Pala o Matei 22:1-46
22 O Isus dea duma pale lența prin pilde; vo phendea:
2 „O Regato le Devlesco* daștil te avel sar iech rege cai cărdea iech bari meseili anda o abiav pesche șiavesco.
3 Vo bișialdea pesche sclaven te phenen codolenghe cai sas-le acharde ca i meseili le abiaveschi te aven, tha von ci camle te aven.
4 Pala codoia bișialdea avere sclaven hai phendea: «Phenen codolenghe cai sas-le acharde: „Dichta că o haben si gata; le guruva hai mânre thule animalea sile șinde hai sea si gata. Aven ca i meseili le abiaveschi!”».
5 Tha codola cai sas-le acharde, bi te duchal-len chanci, tiliarde, iech ca peschi phuv, aver te cherel love,
6 hai le coaver șiute o vast pe lesche sclavi, marde-len hai mudarde-len.
7 Atunci o rege holiardea-pe zurales. Vo bișialdea peschi armata hai mudardea sea codolen cai mudarde lesche sclaven hai thabardea lengo foro.
8 Pala codoia phendea pesche sclavenghe: «I meseili le abiaveschi si gata, tha codola cai sas acharde sicade că ci meritin i pachiv te aven cade.
9 Anda codoia, jian po-l droma cai îngăren avreal o foro hai acharen ca i meseili le abiaveschi oricas va avela te arachen».
10 Atunci le sclavi găle avri po-l droma hai chidine sea codolen cai arachle-len, vi nasul, hai vi lașe. Hai o than cai sas o abiav pherdilea-pe manușența.
11 Cana o rege gălea andre te dichel codolen cai sas acharde co abiav, dichlea ieche manușes cai ci sas-les hureaimata abiavesche.
12 Hai pușlea-les: «Sar avilean andre bi te avel tut hureaimata abiavesche?». Vo ci mai daisardea te phenel lesche chanci parpale.
13 Atunci o rege phendea pesche slujitorenghe: «Phanden lesche vast hai lesche pânre hai șiuden-les ando tunearico de avreal. Code va rovela hai va izdrana lesche danda daratar».
14 Că but si acharde, tha țâra si alosarde”.
15 Atunci le farisei* tiliarde hai dine duma mașcar pende caște cheren le Isusos te phenel vareso nasul.
16 Cadea că, bișialde leste penghe discipolen hai chichiva manușen le Irodosche caște phenen lesche: „Sicaitorina, jianas că phenes o ciacimos hai sicaves o drom le Devlesco pala o ciacimos hai că ci rodes te aves mișto dichlo chanicastar, anda codoia că ci diches sar sicaven le manușa de avreal.
17 Phen amenghe: So pachias? Si mișto te pochinel-pe o impozito* le Cezarosche sau nici?”.
18 Tha o Isus prinjianelas lengo nasulimos hai phendea: „Sostar șion man co zumaimos, tumen cai san manușa hohamne*?
19 Sicaven manghe iech andal love savesa pochinen o impozito”. Von andine lesche iech dinaro.
20 Hai vo phendea lenghe: „Casco șăro hai anav si cado?”.
21 Von phende lesche: „Le Cezarosco”. Atunci vo phendea lenghe: „Cadea că, den le Cezarosche so si le Cezarosco, tha le Devlesche so si le Devlesco”.
22 Cana așunde cadaia, așile uimime. Pala codoia mechle-les hai tiliarde.
23 Ande codo ghies, le saduchei*, cai phenen că na-i sar te aven uștiade le mule*, avile hai pușle-les:
24 „Sicaitorina, o Moise phendea: «Dacă iech manuș merel bi te aven-les șiavorre, lesco phral trebul te lel lesca rromnia caște așen-les șiavorre».
25 Dichta că mașcar amende sas efta phrala. O iechto lea pesche rromni hai mulea hai, anda codoia că ci sas-les șiavorre, mechlea pesca rromnia pesche phralesche.
26 Sa cadea sas vi le duitonesa, vi le trintonesa hai ji co efta-to phral.
27 I palutni cai mulea mașcar lende sas i jiuvli.
28 Anda codoia că sas i rromni sea le efta phralenghi, cana va uștiena andal mule, saveschi rromni va avela?”.
29 O Isus phendea lenghe: „Tumen greșin, anda codoia că ci prinjianen nici o Lil le Devlesco, hai nici o zuralimos le Devlesco;
30 că, cana va avena uștiade le mule, le murșa ci va mai lena penghe rromni hai nici le jiuvlea ci va mai lena penghe rrom, că va avena sar le îngeri anda o cerii.
31 Tha, cana va uștiena le mule, ci citisardean so phendea tumenghe o Del:
32 «Me som o Del le Avraamosco, o Del le Isaacosco hai o Del le Iacobosco»? Vo na-i o Del codolengo mule, tha codolengo jiuvinde”.
33 Cana așunde cadaia, le but manușa așile uimime lesche sicaimastar.
34 Cana le farisei așunde că phandadea o mui le saducheiengo, avile leste mai bute jenența.
35 Hai, caște șion-les co zumaimos, iech anda lende, cai prinjianelas zurales mișto i Legea, pușlea-les:
36 „Sicaitorina, savi si i mai bari porunca andai Legea?”.
37 Vo phendea lesche: „«Te iubis le Iehovas, chio Del, sea che ilesa, sea chia viațasa* hai sea chia goghiasa».
38 Cadaia si i mai bari hai i iechto porunca.
39 I duito, sa cadea, si: «Te iubis che pașardes cadea sar tut».
40 Sea i Legea hai so phende le profeți țârden-pe anda cadala dui porunci”.
41 Hai, ando timpo so sas chidine code le farisei, o Isus pușlea-len:
42 „So pachian anda o Cristos? Casco șiavo si?”. Von phende: „Le Davidosco”.
43 Vo pușlea-len: „Atunci sostar o David, tela o zuralimos le Devlesco, phenel lesche «Rai», cana phenel:
44 «O Iehova phendea mânre Raiesche: „Beș ca mânri ciaci rig ji cana va avela te șioav che dușmanen tela che pânre”»?
45 Dacă o David phenel lesche «Rai», sar daștil te avel vo lesco șiavo?”.
46 Chonic ci daisardea te phenel lesche chanci parpale hai, anda codo ghies, savore daranas te mai pușen-les vareso.
Note de subsol
^ Sau „O Regato le cerurengo”. Cado si o Raimos sau o Guverno le Devlesco cai rail andal ceruri.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Pochinimos cai trebulas dino ieche manușestar ande fiesavo bărș.
^ Sau „duie muienghe”, „ciarde machle”; „codola cai cheren-pe angla le manușa că sile lașe”.
^ Le saduchei sas iech secta iudaico cai ci pachianas ando jiuvindimos hai andel îngeri.
^ Sau „jiuvindime”.
^ Lit. „sea che sufletosa”. Dich o Dicționaro.
