MATEO 18:6-20 MARCOS 9:38-50 LUCAS 9:49, 50

  • HUKKUNATA MANA URMACHINAMANTAM JESUSQA YACHACHIRQA

  • PIPAS CONTRANCHIKPI HUCHATA RUWARUPTIN IMA RUWANAMANTA

Jesusqa warmachata pusaramuspam qatiqninkunaman yachachirqa mana hatun tukuq kaymanta. Paykunaqa warmacha hina kaspam aswan riqsisqa kaytaqa mana maskanankuchu karqa, aswanqa Jesustam qatipakunanku karqa, payqa manam hatun tukurqachu (Mateo 18:5).

Apostolninkunaqa mayqinninku aswan riqsisqa kasqankumantam atipanakurqaku. Chaymi Jesuspa kamachisqanman hina kallpanchakunanku karqa. Chaymantam apostol Juanqa Jesusta nirqa: “Yachachikuq, huk runatam rikumurqaniku qampa sutikipi demoniokuna qarquqta. Hinaptinmi harkakurqaniku ñuqanchikwan mana purisqanrayku”, nispa (Lucas 9:49).

Yaqapaschá Juanqa piensarqa apostolkunalla unquqkunata hampinankupaq hinaspa demoniokunatapas qarqunankupaq atiyta chaskisqankumanta. Chayna kaptinqa, ¿imanasqataq chay judio runaqa Jesuswan mana purichkaspanpas demoniota qarqururqa?

Jesusmi nirqa: ‘Amayá harkakuychikchu, manam pipas ñuqapa sutiypi milagrokunata ruwachkaspanqa ñuqamanta mana allintaqa chayllaqa rimanmanchu, pipas mana contranchikpi kaqqa ñuqanchikwanmi kachkan. Nikichikmi: Pipas Cristopa kasqaykichikrayku huk vaso yakullatapas haywaykusuqnikichikqa chaskinqapunim premionta’, nispa (Marcos 9:39-41).

Jesusqa manaraqmi qatiqninkunataqa huk llaqta hina kanankupaqqa huñurqaraqchu. Chaymi chay runaqa Jesuspa qatiqnin kaspanpas mana kuskaraqchu Jesuswanqa purirqa. Ichaqa manam chayraykuchu huk religionta hatarichichkarqa nitaq contranpipas kachkarqa, aswanqa Jesus Diospa churin kasqanmanta mana iskayrayasqanraykum bendecisqa kanan karqa.

Chaymi apostolkunaqa mana urmachinankuchu karqa Diospa atiyninwan imatapas chay judio runa ruwanantaqa. Chayraykum Jesusqa nirqa: “Ichaqa ñuqapi iñiq kay uchuychakunamanta hukninta pipas huchallichiqpaqqa, aswan allinmi kanman asnopa muyuchisqan molino rumita kunkanman wataruptinku lamar quchaman wischusqa kaynin”, nispa (Marcos 9:42). Chaymi Jesusqa nirqa makinku, chakinku utaq ñawinku Jesusta qatiq runakunata urmachiptinqa hurqukurunankumanta, mana chayqa Diospa munaychakuyninmanmi mana yaykunankuchu karqa, aswanqa gehena nisqanmanmi rinanku karqa. Chayqa Jerusalenpi wanukuna kañananku lawmi karqa. Chaytaqa riqsiqkum Jesuspa qatiqninkunaqa, chaymi allinta yacharqaku gehenaqa “wiñaypaq chinkachisqa kay” ninan kasqanmanta.

Chaymantapas Jesusqa nirqaraqmi: “Amam despreciankichikchu kay uchuychakunamanta huknintaqa, nikichikmi: Paykunapa angelninkum hanaq pacha taytaypa qayllanpi tukuy tiempo kachkanku”, nispa. Hinaspam Diospaqqa chay  ‘uchuychakuna’ utaq yupaychaqninkuna ancha kuyasqan kasqanta qawachinanpaq michiq runamanta Jesus willakurqa. Chay michiq runapas 100 ovejankunamanta huknin chinkarusqa, chaysi 99 ovejankunata saqiykuspan chay chinkaruqta maskaq risqa. Tariruspanñataqsi 99 ovejankunamantapas tarirusqan ovejachanmanta astawanraq kusikusqa. Chayta willaruspanmi Jesus nirqa: “Chaynallataqmi hanaq pachapi taytaypas mana munanchu kay uchuychakunamanta hukllanpas chinkarunantaqa”, nispa (Mateo 18:10, 14).

Chaymantam Jesusqa ichapas qatiqninkuna pim aswan riqsisqa kasqankumanta rimaptinku nirqa: “Kachiyuqyá kaychik hinaspayá llapallaykichik hawkalla kaychik”, nispa (Marcos 9:50). Kachiwan tupachisqa mikuyqa miskim, chaynam kuyakuywan rimaypas sumaq. Kuyakuywan rimaspaqa mana piñanakuspam hawkalla piwanpas kawsakusun (Colosenses 4:6).

Hinaspanmi pipas contranchikpi huchallikuptin imata ruwanamanta Jesus nirqa: ‘Sichum wawqiki contraykipi huchallikuptinqa rispaykiyá pantasqanmanta sapallanpi rimapayaykuy’, nispa. Ichaqa, ¿imatam ruwana mana uyariwaptinchikqa? Jesusmi nirqa: ‘Huk utaq iskay testigokunatam pusanki, chaynapi iskay utaq kimsa testigokunapa rimasqanwan ima sasachakuypas allichasqa kananpaq’, nispa. Chaynapipas mana uyariptinqa ‘iñiqkunapi punta apaqkunamanñam’ willana, chaynapi paykunaña imayna kananpaqpas tanteanankupaq. ¿Paykunatapas mana uyariptinqa? Jesusmi nirqa ‘impuestokuna mañaq hinaña chaynataq mana judio runakuna hinaña’ kananmanta. Judiokunaqa manam chayna runakunawanqa hukllawakuqkuchu (Mateo 18:15-17).

Iñiqkunapi punta apaqkunaqa bibliapa nisqanman hinam imatapas tanteananku. Huchallikuq runa huchayuq kasqanta tanteaptinkuqa, hanaq pachapipas chayna kananpaqmi tanteasqaña karqa utaq mana huchayuq kananpaq tanteaptinkuqa, hanaq pachapipas chayna kananpaqmi tanteasqaña karqa. Jesuspa chayna yachachisqanqa qipakunamanmi qatiqninkuna huk llaqta hinaña huñusqa kaptinku yanaparqa. Chayna sasachakuykuna allichaqkunatam Jesus nirqa: “Iskayllapas utaq kimsallapas sutiypi huñunakuptinkuqa paykunapa chawpinpim ñuqaqa kachkani”, nispa (Mateo 18:18-20).