LUCAS 7:11-17

  • NAIN LLAQTAPIM JESUS HUK MOZOTA KAWSARIRACHIRQA

Soldadokunata kamachiqpa serviqninta hampirusqan qipatam Jesusqa Capernaunmanta Nain llaqtamanña rirqa. Chay llaqtaqa manam llumpay karupichu karqa. Ichaqa manam sapallanchu Jesusqa kachkarqa, aswanqa qatiqninkunawan hinaspa huk runakunawanmi. Chay llaqtamanqa ichapas inti siqaykuytaña chayarqaku, ichaqa manaraq chayaykuchkaspankum rikururqaku huk mozota pampaq riq achka judio runakunata.

Chay mozopa mamanqa llumpa-llumpaytam waqallarqa. Chullalla qari wawan wañukusqanraykum manaña piyniyuq kallarqa. Qusanpas wañukuptinqa wawallantañach llumpayta kuyarqa. Chaymi manaña pipas sunqullan tiyaykachiytaqa atirqañachu, manañataqmi paypaqqa karqachu payayaruptin pi yanapaykuqninpas. ¡Imapiraq rikukullarqa!

Chay warmipa waknaniraq waqallasqanta qawaspanmi Jesusqa llumpayta llakirikururqa. Hinaspam kuyapayakuywan sumaqllata nirqa: “Amaña waqaychu”, nispa. Ichaqa manam chayllatachu ruwarqa, aswanqa chakanaman asuykuspanmi ayata llachpaykurqa (Lucas 7:13, 14). Jesuspa chaykuna ruwasqanta qawaspankum mozomanta waqaq runakunañataq richkaspanku sayarurqaku. Yaqachá yuyaymanarqaku Jesuspa nisqanpi hinaspa ima ruway munasqanpipas.

Jesuswan puriq runakunapas yachaytachá munachkarqaku Jesuspa ima ruwananmanta. Unquqkuna hampisqanta qawaspankupas manam haykapipas rikurqakuchu wañuqkuna kawsarichisqantaqa. Yacharqakum ñawpaqtaqa Diospa serviqninkuna wañukuqkunata kawsarichisqankuta. Ichaqa, ¿Jesusqa atinmanchu karqa wañuqkuna kawsarichiyta? (1 Reyes 17:17-23; 2 Reyes 4:32-37). Jesusmi nirqa: “Mozo, ñuqam niki: ¡Hatariy!”, nispa (Lucas 7:14). Hinaptinmi chay mozoqa tiyariruspan rimayta qallaykurqa. Jesusñataqmi mamanman quykurqa. Mozopa mamanqa mayna-maynatach kusikurqa kuyasqan wawan kawsarisqanwanqa.

 Chayta qawaq runakunapas kawsay qukuq Jehova Diostam hatunchayta qallaykuspa nirqaku: “Diosmanta ancha riqsisqa willakuqmi ñuqanchik ukupi rikurirun”, nispa. Wakinkuñataqmi nirqaku: “Diosmi llaqtanta llakipayaykun”, nispa (Lucas 7:16). Jesuspa chay ruwasqanmantaqa wiñasqan Nazaret llaqtapipas hinaspa huk lawkunapipas yacharurqakum. Chaymantapas Judea law karu llaqtakunapipas yacharurqakum.

Bautizaq Juanpas hinallaraqmi presochasqa kachkarqa, ichaqa anchatam yachayta munarqa Jesuspa ruwasqankunamanta qatiqninkuna willasqanrayku. ¿Imatam chaypaq ruwarqa?