Pala o Matei 8:1-34
8 Pala so avilea tele pa o plain, but manușa găle pala leste.
2 Hai dichta că avilea iech manuș cai sas-les lepra*, banghilea tele angla leste hai phendea: „Raia, dacă cames, daștis te cheres man ujo”.
3 Atunci o Isus șiutea o vast pe leste hai phendea: „Camav! Te aves ujo!”. Hai pe thaneste sas-lo sastiardo la lepratar.
4 O Isus phendea: „Le sama te na phenes chanicasche, tha jia, sicav tut le rașaiesche hai de o daro cai manghel-les i legea le Moiseschi, caște dichen vi le rașaia că sastilean ciaces”.
5 Cana arăslea ando Capernaum, avilea leste iech ofițero andai armata hai manglea-les anda sea o ilo:
6 „Raia, mânre slujitoros siles iech baro nasfalimos hai ci mai daștil te vazdel-pe ande pânrănde”.
7 Vo phendea lesche: „Cana arăsav tute, sastiarav-les”.
8 O ofițero andai armata phendea lesche: „Raia, ci som me cadea de lașio caște aves ande mânro chăr; phen numai iech duma hai mânro slujitoro va avela sastiardo.
9 Anda codoia că vi me som tela averengo zuralimos hai vi tela mânro vast si but soldați; hai phenav iechesche: «Jia!» hai jial, hai averesche: «Av!» hai avel, hai mânre sclavosche: «Cher cadaia!» hai vo cherel-la”.
10 Cana așundea cadaia, o Isus așilea uimime hai phendea codolenghe cai jianas pala leste: „Phenav tumenghe ciaces că ci arachlem iech pachiamos cadea de baro chanicaste ando Israelo.
11 Tha phenav tumenghe că va avena but manușa anda thana duriarde* hai va beșena ca i meseili le Avraamosa, le Isaacosa hai le Iacobosa ando Regato le Devlesco*,
12 ando timpo so le șiave le Regatosche va avena șiudine ando tunearico de avreal. Code va rovena hai lenghe danda va izdrana daratar*”.
13 Pala codoia o Isus phendea le ofițerosche andai armata: „Jia liniștime! Te avel cadea sar manglean, anda codoia că sicadean pachiamos!”. Hai lesco slujitoro sas-lo sastiardo chiar ande codo ceaso.
14 Cana o Isus gălea andre ando chăr le Petrosco, vo dichlea că i sasui* le Petroschi sas-li nasfali ando pato, anda codoia că sas-la bari febra.
15 Atunci vo astardea laco vast hai i febra mechlea-la, cadea că voi uștilea opre hai astardea te cherel lenghe haben.
16 Cana avilea i riat, sas andine leste but manușa cai sas-len benga, hai vo încaladea le benghen anda lende prin iech corcori duma hai sastiardea sea codolen cai sas-le nasfale,
17 caște pherel-pe so sas phendo prin o profeto* Isaia: „Vo sastiardea* amare nasfalimata hai duriardea amare ducha”.
18 Cana o Isus dichlea că but manușa chidine-pe pașa leste, vo phendea le discipolenghe te nachen pi coaver rig le paieschi.
19 Hai iech sicaitoro la Legeaco* pașilea lestar hai phendea: „Sicaitorina, va avela te jiav pala tute oricai jias”.
20 Tha o Isus phendea: „Le vulpi cheren penghe thana cai te beșen hai le ciriclean andal ceruri silen cuiburi, tha le Șiaves le manușesco na-i les cai te șiol tele pesco șăro”.
21 Pala codoia, iech mașcar le discipoli phendea lesche: „Raia, mech man mai anglal te jiav te prahov mânre dades”.
22 O Isus phendea lesche: „Av mai dur pala mande hai mech le mulen te prahon penghe mulen”.
23 Pala codoia, o Isus hai lesche discipoli găle opre ande iech barca.
24 Hai dichta că pi marea avilea iech bari barval brâșândesa, cadea că le valuri pherde i barca paiesa. Tha o Isus sovelas.
25 Von avile leste caște uștiaven-les hai phende lesche: „Raia, salvisar amen, că meras!”.
26 Tha vo phendea lenghe: „Sostar daran cadea de but, manușa cai si tumen țâra pachiamos?”. Pala codoia uștilea opre, dea cingar caring i barval hai i marea te așiaven-pe hai pe thaneste cărdilea iech bari liniștea.
27 Atunci le discipoli așile uimime hai phende: „So felo manuș si cado? Chiar vi le barvalea hai le paia așunen lestar”.
28 Cana arăslea pi coaver rig le paieschi, ando than cai beșenas le gadareni, avile angla leste dui murșa cai sas-len benga. Cadala avenas de mașcar le mormintea*. Von sas-le cadea de nasul, că sea le manușa daranas te nachen pe codo drom.
29 Hai dichta că von denas cingar: „So cames amendar, tu cai san o Șiavo le Devlesco? Avilean cade caște chinuis amen angla o timpo alosardo?”.
30 Na dur lendar, von dichle but bale cai hanas.
31 Hai le benga astarde te manghen-les hai phenenas lesche: „Dacă încalaves amen avri, bișial amen andel bale”.
32 Vo phendea lenghe: „Jian!”. Von încliste avri* anda le dui manușa hai găle andel bale hai dichta că sea i turma nașlea tele pa o plain, pelea ando pai hai sea le bale mule.
33 Atunci codola cai lenas sama le balendar nașle hai, cana arăsle ando foro, phende savorenghe sea so dichle, vi so întâmplosardea-pe le duie murșența cai sas-len benga.
34 Hai dichta că sea le manușa anda o foro găle te roden le Isusos, hai cana dichle-les, mangle-les zurales te tiliarel anda o than cai beșenas von.
Note de subsol
^ Dich o Dicționaro.
^ Lit. „catar o esto hai catar o vesto”. Cadala si le thana catar înclel hai perel o cham.
^ Sau „O Regato le cerurengo”. Cado si o Raimos sau o Guverno le Devlesco cai rail andal ceruri.
^ Cadai expresia sicavel i dar hai i holi cai caliarel lengo ilo.
^ Sau „soacra”.
^ Dich o Dicționaro.
^ Lit. „lea”.
^ Lit. „scribo”.
^ Sau „thana cai sas prahome le manușa”.
^ Sau „găle avri”.
