JUAN 2:1-12

  • CANA LLAQTAPIM CASARAKUY KARQA

  • JESUSMI YAKUTA VINOYARACHIRQA

Jesusqa punta kaq qatiqninkunawanmi Galilea law llaqtankuman kutikurqaku, paykunawan kuskam Jesusta kimsa punchawllaraq qatiq Natanaelpas rirqa. Paykunaqa Natanaelpa Cana sutiyuq llaqtanmanmi casarakuy convidoman rirqaku. Chay llaqtaqa Jesuspa llaqtan Nazaretpa waqtallanpim karqa.

Chay casarakuy convido fiestapiqa Jesuspa maman Mariapas kachkarqam. Payqa riqsinakurqam casarakuqkunapa ayllunkunawanqa, chaymi paykunata imakunapipas yanapachkarqa. Hinaptinmi vino tukuruptin Mariaqa Jesusman willaykurqa (Juan 2:3).

Mariaqa munarqam vino tukuruptin wawan imallatapas ruwananta. Jesusmi ichaqa chay tiempopi runakunapa rimasqankuman hina mamantaqa allinllata nirqa: “¿Imanasqamá ñuqanchikqa chaymanta llakikuchwan?”, nispa (Juan 2:4). Jesusqa Diospa akllasqan runa kaspanmi Jehova Diospa nisqallanta ruwanan karqa, manam hukkunapa nisqantachu. Chaymi Mariaqa saqiykuspan wakin yanapakuq runakunata nirqa: “Imapas nisusqaykichikta ruwaychik”, nispa (Juan 2:5).

Chaypiqa karqam suqta urpukuna, sapa urpumanmi iskay-kimsa puyñu yaku yaykuq. Chaymi Jesusqa nirqa: ‘Urpukunaman yakuta hillpuychik. Hinaspayá asllata wisispaykichik casarakuypi cuentallikuqman apaychik’, nispa (Juan 2:7, 8).

Cuentallikuq runaman aparuptinkuñataqmi anchata kusikurqa miskillaña vino kasqanrayku, ichaqa manam yacharqachu yakuta Jesus vinoyachisqantaqa. Chaymi chay casarakuy convidomanta cuentallikuq runaqa noviota kusisqallaña qayaspan nirqa: “Pipas allinnin kaq vinotam puntataqa servinanpaq hurqumun, runakuna sinkaruptinñam mana allinnin kaqtaqa. Qanmi ichaqa allinnin kaq vinota kunankama waqaychasqanki”, nispa (Juan 2:10).

Jesuspa kay punta kaq milagro ruwasqanta qawaspankum qatiqninkunaqa mana iskayrayarqakuchu Jesusqa Jehova Diospa kachamusqan kasqanmanta. Chaymantam Jesusqa mamanwan hinaspa wawqinkunapiwan Capernaum llaqtaman pasakurqaku, chayqa hina Galilea lawpim karqa.