MATEO 13:55, 56 MARCOS 6:3

  • JOSEYWAN MARIAQA ACHKA CHURI-WAWAYUQMI KARQAKU

  • JESUSMI CARPINTERO KAYTA YACHARQA

Jesusqa mana ancha riqsisqa Nazaret llaqtapim wiñarqa. Chay llaqtaqa Galilea law urqukunapa kasqanpim karqa. Chaymantaqa manam karupichu Galilea lamar quchapas karqa.

Chaymanqa yaqapaschá iskay watachayuq Jesus kachkaptin tayta-mamanqa Egiptomanta aparqaku. Payllaraqchusmi Joseypawan Mariapa warmankuqa karqa. Chaymantam ichaqa Santiagopas, Joseypas, Simonpas hinaspa Judaspas karqa, yaqapaschá karqa iskay warmi warmankupas. Chaymi Jesuspaqa tawa wawqinkunawan paninkunapas karqa.

Jesuspaqa karqataqmi Judea lawpi yachaq ayllun Elisabetwan Juanpas. Chaynataq hina Galilea lawpi yachaq tian Salomeypas hinaspa qusan Zebedeopas, Salomeyqa yaqachusmi Mariapa ñañan karqa. Paykunapa churi-wawankum karqa Jesuspa primon Santiago hinaspa Juan. Paykunawan kuskam Jesusqa wiñarqa, chaymi yuyayniyuqña kaspankupas anchata kuyanakuqku hinaspa Jesuspa apostolninpas karqaku.

Joseyqa anchatam carpintero hina llamkarqa wasinpi kaqkunata uywananpaq. Jesustam uywakurqa kikinpa churintapas hina, chayraykum lliw runakuna paytaqa riqsirqaku “carpinteropa churin” nispanku (Mateo 13:55). Joseyqa Jesusmanmi wiñasqanman hina carpintero  kayta sumaqta yachachirqa, chaymi Jesus wiñaruptinpas “carpintero” nispa riqsiqku (Marcos 6:3).

Chaywanpas Joseyqa wasinpi kaqkunatam astawan yanaparqa Diosta kuyanankupaq. Chaymi Joseywan Mariaqa Diospa kamachisqanman hina warmankuman wasipi kaspapas, ñanpi purispapas, puñuq yaykuspapas chaynataq hatarispapas Diosmanta yachachiqku (Deuteronomio 6:6-9). Nazaret llaqtapiqa karqataqmi Diosta yupaychana wasipas. Chaymanmi Joseyqa ayllunwan kuska Diosta yupaychaq sapa kuti riqku. Chaychá bibliaqa Jesusmanta nin costumbrasqanman hina Diosta yupaychana wasiman sabadopi risqanmanta (Lucas 4:16). Chaymantapas Jesuspa ayllunqa kusikuywanmi Jerusalenpi Diospa wasinman sapa kuti riqku, chaymantam qatiqnin yachachikuypi rimasun.