• Birimo ando Devel. „Me ćhivđum me kralje [. . .] Ka dav tut e narodon sar nasledstvo, ka dav tut celo phuv te ovel tikli“ (Psalam 2:6, 8).

• Naslednik ando kralj David. „Sose bijandilo amenđe o ćhavo, dobinđam e murše [. . .] Olesi vlast svugde ka širini pe hem o mir na ka ovel le krajo ko e Davideso presto hem ko oleso kraljevstvo“ (Isaija 9:6, 7).

• Bijando ko Vitlejem. „A tu, Vitlejeme [. . .] tutar ka ikljol okova kova ka ovel vladari [. . .] Olesi vlast ka ovel ki celo phuv“ (Mihej 5:2, 4).

• Odbacimo ando manuša hem mudardo. „Hine mrzimo hem smatrinđam so na vredini ništa. [. . .] Ov hine posavdo aso amare prestupija, hine phago aso amare grehija“ (Isaija 53:3, 5).

• Uskrsnimo hem ćhivdo ko baro položaj. „Sose tu na ka aćhave man ko grobo. Na ka mukhe to verno sluga te aćhol ko grobo. [. . .] Ko to desno vas isi večno bahtalipe“ (Psalam 16:10, 11).

Ando sa o manuša kola živinđe ki phuv, samo o Isus Hrist hine le osobine kola valjani te ovel le jekh šukar vladari. U stvari, jekh anđeo phenđa olese dajaće, e Marijaće: „O Devel ka del le olese dadeso presto [. . .] hem oleso Kraljevstvo na ka ovel le kraj“ (Luka 1:31-33).

O Isus na ulo vladari đi hine ki phuv. Umesto odova, ov ando nebo ka vladini upro manuša sar Kralj ando Devleso Kraljevstvo. Sose o Isus ka ovel najšukar vladari? Hajde te dikha savo hine o Isus đi živinđa ki phuv.

•   Brininđa pe ando manuša. O Isus pomožinđa sa e manušenđe bilo on te oven phure ja terne, barvale ja ćorore (Matej 9:36; Marko 10:16). Ked jekh manuš kova hine le guba alo koro leste hem molinđa le te saćari le, o Isus sažalinđa pe upro leste hem saćarđa le (Marko 1:40-42).

• Sikavđa e manušen sar te ugodinen e Devlese. Ov phenđa: „Našti te služinen e Devlese hem e barvalipase.“ O Isus pana phenđa so premalo avera valjani te ponašina amen ađahar sar so amen mangaja on te oven amencar. Isto ađahar, ov mothovđa so o Devel na dikhela samo so amen ćeraja, već hem so amen mislinaja hem sar osetinaja amen. Odolese, ako mangaja te ugodina e Devlese, valjani te pazina soj tano ko amaro vilo (Matej 5:28; 6:24; 7:12). O Isus mothovđa so ako mangaja ćaće te ova bahtale, amen valjani te sikljova so o Devel rodela amendar hem te ićera amen ko odova (Luka 11:28).

• Sikavđa e manušen sar te mangen averen. E Isusese lafija hem postupkija takinđe e manušengo vilo hem podstakninđe len hem on te ćeren diso. Ko Devleso Lafi pisini: „O narodo hine oduševimo odoleja sar sikavđa len, sose sikavđa len sar okova kova isi le autoritet“ (Matej 7:28, 29). Ov sikavđa len: „Mangen tumare dušmanen“. O Isus čak molinđa pe okolenđe kola učestvujinđe ko oleso meribe: „Mo Dad, oprostin lenđe, sose na đanena so ćerena“ (Matej 5:44; Luka 23:34).

O Isus tano sposobno te vladini upro manuša. Ama, ked ov ka počmini te vladini?