Jesusqa Decapolis lawmanta kutimuspallanmi hemorragiawan unquq warmita hampirqa hinaspa Jairopa warmachantapas kawsarirachirqa. Hina chay punchawllataqmi Jairopa wasinmanta huk lawmanña richkaptin iskay ñawsakuna qatirqaku kaynata qayakuspa: “Davidpa churin, llakipayariykullawaykuyá”, nispa (Mateo 9:27).

Jesusqa Diospa akllasqan utaq Davidpa rantinpi kamachiqmi karqa, chayna kasqanmanta mana iskayrayaspankum chay runakunaqa nirqaku: “Davidpa churin”, nispa. Jesusñataqmi mana uyariqpas tukurqachu. ¿Imanasqa? Ichapas Diospi mayna iñisqankuta yachananrayku. Chay runakunam ichaqa samapakusqan wasimanña Jesus yaykuptinpas hinalla qayakurqaku. Chaymi Jesusqa nirqa: “¿Piensachkankichikchu mañawasqaykichikta ruwarunayta?”, nispa. “Arí, señorlláy” nispa mana iskayrayaspa niptinkuñataqmi Jesusqa ñawinkuta llachpaykuspan nirqa: “Iñisqaykichikman hinayá ruwasqa kachun”, nispa (Mateo 9:28, 29).

Hinaptinmi chaylla qawarikururqaku. Jesusqa wakin kutikunapi hinam paykunatapas nirqa ama pimanpas willakunankupaq. Ichaqa kusisqallaña kaspankum chay runakunaqa Jesuspa ruwasqanmanta tukuy chay lawkunapi willakurqaku.

Chay qipallanmanmi Jesuspa kasqanman aparurqaku demoniopa ñakarichisqan mana rimay atiq huk runatapas. Chaymi chay runaqa demoniota Jesus qarquruptin rimayta qallaykurqa. Runakunañataqmi uyarayaspankuraq nirqaku: “Israel nacionpiqa manam haykapipas kaynataqa rikurqanikuchu”, nispa. Chaypiqa karqakutaqmi fariseokunapas. Hinaspam Jesuspa ruwasqanmantaqa mana ima niytapas atispanku kaqlla nirqaku: “Demoniokunapa kamachiqninwanmi demoniokunataqa qarqun”, nispa (Mateo 9:33, 34).

Chaymanta qipakunallatam Jesusqa wiñasqan Nazaretman kaqlla rirqa. Ñam wataña karqa yupaychana wasipi Jesuspa yachachisqanqa. Puntata risqanpim runakunaqa Diosmanta yachachiptin kusisqallaña uyarirqaku, ichaqa chayllam piñakuspanku wañurachiytaña munarqaku. Chaywanpas hinallam Jesusqa yanapayta munarqa.

Chaymi Jesusqa sabado punchawpi kaqlla yupaychana wasiman yachachiq rirqa. Runakunañataqmi ninakurqaku: “¿Maypitaq kay runaqa yachayta hinaspa milagrokuna ruwananpaq atiyta tariramun? ¿Manachu payqa carpinteropa churin? ¿Manachu mamanpa sutinpas Maria, wawqinkunapañataq Santiago, Josey, Simon hinaspa Judas? ¿Manachu lliw paninkunapas ñuqanchikwan kuska kachkanku? Hinaptinqa, ¿maypimá kay runaqa kayna yachayta hinaspa kayna atiyta tariramun?”, nispa (Mateo 13:54-56).

Runakunaqa manam Diospa kachamusqanta hinapaqchu Jesustaqa hapiqku, aswanqa paykuna hinalla kasqanpaqmi. Chaymi waknaña yachayniyuq kachkaptinpas hinaspa Diospa atiyninwan imataña ruwachkaptinpas qipancharurqaku. Ayllunpas wiñasqanta rikusqankuraykum mana ancha kasuqkuchu. Chaymi Jesusqa nirqa: “Diosmanta willakuqqa maypipas respetasqam, wasinpi hinaspa llaqtanpim ichaqa mana”, nispa (Mateo 13:57).

Jesusqa llumpaytam llakikurqa chayna kasqankuwan. Chayraykum ‘ima milagrokunatapas chaypiqa mana ruwarqachu, aswanqa huk-iskay unquqkunallatam sanoyachirqa’ (Marcos 6:5, 6).