Pala o Matei 2:1-23
2 Pala so o Isus cărdilea ando Betleemo andai Iudeea, andel ghiesa cana railas o rege Irod*, dichta că avile co Ierusalimo chichiva murșa anda o Esto* cai drabarenas andel cerhaia*
2 hai pușle: „Cai si o rege le iudeiengo cai cărdilea? Că dichleam leschi cerhai cana samas ando Esto hai avileam te banghioas tele angla leste”.
3 Cana așundea cadaia, o rege Irod darailea hai, ande iech than lesa, o sasto Ierusalimo.
4 Cadea că, vo chidea ande iech than sea le bare rașaien* hai le sicaitoren la Legeache* anda o poporo hai pușlea-len cai trebulas te cărdiol o Cristoso*.
5 Von phende lesche: „Ando Betleemo andai Iudeea, că cadea sas scriime prin o profeto*:
6 «Hai tu, Betleemo anda o them Iuda, chiar cana san dichlo sar o mai țâno foro mașcar le conducători cai rain andi Iuda, anda tute va înclela iech conducătoro cai va raila opral mânro poporo, Israelo»”.
7 Atunci o Irod achardea peste garades codolen cai drabarenas andel cerhaia caște jianel ciaces cana dichle i iechto data i cerhai.
8 Pala codoia bișialdea-len co Betleemo hai phendea lenghe: „Jian hai roden mișto le șiavorres, hai cana va arachena-les, te phenen manghe caște jiav vi me te banghiovav tele angla leste”.
9 Pala so așunde so phendea lenghe o rege, von găle pe pengo drom. Hai dichta că i cerhai cai dichle-la cana sas-le ando Esto jialas angla lende ji cana așilea opral o than cai sas o șiavorro.
10 Cana dichle că i cerhai așilea po than, von bucurisaile zurales but.
11 Cana găle andre ando chăr, dichle le șiavorres la Mariasa, leschi dei, banghile tele angla leste hai andine lesche pachiv. Pala codoia, încalade penghe barvalimata hai dine-les sar daruri: sumnacai, tămâia parni hai miro.
12 Tha, anda codoia că o Del phendea lenghe ande iech suno te na risaren-pe parpale co Irod, von găle caring pengo them pe aver drom.
13 Pala so tiliarde, dichta că o îngero le Iehovasco sicadea-pe le Iosifosche ando suno hai phendea lesche: „Uștie opre, te les le șiavorres hai lesca deia hai te nașes ando Egipto. Beș code ji cana phenav tuche me, anda codoia că o Irod rodel le șiavorres caște mudarel-les”.
14 Cadea că, o Iosif uștilea opre ando mașcar la ratiaco, lea le șiavorres hai lesca deia hai gălea lența ando Egipto.
15 Vo așilea code ji cana mulea o Irod. Cadea, pherdilea-pe so phendea o Iehova prin pesco profeto: „Anda o Egipto va avela te acharav mânre șiaves”.
16 Cana o Irod dichlea că codola cai drabaren andel cerhaia athade-les, vo holiardea-pe zurales but, cadea că bișialdea te aven mudarde sea le țâne șiavorre duie bărșenghe sau mai țâne anda o Betleemo hai andal thana de pașa leste. Vo hachiardea le drabarnendar că le șiavorres sas-les cadala bărșa.
17 Atunci pherdilea-pe so sas phendo prin o profeto Ieremia:
18 „Ando foro Rama așundea-pe iech baro roimos hai iech bari duch. Si i Rahela, cai rovel pala pesche șiavorre. Ci mai daștil chonic te zuriarel laco ilo, anda codoia că lache șiavorre ci mai sile”.
19 Pala so o Irod mulea, o îngero le Iehovasco sicadea-pe ando suno le Iosifosche ando Egipto
20 hai phendea lesche: „Uștie opre, te les le șiavorres hai lesca deia hai te jias ando them le Israelosco, că codola cai rodenas te mudaren le șiavorres mule”.
21 Cadea că, vo uștilea opre, lea le șiavorres hai lesca deia hai risailea parpale ando Israelo.
22 Tha vo darailea te jial code, anda codoia că așundea că andi Iudeea railas o Arhelaus ando than pesche dadesco, o Irod. Mai but, o Del phendea lesche ando suno te lel sama caring jial. Cadea că vo gălea andi Galileea.
23 Hai gălea te beșel ando foro cai bușiolas Nazareto, caște pherel-pe so sas phendo prin le profeți: „Va phenela-pe lesche că si Nazarineano*”.
Note de subsol
^ Dich o Dicționaro.
^ O than catar înclel o cham.
^ Sau „astrologi”. Dich o Dicționaro.
^ Dich o Dicționaro.
^ Lit. „scribi”.
^ Sau „Mesia”, „Codo Machlo”.
^ Dich o Dicționaro.
^ Daștil-pe că avel anda iech duma ebraico cai însemnol „nevi ranic”. Dich o Dicționaro.
