Pala o Matei 20:1-34
20 Că o Regato le Devlesco* si sar iech manuș saves siles iech răz, hai gălea avri de teharin te rodel manușa caște cheren buchi ca leschi răz.
2 Pala so hachiardea-pe le manușența cai cherenas buchi te del-len iech dinaro* po ghies, bișialdea-len andi răz.
3 Cana sas cam o ceaso enia* gălea pale avri hai dichlea aver manușa cai beșenas andi piața anda codoia că ci sas-len buchi.
4 Hai phendea lenghe: «Jian vi tumen andi răz hai va avela te pochinav tumen».
5 Hai von găle. Vo gălea pale avri co ceaso 12* co mismeri hai co ceaso trin pala-mismeri* hai cărdea sa cadea.
6 Ji la urmă, co ceaso panji pala-mismeri*, gălea avri hai arachlea aver manușa cai beșenas code hai pușlea-len: «Sostar beșlean cade sasto ghies hai ci cărdean chanci buchi?».
7 Von phende lesche: «Anda codoia că ci achardea amen chonic te cheras buchi». Atunci vo phendea lenghe: «Jian vi tumen andi răz».
8 Cana cărdilea riat, o manuș caschi sas i răz phendea codolesche cai lelas sama po-l manușa: «Achar codolen cai cheren buchi hai pochin-len; astar le palutnesa hai terminisar le anglunesa».
9 Cana avile codola cai cherenas buchi catar o ceaso panji pala-mismeri, sas lenghe dino po iech dinaro.
10 Cadea că, cana avile codola cai cherenas buchi de mai anglal, pachiaie că va avela lenghe dino iech pochinimos mai baro, tha vi lenghe sas dino sa po iech dinaro.
11 Cana line o pochinimos, von astarde te den duma nasul anda o manuș caschi sas i răz
12 hai phende: «Le palutne manușa cărde buchi numai iech ceaso hai cu sea cadala tu phiradean tut lența cadea sar amența, cai cărdeam phares buchi sasto ghies hai așileam ando baro thabarimos le chamesco!».
13 Tha vo phendea iechesche mașcar lende: «Mânro amal, me ci athadem tut chancesa. Ci hachiardeam amen că va avela te dav tut iech dinaro?
14 Le so si chiro hai jiatar. Me camav te dav vi codolen cai cărde buchi iech ceaso sa codo pochinimos sar tut.
15 Ci daștiv te cherav so camav me, sosa si mânro? Sau san invidioso* anda codoia că me som lașio?».
16 Cadea că, codola palutne va avena le anglune, hai codola anglune va avena le palutne”.
17 Cana jialas opre caring o Ierusalimo, o Isus lea de iech rig pesche 12 discipolen hai po drom phendea lenghe:
18 „Dichta că jias opre caring o Ierusalimo hai o Șiavo le manușesco va avela dino ando vast le bare rașaiengo hai le sicaitorengo la Legeache*. Von va șiona te avel mudardo
19 hai va dena-les ando vast le manușengo anda aver neamuri caște avel prasado, mardo le biciosa hai șiuto po stâlpo*; hai o trinto ghies va avela uștiado andal mule*”.
20 Atunci i rromni le Zebedeioschi pașilea le Isusostar ande iech than pesche duie șiavența, banghilea tele angla leste hai camelas te manghel lestar vareso.
21 Vo pușlea-la: „So cames?”. Voi phendea lesche: „Cana va avela te aves ande chio Regato, cher ca mânre dui șiave te beșen ande iech than tusa, iech ande chi ciaci rig hai o coaver ande chi stângo rig”.
22 O Isus phendea: „Ci jianen so manghen. Daștin tumen te pien o paharo cai va avela te piav-les me?”. Von phende lesche: „Daisaras”.
23 Vo phendea lenghe: „Si ciaces, va piena mânro paharo, tha te beșen ande mânri ciaci hai stângo rig na-i vareso cai me daștiv te dav, tha cadala thana si anda codola alosarde mânre Dadestar”.
24 Cana le coaver deș jene așunde so cărde le dui phrala, von holiarde-pe zurales.
25 Tha o Isus achardea savoren peste hai phendea lenghe: „Cadea sar jianen, le conducători le themenghe rain opral lende hai codola o mai bare sicaven pengo zuralimos opral lende.
26 Mașcar tumende ci trebul te avel cadea, tha oricon camel te avel baro mașcar tumende trebul te avel tumaro slujitoro
27 hai oricon camel te avel o iechto mașcar tumende trebul te avel tumaro sclavo.
28 Nici o Șiavo le manușesco ci avilea caște slujil-pe lesche, tha te slujil hai te del peschi viața caște chinel parpale bute manușen*”.
29 Ando timpo so tiliarenas anda o Ierihono, but manușa jianas pala o Isus.
30 Dui corre cai beșenas pașa o drom așunde că o Isus nachelas othar hai dine cingar: „Raia, Șiavo le Davidosco, sicav amenghe mila!”.
31 Tha le but manușa hale-pe lența hai phende lenghe te na mai den cingar. Tha von dine cingar vi mai zurales: „Raia, Șiavo le Davidosco, sicav amenghe mila!”.
32 Atunci o Isus așilea po than, achardea-len peste hai phendea lenghe: „So camen te cherav anda tumende?”.
33 Von phende lesche: „Raia, te dichas pale!”.
34 Anda codoia că cărdilea lesche mila lendar, o Isus șiutea o vast pe lenghe iacha hai pe thaneste von dichle pale; hai astarde te jian pala leste.
Note de subsol
^ Sau „O Regato le cerurengo”. Cado si o Raimos sau o Guverno le Devlesco cai rail andal ceruri.
^ Iech dinaro sas o pochinimos anda iech ghies buchiaco.
^ Cam caring o trin-to ceaso.
^ Cam caring o șiov-to ceaso.
^ Cam caring o enia-to ceaso.
^ Cam caring o 11-to ceaso.
^ Lit. „chi iach si nasul”.
^ Lit. „scribi”.
^ Dich o Dicționaro.
^ Sau „jiuvindime”.
^ Sau „sar răscumpărarea”.
