Hina Judea lawpim Jesustaqa huk fariseo runa wasinman mikuq pusarqa (Lucas 11:37, 38). Chaypim manaraq mikuchkaspanku fariseokunaqa kuchusninkukama makinkuta mayllakuqku, Jesusmi ichaqa mana chaytaqa ruwarqachu (Mateo 15:1, 2). Ichaqa manam huchachu karqa kuchuskama mayllakuypas, manataqmi chayqa Diospa kamachisqanchu karqa.

Wasinman pusaq fariseoñataqmi costumbrenkuta Jesus mana ruwasqanrayku hukmanyarurqa, Jesusñataqmi chayta musyaruspan nirqa: “Fariseokuna: Qamkunaqa vasotawan platotam hawallanta mayllankichik. Qamkunapa ukuykichikmi ichaqa huntasqa kachkan imatapas llumpayta munapayaywan hinaspa mana allinkuna ruwaywan. ¡Yaw mana entiendeq runakuna! ¿Manachu hawanta ruwaqqa ukuntapas ruwarqa?”, nispa (Lucas 11:39, 40).

Chaynatam Jesusqa Dios yupaychaq tukuq kasqankuta qawachirqa. Chay fariseokunapawan wakin runakunapa sunqunkuqa hinallam mana allin karqa kuchusninkukama makinkuta mayllakuptinkupas. Chaymi paykunata Jesus nirqa: “Wakchakunapaq imatapas ruwaspaqa sunquykichikmantayá quychik, chaynapim tukuy imapas qamkunapaq limpio kanqa”, nispa (Lucas 11:41). Chaynaqa, manam pipas allin ruwaqta hina qawawanallanchikpaqchu hukkunataqa yanapananchik, aswanqa tukuy sunqumantam.

Chaymantapas Jesusqa nirqam: “Qamkunaqa hierbabuenamanta, rudamanta hinaspa huertapi yuyukunamantam sapa chunkamanta hukninta qunkichik, ichaqa qunqarunkichikmi Diospa justicianta hinaspa kuyapayakuyninta. Kaykunataqa kasukunaykichikmi karqa wakin kamachikuykunatapas mana qunqaspa”, nispa (Lucas 11:42). Diosqa kamachirqam sapa chunka kawsaymanta hukninta payman qunankupaq (Deuteronomio 14:22). Qunankutaqmi karqa hierbabuenata, rudata hinaspa huertapi yuyukunatapas. Chaykunata quspankupas fariseokunaqa manam Diospa aswan allinnin kamachikuyninkunataqa kasukuqkuchu (Miqueas 6:8).

Jesusqa nirqataqmi: “¡Ay imaynaraq kankichik fariseokuna! Qamkunaqa anchatam munankichik yupaychana wasikunapa ñawpaq asientonkunapi tiyayta hinaspa plazakunapi rimaykusunaykichikta. ¡Ay imaynaraq kankichik! Qamkunaqa mana rikuylla sepulturakuna hinam kankichik, chaymi runakunaqa mana yachaspanku chay sepulturapa hawanta purinku”, nispa (Lucas 11:43, 44). Arí, runakunaqa mana musyayllatam chayna sepulturakunataqa saruruqku, hinaspam mana asuykunaña rikuriruqku. Chay nisqanwanmi Jesusqa qawachichkarqa fariseokunapa ima mana allin ruwasqankupas mana musyaylla kasqanta (Mateo 23:27).

Hinaptinmi Diospa kamachikuyninkunamanta sumaqta yachaq runa nirqa: “Yachachikuq, kaykunata nispaykiqa ñuqaykutapas insultawankikum”, nispa. Ichaqa paykunapas musyakunankum karqa runamasinkutaqa mana sumaqta yanapasqankuta. Chaymi Jesusqa paykunatapas nirqa: “Moisespa leyninmanta yachaqkuna, qamkunapas ¡imaynaraq kankichik! Qamkunaqa runakunamanmi churkunkichik sasa apana qipikunata, qamkunam ichaqa huknin dedollaykichikwanpas qipitaqa mana tupayllapas-tupaykunkichikchu. ¡Ay imaynaraq kankichik! Qamkunaqa Diosmanta willakuqkunapa sepulturantam ruwankichik, abueloykichikkunam ichaqa paykunata wañuchirqaku”, nispa (Lucas 11:45-47).

Chay sasa apana qipikunaqa karqa kikinkupa rikurichisqanku kamachikuykunam, hinaspa Diospa kamachikuyninkunata fariseokunapa qiwisqanku yachachikuykunam. Chay runakunaqa  llumpaysutam runamasinkuta hikutaqku kamachisqankuta kasukunankupaq. Paykunapa abuelonkuqa mana allin ruwaq kaspankum Diosmanta willakuqkunata wañurachirqaku, huk kaqnin wañuchisqankum karqa Abel. Chayna mana allin runakunam escribakunapas karqaku, yanqallam Diosmanta willakuqkunapaq sepulturantapas ruwaq tukuqku. Chaynallataqmi Diospa kachamusqan runatapas wañurachiyta munarqaku. Chayraykum Jesusqa nirqa paykunaqa Diospa qayllanpi nisyu huchayuq kasqankurayku 70 kaq watapi chinkachisqa kanankumanta.

Jesusqa nirqataqmi: “¡Ay imaynaraq kankichik Moisespa leyninmanta yachaqkuna! Qamkunaqa qichurunkichikmi yachaypa llaventa, manam kikikichikpas yaykunkichikchu, yaykuqkunatapas harkakunkichikmi”, nispa (Lucas 11:52). Paykunaqa Diospa kamachikuyninkunata runakunaman imam kaqta yachachinankumantaqa, pantachiyllam pantachiqku.

Chaynata rimaruspanmi Jesusqa wasimanta lluqsirqa, hinaptinmi fariseokunawan escribakunaqa llumpayta piñakuspanku aswanraq tapupayarqaku. Ichaqa manam yachayta munaspankuchu, aswanqa rimasqanpi pantarachispa presocharuyta munaspankum.