MATEO 17:14-20 MARCOS 9:14-29 LUCAS 9:37-43

  • PISI IÑIYNIYUQ KASQANKURAYKUM HUK WARMAMANTA DEMONIO QARQUYTA MANA ATIRQAKUCHU

Jesusqa Pedrowan, Santiagowan hinaspa Juanwan urqumanta kutimuspam achka runakunata tarirurqa. Chaypim Jesuspa wakin qatiqninkunawan escribakuna atipanakuchkasqaku. Runakunañataqmi Jesusta rikuruspa kusikuymanta taripaykuq rirqaku. Jesusñataqmi nirqa: “¿Imamantataq qatiqniykunawan atipanakuchkankichik?”, nispa (Marcos 9:16).

Chaymi huk kaqnin runa qunqurakuykuspan nirqa: “Yachachikuq, qanmanmi churiyta pusamurqani mana rimachiq demonioyuq kasqanrayku, maypipas hapiruspanmi pampaman wikapan, hinaptinmi churiyqa siminmanta pusuqullataña aqtuspan kiruntapas kirichichichin hinaspam mana kallpayuqña rikurirun. Qatiqnikikunatam nirqani churiymanta demoniota qarqunankupaq, ichaqa manam atirqakuchu”, nispa (Marcos 9:17, 18).

Escribakunaqa chay warmata Jesuspa qatiqninkuna mana hampiyta atiptinkuchusmi tukuyta nispa pinqayman churachkarqaku. Chaymi Jesusqa chay tapuqnin runapaq imatapas manaraq ruwachkaspan wakin runakunata nirqa: “Yaw, mana iñiyniyuq hinaspa mana allin runakuna, ¿haykapikamataq qamkunawan kasaq?”, nispa. Chaynataqa nirqa escribakunatam, paykunam urqupi Jesus kanankama qatiqninkunawan atipanakurqaku. Hinaspam chay demonioyuq warmapa taytanta nirqa churinta pusamunanpaq (Mateo 17:17).

Jesusman chay warma asuykuptinñataqmi ukunpi kaq demonioqa pampaman chamqaruspan chutaykachachirqa, hinaptinmi chay warmaqa pusuqullataña aqtukurqa. Jesusñataqmi taytanta tapurqa: “¿Hayka tiempoñataq churikiqa kayna kachkan?”, nispa. Taytanñataqmi nirqa: “Warmacha kasqanmantapacham, wañurachinanpaqmi achka kutita ninamanpas yakumanpas  wichiykachin”, nispa. Hinaspam pitukuykusparaq nirqa: “Imallatapas ruwayta atispaykiqa llakipayaykuwaykuyá, hinaspayá yanapaykullawayku”, nispa (Marcos 9:21, 22).

Chay runaqa llumpay llakisqallañam kachkarqa Jesuspa qatiqninkunapas demoniota mana qarquyta atisqankurayku. Chaymi Jesusqa sunqunta tiyaykachinanpaq nirqa: “¿Imanasqataq ninki ‘atispaykiqa’ nispa? ¡Iñiyniyuq runapaqqa tukuy imapas atinallanmi!”, nispa. Chay runañataqmi nirqa: “¡Iñinim! ¡Ichaqa yanapaykuwayá aswan iñiyniyuq kanaypaq!”, nispa (Marcos 9:23, 24).

Jesusqa aswanraq runakuna asuykamusqanta qawaspanmi demoniota lliwpa qayllanpi qaqchaspan nirqa: “Mana rimachiq hinaspa mana uyarichiq demonio, kamachikim paymanta lluqsinaykipaq hinaspa amaña haykapipas kaqmanta yaykunaykipaq”, nispa. Chaymi demonioqa chay warmata qaparirachispan hinaspa chutaykacharachispan lluqsirurqa, hinaptinmi warmaqa wañusqa hina rikurirurqa. Chaymi runakunaqa wañurusqantaña nirqaku (Marcos 9:25, 26). Jesusñataqmi makinmanta hapiykuspan aysariykurqa, hinaptinmi warmaqa sayarirurqa (Mateo 17:18). Chayta qawaspam runakunaqa ima niytapas mana atirqakuchu.

Jesuspa qatiqninkunaqa ñawpaqtam Diosmanta willakamunankupaq Jesus kachaptin demoniokunata qarqurqaku. Chaymi wasi ukupi Jesus kachkaptin sapallanpi tapurqaku: “¿Imanasqataq ñuqaykuqa demonio qarquyta mana atirqanikuchu?”, nispa. Jesusñataqmi nirqa pisi iñiyniyuq kasqankurayku mana atisqankumanta, hinaspam nirqaraq: “Diosta mañakuspallam kayna demoniotaqa qarquchwan”, nispa (Marcos 9:28, 29). Chay atiyniyuq demoniota qarqunankupaqqa mana iskayrayaspam Diospa atiyninta mañakunanku karqa.

Jesusqa tukunanpaqmi nirqaraq: “Chiqaptapunim nikichik: Mostaza muhu sayayllapas iñiynikichik kaptinqa, kay urqutam niwaqchik, ‘kaymanta wakman riy’ nispa, hinaptinqa chaypiñam rikurirunman. Arí, manam imapas mana atinaykichikqa kanqachu”, nispa (Mateo 17:20). Iñiyniyuq kaspallam imakunatapas ruwachwan.

Jehova Diosta yupaychasqanchikraykum wakinpiqa ima sasachakuypas hatun urqukuna hina kanman. Chaywanpas iñiyniyuq kaspaqa allintam takyasun.