Pala o Matei 28:1-20
28 Pala o sabato, de teharin, cana vazdelas-pe o cham, ando iechto ghies le curchesco, i Maria Magdalena hai i coaver Maria găle te dichen o mormânto.
2 Hai dichta că sas iech baro izdraimos phuveaco, anda codoia că o îngero le Iehovasco avilea tele anda o cerii, gălea co mormânto hai spidea de iech rig o barr; hai acana beșelas pe leste.
3 O îngero strălucilas sar iech fulgero, hai lesco hureaimos sas parno sar o iv.
4 Codola cai păzinas o mormânto daraile cadea de zurales, că izdranas hai sas-le sar le mule.
5 Tha o îngero phendea le jiuvleanghe: „Na daran, că jianav că roden le Isusos cai sas-lo mudardo po stâlpo*.
6 Na-i cade, anda codoia că sas-lo uștiado andal mule*, cadea sar phendea. Aven hai dichen o than cai sas-lo prahome.
7 Pala codoia, jian sigo hai phenen lesche discipolenghe: «Vo sas-lo uștiado andal mule hai jial angla tumende andi Galileea. Va dichena-les code». Dichta că cadaia avilem te phenav tumenghe!”.
8 Cadea că le jiuvlea, darade, tha vi pherde bucuria, tiliarde sigo catar o mormânto hai nașle te phenen cadaia lesche discipolenghe.
9 Hai dichta că o Isus arachlea-len po drom hai phendea lenghe: „I pacea te avel tumența!”. Von pașile lestar, astarde-les pânrendar hai banghile tele angla leste.
10 Atunci o Isus phendea lenghe: „Na daran! Jian hai phenen mânre phralenghe te jian andi Galileea; hai code va dichena man”.
11 Cana le jiuvlea încă sas-le po drom, chichiva soldați găle ando foro hai phende le bare rașaienghe sea so întâmplosardea-pe.
12 Pala so cadala chidine-pe ande iech than le phurența hai cărde sfato, dine le soldațen but love rupune
13 hai phende lenghe: „Cadea te phenen le manușenghe: «Lesche discipoli avile andi riat hai ciorde-les cana amen suteam».
14 Hai, dacă o Pilat va așunela cadai buchi, na daran, va avela te phenas lesche amen sar așen le buchia”.
15 Atunci, von line le love rupune hai cărde cadea sar sas lenghe phendo. Hai cado hohaimos phirel vi aghies mașcar le iudei.
16 Tha le 11 discipoli găle andi Galileea, co plain cai phendea lenghe o Isus te jian caște dichen-pe.
17 Cana dichle-les, banghile tele angla leste, tha chichiva ci pachiaie că silo vo.
18 O Isus pașilo lendar hai phendea lenghe: „Sea o zuralimos sas manghe dino ando cerii hai vi pi phuv.
19 Cadea că jian hai cheren discipoli anda le manușa anda sea le neamuri, hai bolen-len* ando anav le Dadesco, le Șiavesco hai le spiritosco sfânto le Devlesco*
20 hai sicaven-len te încăren sea so phendem tumenghe. Hai dichta că me som tumența sea o timpo ji cana va nachena le ghiesa cadala lumeache*”.
Note de subsol
^ Dich o Dicționaro.
^ Sau „jiuvindime”.
^ Dich o Dicționaro.
^ Sau „o zuralimos le Devlesco”. Dich o Dicționaro.
^ Dich o Dicționaro.
