Pala o Matei 7:1-29
7 Na mai judechin averen, caște na aven judechime vi tumen,
2 anda codoia că vi tumen va avena judechime sa cadea sar tumen judechin averen. Hai cadea sar phiraven tumen averența sa cadea va phiravena-pe vi von tumența*.
3 Sostar diches o sulum anda i iach che phraleschi hai ci diches o baro cașt anda chi iach?
4 Sau sar daștis te phenes che phralesche: «Mech man te încalavav avri o sulum anda chi iach», cana ande chi iach si iech baro cașt?
5 Manuș hohamno*! Încalav avri mai anglal o baro cașt anda chi iach hai pala codoia va avela te diches mai mișto sar te încalaves avri o sulum anda i iach che phraleschi.
6 Na den le jucălenghe so si sfânto hai na șiuden angla le bale tumare perle*, caște na uștaren-len ande pânrănde hai pala codoia te risaren-pe caring tumende, te dandaren tumen hai te cheren tumen cotora.
7 Manghen mai dur hai va dela-pe tumenghe, roden mai dur hai va arachena, maren mai dur co udar hai va pâtrăla-pe tumenghe;
8 că oricon manghel si lesche dino, oricon rodel arachel hai oricon marel co udar va pâtrăla-pe lesche.
9 Si ciaces, con mașcar tumende va dela pesche șiavesche iech barr cana vo manghel iech manro?
10 Sau, dacă manghel iech mașio, va dena-les iech sap?
11 Cadea că, dacă tumen, chiar cana san manușa nasul, jianen te den lașe buchia tumare șiavenghe, cadichi mai but tumaro Dad andal ceruri, va dela lașe buchia codolenghe cai manghen-len lestar!
12 Cadea că, sar camen ca le manușa te phiraven-pe tumența sa cadea te phiraven tumen vi tumen lența. Cado si o baro sicaimos cai arachel-pe andi Legea le Moiseschi hai andel lila cai scriisarde-len le profeți.
13 Jian andre po udar tang, că buhlo si o udar hai baro si o drom cai îngărel merimaste hai but si codola cai jian pe leste.
14 Tha tang si o udar hai chidino si o drom cai îngărel viațate hai țâra jene arachen-les.
15 Len sama te na aven athade catar le hohamne profeți cai aven tumende hai cheren-pe că sile lașe sar le bacrea*, tha andral sile sar le ruva bochale!
16 Va prinjianena cadale manușen pala lengo phiraimos*. Chiden-pe vroiechdata dracha* andal canră sau fructea gule* andal burra?
17 Sa cadea, orisavo cașt lașio cherel fructea lașe, tha orisavo cașt cherno cherel fructea rimome.
18 O cașt lașio ci daștil te cherel fructea rimome, hai nici o cașt cherno ci daștil te cherel fructea lașe.
19 Orisavo cașt cai ci cherel fructea lașe silo șindo hai thabardo andi iag.
20 Si ciaces, va prinjianena cadale manușen pala lengo phiraimos.
21 Na oricon phenel manghe: «Raia, Raia» va jiala andre ando Regato le Devlesco*. Tha, numai codo, cai cherel so manghel lestar mânro Dad cai silo andel ceruri.
22 Ande codo ghies but jene va phenena manghe: «Raia, Raia, ci deam duma amen ande chio anav, ci încaladeam amen avri benga ande chio anav hai ci cărdeam amen miracolea ande chio anav?».
23 Atunci me va avela te phenav lenghe: «Niciechdata ci prinjiandem tumen! Duriaren tumen mandar, tumen, cai cheren buchia nasul!».
24 Cadea că, con așunel mânre dumes hai cherel so phenav lesche me si sar iech manuș goghiaver cai vazdel pesco chăr pe iech baro barr*.
25 Cana astardea te del o baro brâșând, avile le bare paia hai phurdea i zurali barval, codo chăr ci sas-lo perado, anda codoia că sas-lo vazdino pe iech baro barr.
26 Tha, con așunel mânre dumes tha ci cherel so phenav lesche me si sar iech manuș dilo cai vazdel pesco chăr pi chișai.
27 Cana astardea te del o baro brâșând, avile le bare paia, phurdea i zurali barval hai mardea ande codo chăr, vo pelea tele hai baro sas lesco perimos”.
28 Pala so o Isus phendea sea cadala buchia, le manușa așile uimime cana dichle sar sicavelas-len,
29 anda codoia că vo sicavelas-len sar iech jeno cai sas-les zuralimos le Devlestar, na sar lenghe sicaitori la Legeache*.
Note de subsol
^ Lit. „la măsurasa saveasa măsurin va măsurila-pe tumenghe parpale”.
^ Sau „duie muienghe”, „ciarde machle”; „codola cai cheren-pe angla le manușa că sile lașe”.
^ Sau „bisorra”, „miriclea”.
^ Sau „hureade andel bacrea”.
^ Lit. „pala lenghe roade”.
^ Sau „struguri”.
^ Lit. „smochine”.
^ Sau „O Regato le cerurengo”. Cado si o Raimos sau o Guverno le Devlesco cai rail andal ceruri.
^ Sau „pi stânca”.
^ Lit. „scribi”.
