Pala o Matei 21:1-46

  • Cana o Isus jial andre ando Ierusalimo (1-11)

  • O Isus ujiarel o templo (12-17)

  • O Isus del armai o cașt cai ci cărdea smochine (18-22)

  • Le bare rașaia hai le phure le forosche pușen le Isusos catar siles zuralimos (23-27)

  • I pilda anda le dui șiave (28-32)

  • I pilda andal manușa nasul cai line sama pi răz (33-46)

    • O barr cai încărel o sasto chăr silo șiudino (42)

21  Cana pașile le Ierusalimostar hai arăsle ando Betfaghe, po Plain le Măslinengo, o Isus bișialdea duie discipolen 2  hai phendea lenghe: „Jian ando gav cai dichen-les angla tumende hai, cana va arăsăna ande leste, va arachena iech măgărița phangli hai pașa late iech țâno măgaro. Pâtrăn-len hai anen-len mande. 3  Dacă varecon phenel tumenghe vareso, te phenen: «Trebul le Raiesche». Hai vo va dela-len pe thaneste”. 4  Cadaia întâmplosardea-pe caște pherel-pe so sas phendo prin o profeto* cai phendea: 5  „Phen la șeiache le Sionoschi: «Dichta că chio rege avel tute; vo si lașio* hai avel pe iech măgaro, da, pe iech țâno măgaro, o puio ieche animalosco cai îngărel pharimos»”. 6  Le discipoli găle hai cărde cadea sar phendea lenghe o Isus. 7  Andine i măgărița hai o țâno măgaro, șiute penghe hureaimata pe lende, hai o Isus beșlea opre po țâno măgaro. 8  Le mai but mașcar le manușa șionas pengo hureaimos angla leste po drom; aver șinenas le ranica anda le cașta hai șionas-len po drom. 9  Le manușa cai jianas angla leste hai codola cai avenas pala leste denas cingar: „Raia, mangas tut, salvisar le Șiaves le Davidosco! Binecuvântime si codo cai avel ando anav le Iehovasco! Tu, cai san ando mai ucio than, mangas tut, salvisar-les!”. 10  Cana gălea andre ando Ierusalimo, ando sasto foro le manușa denas duma mașcar pende hai pușenas-pe: „Con si cado?”. 11  Le but manușa phenenas: „Si o profeto Isus, anda o Nazareto andai Galileea!”. 12  O Isus gălea andre ando templo, dea avri sea codolen cai bichinenas hai chinenas ando templo hai risardea opre le meseilea codolenghe cai paruvenas le love hai le scamina codolenghe cai bichinenas porumbei. 13  Hai vo phendea lenghe: „Si scriime: «Mânro chăr va bușiola chăr manglimasco», tha tumen cheren anda leste iech than cai garaven-pe le cior!”. 14  Cana sas ando templo, chichiva corre hai chichiva banghe pașile lestar, hai vo sastiardea-len. 15  Cana le bare rașaia hai le sicaitori la Legeache* dichle le bare buchia cai cărdea-len hai sar le șiave denas cingar ando templo: „Mangas tut, salvisar le Șiaves le Davidosco!”, pherdile holiatar 16  hai phende lesche: „Așunes so phenen cadala?”. O Isus phendea lenghe: „Da. Na citisardean niciechdata: «Anda o mui le șiavorrengo hai le țânengo cai pien thud încaladean așarimata»?”. 17  Hai mechlea-len code, tiliardea anda o foro hai gălea caring i Betania, cai așilea te sovel. 18  De teharin, cana risarelas-pe parpale ando foro, cărdilea lesche boch. 19  Dichlea pașa o drom iech cașt cai cherelas smochine, pașilea lestar, tha arachlea numai patrina. Atunci phendea lesche: „Te na mai bariol chanci anda tute niciechdata!”. Hai, pe thaneste, o cașt șuchilea. 20  Cana le discipoli dichle cadai buchi, așile uimime hai phende: „Sar șuchilea o cașt* pe thaneste?”. 21  O Isus phendea lenghe: „Ciaces phenav tumenghe că, dacă sicaven pachiamos hai pachian tumen ciaces ando Del*, na numai că va cherena so cărdem me cadale caștesa, tha, vi dacă va phenena cadale plainesche: «Vazde tut hai șiude tut andi marea», cadea va avela. 22  Hai dacă si tumen pachiamos, sea so manghen le Devlestar va avela tumenghe dino”. 23  Pala so gălea andre ando templo, le bare rașaia hai le phure le forosche pașile lestar cana sicavelas le manușen hai pușle-les: „Catar si tut o zuralimos te cheres cadala buchia? Con dea tut cado zuralimos?”. 24  O Isus phendea lenghe: „Pușav tumen vi me vareso. Dacă phenen manghe, vi me phenav tumenghe catar si man o zuralimos te cherav cadala buchia: 25  Catar avelas o bolimos* le Ioanosco? Anda o cerii sau le manușendar?”