Pala o Matei 6:1-34
-
I PREDICA PA O PLAIN (1-34)
-
„Te na cheren buchia lașe angla le manușa numai caște aven dichle lendar” (1-4)
-
Sar te mangas amen le Devlesche (5-15)
-
Sar sicadea amen o Isus te mangas amen le Devlesche (9-13)
-
-
Posto (16-18)
-
Barvalimata pi phuv hai barvalimata ando cerii (19-24)
-
„Na mai daran anda tumari viața” (25-34)
-
„Roden sea o timpo te șion po iechto than ande tumari viața o Regato” (33)
-
-
6 Len sama te na cheren buchia lașe* angla le manușa numai caște aven dichle lendar. Cana cheren cadea tumaro Dad andal ceruri ci va dela tumen niciech pochinimos.
2 Cadea că, cana pâtres chio vast caring codola ciore*, na phen cadaia savorenghe, cadea sar cheren le manușa hohamne* ande penghe sinagogi* hai po drom. Von cheren cadai buchi caște aven așarde le manușendar. Ciaces phenav tumenghe că cado si lengo corcoro pochinimos.
3 Tha, cana pâtres chio vast caring codola ciore, te na jianel chio stângo vast so cherel chio ciacio vast,
4 cadea că te na jianel chonic le buchia lașe cai cărdean-len. Atunci chio Dad andal ceruri cai dichel sea le buchia va pochinela tut.
5 Sa cadea, cana manghen tumen le Devlesche, te na cheren sar le manușa hohamne, saven placial-len te manghen-pe ande pânrănde ande penghe sinagogi hai avri po bare droma caște aven dichle le manușendar. Ciaces phenav tumenghe că cado si lengo corcoro pochinimos.
6 Tha tu, cana manghes tut le Devlesche, jia andre ande chio chăr caște aves corcoro, hai pala so phandaves o udar pala tute, mang tut che Dadesche, cai ci daștil te dichel-les chonic. Atunci chio Dad andal ceruri cai dichel sea le buchia va pochinela tut.
7 Cana manghen tumen le Devlesche, te na phenen sa codola buchia mai butivar iech pala aver, cadea sar cheren le manușa anda aver neamuri. Von pachian că o Del va așunela-len anda codoia că phenen but dumes.
8 Tumen te na aven sar von, anda codoia că tumaro Dad andal ceruri jianel so trebul tumenghe angla te manghen lestar cadaia.
9 Tha tumen cadea te manghen tumen le Devlesche:
«Amaro Dad cai san andel ceruri te avel sfințome* chio anav.
10 Te avel chio Regato. Te cărdiol-pe chi voia, sar si ando cerii, cadea te avel vi pi phuv.
11 De amen o manro anda cado ghies
12 hai chos amare doșa, cadea sar vi amen chosleam le doșa codolenghe cai cărde amenghe nasul.
13 Hai na mech te peras ando athaimos, tha duriar amen le benghestar*».
14 Cana chosen le doșa le manușenghe cai cărde tumenghe nasul, vi tumaro Dad andal ceruri va chosela tumare doșa,
15 tha, dacă ci chosen lenghe doșa, nici tumaro Dad andal ceruri ci va chosela tumare doșa.
16 Cana ci han chanci caște încăren posto te na dichiol-pe pe tumende că san covle cadea sar cheren le manușa hohamne. Von ci halaven pengo mui ca le coaver manușa te jianen că von încăren posto. Ciaces phenav tumenghe că cado si lengo corcoro pochinimos.
17 Tha tu, cana încăres posto, cher șucar che bala hai halav chio mui
18 caște na sicaves le manușenghe că încăres posto, tha numai chio Dad andal ceruri te jianel cadaia. Atunci chio Dad, cai dichel sea le buchia, va pochinela tut.
19 Na mai chiden tumenghe barvalimata pi phuv, cai le cherme hai i rugina han-len hai cai le cior jian hai cioren-len.
20 Mai mișto, den tumari zor te chiden tumenghe barvalimata ando cerii, cai nici le cherme hai nici i rugina ci han-len hai le cior ci jian hai ci cioren-len.
21 Anda codoia că, cai si chio barvalimos code va avela vi chio ilo.
22 Chi iach si sar iech lampa cai del tut lumina. Cana chi iach si sastevesti*, sea chio corpo va avela pherdo lumina.
23 Tha cana chi iach sili coriardi bute buchiandar, sea chio corpo va avela ando tunearico. Dacă i lumina anda tute si tunearico, chichi de baro si cado tunearico!
24 Chonic ci daștil te avel sclavo duie raienghe. Cana va iubila ieches anda lende va urâla le coaveres; hai cana va așunela iechestar anda lende ci va sicavela pachiv caring o coaver. Cadea că, ci daștin te slujin vi le Devlesche hai vi le Barvalimasche.
25 Anda codoia phenav tumenghe: Na mai daran anda tumari viața, anda so va hana, so va piena, sau anda tumaro corpo, so va lena pe tumende. Ci cherel mai but tumari viața sar o haben hai o corpo sar o hureaimos cai len-les pe tumende?
26 Dichen le ciriclea le cerosche. Von ci șion semințea andi phuv, ci chiden so barilea anda lende hai ci șion vareso de iech rig. Cu sea cadala, tumaro Dad andal ceruri del-len te han. Ci san tumen mai cuci* sar von?
27 Savo mașcar tumende cai daral prea but anda peschi viața, daștil te cherel-la mai lungo vi numai ieche ghiesesa*?
28 Sa cadea, sostar daran că ci va avela tumen hureaimos? Sichion le lulughiandar cai barion po câmpo. Von ci cheren phares buchi hai nici na suven penghe hureaimos.
29 Tha ciaces phenav tumenghe că nici chiar o Solomon, o mai barvalo manuș, ci sas-lo hureado sar iech mașcar cadala lulughia.
30 Dacă cadea hureavel o Del le lulughia pa o câmpo, cai aghies barion hai tehara sile thabarde andi iag, ci camel vo vi mai but te hureavel tumen? Manușa cai si tumen țâra pachiamos.
31 Cadea că na daran niciechdata anda tumari viața hai na phenen: «So va avela te has?» sau «So va avela te pias?» sau «So va avela te las pe amende?».
32 Anda codoia că le manușa anda aver neamuri phiren pala cadala buchia. Tha tumaro Dad andal ceruri jianel mișto că trebun tumenghe sea cadala buchia.
33 Cadea că, roden sea o timpo te șion po iechto than ande tumari viața o Regato hai le Devlesco ortomos, hai sea cadala buchia va avena tumenghe dine.
34 Anda codoia, na daran niciechdata anda so va avela tehara, că tehara va avena tumen aver pharimata. Arăsăl fiesave ghiesesche lesco pharimos.
Note de subsol
^ Lit. „te na sicaven tumaro ortomos”.
^ Lit. „daruri lașimasche”. Dich o Dicționaro.
^ Sau „duie muienghe”, „ciarde machle”; „codola cai cheren-pe angla le manușa că sile lașe”.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Sau „așardo”.
^ Lit. „codolestar nasul”.
^ Sau „chi iach dichel orta caring iech corcori buchi”.
^ Sau „prețioso”.
^ Lit. „ieche vastesa”.
