MATEO 8:1-4 MARCOS 1:40-45 LUCAS 5:12-16

  • JESUSMI LEPRAWAN UNQUQ RUNATA HAMPIRQA

Jesusqa tawa qatiqninkunawanmi “purirqa tukuy Galilea lawpi yupaychana wasikunapi willakustin”, paypa ruwasqankunamantaqa huk lawkunapipas yacharurqakum (Marcos 1:39). Hinaspam chayarurqaku leprawan unquq runapa llaqtankama. Qipakunaman doctor Lucaspa qillqasqanman hinaqa ‘lepra unquypa tukusqanmi’ chay runaqa karqa (Lucas 5:12). Lepra unquywan ñakariqkunaqa mana riqsipañam hinaspa mancharikunapaq hinañam karqaku.

Chay leprayuq runaqa paqwayña kasqanraykum runamasinmanta karupi yacharqa. Chaymi pimanpas unquynin ama rataykunanpaq Diospa kamachikuynin nirqa unquq runaqa kaynata qayakunanpaq: “¡Millakuypaqmi kani! ¡Millakuypaqmi kani!”, ninanpaq (Levitico 13:45, 46). Chay leprayuq runam ichaqa Jesusman asuykurqa, hinaspam qunqurakuykuspan mañakullarqa: “¡Señorlláy, munaspaykiqa sanoyaykachillawayá!”, nispa (Mateo 8:2).

Chay runaqa manam Jesus hampinanmantaqa iskayrayarqachu. ¿Imatam Jesusqa ruwarqa nisyu unqusqata qawaspan? ¿Imatam qamqa ruwawaq karqa? Jesusqa llakipayariykuspanmi makinta haywarispan llachpaykurqa, hinaspam nirqa: “Munanim sanoyanaykita, allinyayñayá”, nispa (Mateo 8:3). Hinaptinmi lepra unquyninqa pasaypaqta chinkarurqa.

Lliwmi munachwan chayna atiyniyuq hinaspa llakipayarikuqllaña kamachiwaqninchik runa kananta, ¿aw? Chay leprayuq runata Jesuspa llakipayariykusqanmi qawachiwanchik hamuq punchawpipas chayta ruwananmanta. Bibliam nirqaña: ‘Mana piyniyuqkunatawan wakchakunatam llakipayanqa, wakchakunapa kawsakuynintam salvaykunqa’, nispa (Salmo 72:13). Jesusqa hamuq punchawpim imawanpas ñakariq lliw runakunata yanapanqa, chayna ruwaytam payqa munachkan.

Diospa munayninta Jesuspa ruwasqanqa ancha riqsisqañam karqa manaraq leprawan unquq runata hampichkaptinpas, chaywanpas aswan riqsisqaraqmi rikurirurqa. Jesusqa manam munarqachu uyarisqallankuwan runakuna payta qatinankutaqa, manataqmi munarqachu payta hatunchanankutaqa. Chaymi bibliapi paymanta nirqaña: “Callekunapiqa vozninpas manam uyarikunqachu”, nispa (Isaias 42:1, 2). Chayraykum hampisqan runata nirqa: “Amam pimanpas willakunkichu, aswanqa sacerdoteman rispayá qawachikamuy, hinaspayá Moisespa kamachisqanman hina ofrendaykita quy”, nispa (Mateo 8:4).

Chay runañataqmi sanoyarusqanmanta kusisqallaña kasqanrayku llapa runakunaman willakuyta qallaykurqa. Hinaptinmi runakunaqa aswanraq Jesuswan tupayta munarqaku. Chaynapim Jesusqa llumpayta runakuna maskasqanrayku manaña hawkaqa ima llaqtamanpas chayaqchu. Chaymi mana runakunapa kasqan lawkunamanña pasakuq. Chaywanpas runakunaqa hinallam tukuy lawkunamanta riqku yachachisqanta uyariq hinaspa unquyninkumanta hampichikuq.