LUCAS 10:38–11:13

  • JESUSQA MARTATAWAN MARIATAM WATUKURQA

  • MANA SAQIYKUSPAM DIOSTAQA MAÑAKUNA

Betania llaqtaqa Jerusalenpa waqtallanpim karqa, chay iskaynin llaqtakunapa chawpinpim Olivos muqupas karqa (Juan 11:18). Chay Betaniamanmi Jesusqa Martatawan ñañan Mariata watukuq rirqa, paykunaqa turinku Lazaropiwanmi Jesuspa kuyasqan runakuna karqaku. Chaymi kusikuyllawanña Jesustaqa chaskirqaku.

Diospa kachamusqan runata kusikuywan chaskisqanraykum Martaqa miski mikuyta Jesuspaq yanupurqa. Chaymi yanukunankama ñañan Mariañataq Jesuspa ñawpaqninpi tiyaykuspan rimasqanta uyarirqa. Martañataqmi unayniqmanta Jesusta nirqa: “Señor, ¿manachu imapas qukusunki tukuy imata ruwanaypaq ñañay sapallayta saqiruwasqanmanta? Chaynaqa, niykuyyá yanapawananpaq”, nispa (Lucas 10:40).

Jesusqa manam imatapas Mariataqa nirqachu, aswanqa Martatam yanukuyllapi umayuq kasqanrayku sumaqllata nirqa: “Marta, Marta, tukuy ima ruwaywan manaña haypakuspaykim muspaypi hinaña kachkanki. Manam tukuy imataraqchu ruwanaqa, aswanqa hukllatam. Mariaqa allinnin kaqtam akllakurun, chaytaqa manam pipas qichunqachu”, nispa (Lucas 10:41, 42). Chaynatam Jesusqa qawachirqa tukuy rikchaq mikuy yanunanmantaqa imapas kaqllata yanukuy aswan allin kasqanta.

Martaqa qukuykuqllaña kaspanpas llumpaytam yanukuyllamanña qukururqa, chaymi Diospa churinpa yachachisqantaqa mana uyarichkarqachu. Mariam ichaqa allin kaqta ruwachkarqa, paytaqa Jesuspa yachachisqanta uyarisqanmi imakunapipas allintapuni yanaparqa. Mariapa chay ruwasqantam ñuqanchikpas qatipakunanchik.

Chaymanta huk kutipiñataqmi Jesuspa huk kaqnin qatiqnin nirqa: “Señor, yachaykachiwaykuyá Diosta imayna mañakuyta, imaynam Juanpas qatiqninkunata yachachisqanman hina”, nispa (Lucas 11:1). Chaymantaqa ñam Jesusqa wata parten ñawpaqtaraq ancha riqsisqa yachachikuyninpi yachachirqaña (Mateo 6:9-13). Ichaqa manachusmi tapuqnin qatiqninqa Jesuspa chay yachachisqantaqa uyarirqaraqchu, chaymi kaqmanta yachachirqa. Hinaspapas huk willakuywanmi yachachirqa Diostaqa mana amispa achkakama mañakunamanta.

Nirqam: “Huknikichik kuyasqan amistadninman chawpi tutata rispan ninman: ‘Wawqilláy, aynillapiyá kimsa tantaykita quykullaway, amistadniymi illasqanmanta kunallan chayaramun, hinaptinmi imallaypas mana kanchu payman quykunaypaq’, nispa. Amistadninñataq wasi ukumanta nimunman: ‘Ama umayta nanachiwaychu, punkuqa llavewan wichqasqañam kachkan, warmachaykunapas ñuqawanmi puñuchkankuña, manañam hatarimuymanñachu imatapas qunaypaqqa’, nispa. Chaymi qamkunata nikichik: Mana hatariyta munaspanpas, mañapayasqanraykum hatarispan imapas munasqanta quykunqa”, nispa (Lucas 11:5-8).

Chay willakusqanpi runaqa mañapayasqanraykum chay runamasintaqa yanapaykurqa. Chaynatam Jesusqa qawachirqa Diosqa aswan kuyapayakuq kasqanrayku yupaychaqninkunata mañakusqanman hina aswanraq yanapananmanta utaq imatapas qunanmanta. Chaymi nirqaraq: “Hinallayá mañakuychik hinaptinqa qusunkichikmi, hinallayá maskaychik hinaspaqa tarinkichikmi, hinallayá punkuta takaychik hinaptinqa kichaykusunkichikmi. Pipas mañakuqqa chaskinmi, pipas maskaqqa tarinmi, punku takaqpas kichaykachikunmi”, nispa (Lucas 11:9, 10).

Chaymantapas Jesusqa hinallaraq chaymanta rimaspanmi nirqa: “¿Mayqinnikichiktaq churikichikmanqa culebrata quykuwaqchik challwata mañakusuchkaptikichik? Utaq, ¿atuq-atuq uruta  quykuwaqchik runtuta mañakusuchkaptikichik? Qamkunaqa mana allin runakuna kachkaspaykichikpas allin kaqkunatam churikichikmanqa qunkichik. Hinaptinqa, ¡aswanraqchiki mañakuqninkunamanqa hanaq pachapi kaq taytaqa chuya espirituta qunqa!”, nispa (Lucas 11:11-13). Chaynaqa, manam iskayrayachwanchu taytanchik Jehova Diosqa mañakusqanchikta uyarinanmantaqa nitaq mañakusqanchikman hina quwananchikmantaqa.