiavorro, hai tu te șios lesco anav Isus*, că vo va scăpila pesche manușen* lenghe păcatendar”.
22 O ciacimos si că sea cadala întâmplosarde-pe caște pherel-pe so phendea o Iehova prin pesco profeto*:
23 „Dichta că i șei bari va așela phari, va cherela ieche șiavorres hai va șiona lesche o anav Emanuel”, cai însemnol: „O Del silo amența”.
24 Pala codoia, o Iosif uștilea anda peschi lindri hai cărdea cadea sar phendea lesche o îngero le Iehovasco: vo andea chăre pesca rromnia.
25 Tha vo ci sutea lasa ji cana voi ci cărdea le șiavorres. Hai vo șiutea lesco anav Isus.
Note de subsol
^ Sau „Mesia”, „Codo Machlo”.
^ Sau „șăre familiache”.
^ Sau „o zuralimos le Devlesco”. Dich o Dicționaro.
^ Dich o Dicționaro.
^ Cade si o iechto than mașcar le 237 thana cai o anav le Devlesco „Iehova”, arachel-pe andel Lila catar o Matei ji ca i Revelația ande cadai traducerea. Dich o Dicționaro.
^ Andi șib ebraico cado anav si „Ieșua”, sau „Iosua”, cai însemnol „O Iehova si salvarea”.
^ Sau „va salvila pesche poporos”.
^ Dich o Dicționaro.