. Tha von astarde te den duma mașcar pende hai phenenas: „Dacă phenas: «Anda o cerii», va phenela amenghe: «Atunci sostar ci pachiaian ando Ioan?». 26  Hai dacă phenas: «Le manușendar», daras le bute manușendar, anda codoia că savore pachian că o Ioan si profeto”. 27  Tha von phende le Isusosche: „Ci jianas”. Atunci vo phendea lenghe: „Nici me ci phenav tumenghe catar si man o zuralimos te cherav cadala buchia. 28  So pachian? Ieche manușes sas-les dui șiave. Gălea co iechto hai phendea lesche: «Mânro șiavo, jia hai cher buchi aghies andi răz». 29  Vo phendea: «Ci jiav», tha pala codoia falea-les nasul hai gălea. 30  Gălea vi co duito hai phendea lesche sa codoi buchi. Lesco șiavo phendea lesche: «Jiav, dade», tha ci gălea. 31  Savo mașcar le dui cărdea so phendea lesco dad?”. Von phende lesche: „O iechto”. O Isus phendea lenghe: „Ciaces phenav tumenghe că codola cai chiden le love* hai le prostituate* va jiana mai sigo andre ando Regato le Devlesco sar tumen. 32  Că o Ioan avilea tumende hai sicadea tumenghe o drom le ortomasco, tha tumen ci pachiaian ande leste. Cu sea cadala, codola cai chiden le love hai le prostituate pachiaie ande leste; tha tumen nici cana dichlean cadaia ci falea tumen nasul hai ci pachiaian ande leste. 33  Mai așunen vi aver pilda: Ieche manușes sas-les iech phuv, vo șiutea ande late te bariol iech răz, vazdea iech bar* pașa late, cărdea iech than cai cherel-pe i mol hai vazdea vi iech turno. Pala codoia, mechlea-la ando vast codolengo cai lenas sama pi răz hai tiliardea ande aver them. 34  Cana avilea o timpo te aven chidine le dracha, bișialdea pesche sclaven codolende cai lenas sama pi răz caște len i partea andal dracha* cai trebulas te avel lesche dini. 35  Tha codola cai lenas sama pi răz șiute o vast po-l sclavi hai ieches marde-les, le coaveres mudarde-les, hai ando coaver șiudine barrența ji cana mulea. 36  Atunci vo bișialdea avere sclaven, mai but sar i iechto data, tha von cărde lența sa cadea. 37  Ji la urmă, vo bișialdea lende pesche șiaves, hai phendea pesche: «Mânre șiaves va dena-les pachiv». 38  Cana dichle le șiaves, codola cai lenas sama pi răz phende iech averesche: «Cadai răz va așela lesche. Aven te mudaras-les caște așel amenghe lesco barvalimos!». 39  Cadea că line-les, șiudine-les avri andai răz hai mudarde-les. 40  Atunci, cana va avela codo caschi si i răz, so va cherela codole manușența?”. 41  Von phende lesche: „Anda codoia că sile nasul, va mudarela-len hai va dela peschi răz avere manușenghe caște len sama latar, save, co timpo cana va chidena-pe le dracha, va dena-les i partea andal dracha cai trebul te avel lesche dini”. 42  O Isus phendea lenghe: „Ci citisardean niciechdata ando Lil le Devlesco că: «O barr cai șiudine-les codola cai vazden chăra cărdilea o barr cai încărel o sasto chăr*. Cadai buchi avilea le Iehovastar hai si zurales șucar ande amare iacha»? 43  Dichta sostar phenav tumenghe: O Regato le Devlesco va avela lino tumendar hai va avela dino le manușenghe cai va cherena so camel o Del*. 44  Sa cadea, codo cai perel opral cado barr va avela phagărdo, hai opral caste va perela cado barr va avela nichiardo*”. 45  Cana așunde lesche pilde, le bare rașaia hai le farisei hachiarde că delas duma anda lende. 46  Hai, chiar cana camenas te astaren-les*, daranas le manușendar, anda codoia că cadala dichenas-les sar iech profeto.

Note de subsol

^ Sau „covle ilesa”.
^ Lit. „scribi”.
^ Cașt cai cherelas smochine.
^ Sau „na-i tumen îndoieli”.
^ Lit. „le jene cai chidenas le taxe”. Cadala manușa chidenas love anda le taxe șiute le guvernostar Romano; von sas-le urâme le coavere evreiendar.
^ Sau „jiuvlea cai cheren buchia sexualo melale pe lovende”.
^ Sau „gardo”.
^ Sau „struguri”.
^ Cado barr si șiuto ando colțo de opral le chăresco cai dui ziduri phanden-pe ande iech than.
^ Lit. „va dena rodo”.
^ Sau „liciardo”.
^ Sau „te phandaven-les”.

Le drepturi de autor anda cadai publicația