¿WAKINPIQA sapallayki kaspachu llumpayta llakikunki?... ¿Ninkichu: “Ñuqataqa manam pipas kuyawanchu” nispa?... Achka warmakunam chayna kallachkanku. Ichaqa Diosmi nin: ‘Ñuqaqa manam qunqasqaykichu’, nispa (Isaias 49:15). Jehova Diosqa anchatam kuyawanchik ¿aw?...

Bibliata huk kaqnin qillqaqpas nirqam: ‘Dios taytalláy, ñuqataqa taytayña mamayña saqiruwaptinpas qamllañam uywakullawanki’, nispa (Salmo 27:10). Kay rimaykunaqa sunqunchiktam tiyaykachin ¿aw?... Jehova Diosqa niwanchiktaqmi: ‘Amayá manchakuychu. Ñuqam qanwan kachkani’, nispa (Isaias 41:10).

Chayna kaptinpas Jehova Diosqa manam harkakunchu wakinpi satanas diablo ñakarichiwananchiktaqa. Huk kutipim Jesusta diablo llumpayta ñakarichiptin Jesusqa taytanta mañakurqa: “Diosnilláy, Diosnilláy, ¿imanasqataq saqirullawanki?”, nispa (Mateo 27:46). Jesusqa ñakarispanpas yacharqam taytanpa kuyasqanta (Juan 10:17). Yacharqataqmi Diosqa satanaspa ñakarichiwasqanchikta mana harkakusqantapas. Hamuq yachachikuykunapim chaymanta astawanraq yachasunchik.

Warmacha kaspaqa imatapas astawanmi manchakunchik. ¿Haykallapipas chinkarurqankichu?... ¿Mancharikurqanki?... Achka warmachakunam chinkaruspaqa manchakunku. Jesuspas yaqa chaynamantam huk kutipi willakurqa, ichaqa manam warmachamantachu aswanqa oveja chitachamantam.

 Ovejachakunaqa manam llumpay hatunchu nitaq kallpasapachu kanku, aswanqa michiqninpa qawasqallanmi hawka kanku. Yaqa chaynam qampas warmallaraq kasqaykirayku tayta-mamaykipa uywasqallanraq kachkanki.

Jesusqa willakurqa pachak ovejakunata huk runa michichkaptin huknin chinkarusqanmantam. Ichapas chay chitachaqa mana musyakuspallan wakinmanta rakikuruspa chinkarurqa. Maynataya chinkaruspanqa mancharikurqa ¿aw?...

Chay michiq runaqa, ¿imatataq ruwanman karqa huknin chitachan chinkarusqanta musyakuspanqa? ¿“Kikillanchiki kutikamunqa” nispachu hawka kakunman? Icha, ¿isqun chunka isqunniyuq ovejankunata saqiykuspachu chitachanta maskaq rinman? ¿Yanqapaqñachu kanman tukuyta ruwaspa chullalla chitachata maskay?... Chay chitacha kaspaykiqa, ¿munawaqchu michiqniki maskasunaykita?...

Chay michiq runaqa ovejachankunata kuyasqanraykum chay chinkaruq chitachan maskaq rirqa. ¡Maynataya chitachaqa kusikurqa michiqnin tariruptinqa! Michiqpas anchatam  kusikurqa chitachanmantaqa. Chay chitachanmantam aswanqa kusikurqa isqun chunka isqunniyuq mana chinkaruq ovejankunamantaqa. ¿Pitaq kanman chay michiq runa hina ancha kuyawaqninchikqa?... Jesuspa willakusqanman hinaqa Jehova Diosmi.

Paymi pimantapas aswan allin michiqqa. Diosqa kuyanmi llapallan churinkunata hinaspa qam hina warmachakunatapas. Manam munanchu ñakarinanchiktaqa nitaq wañurunanchiktapas. Pay hina kuyakuqqa manam pipas kanchu (Mateo 18:12-14).

Qampaqqa, ¿taytayki hinachu Jehova Diosqa kanman?... Ichaqa Jehova Diostaqa manam rikuyta atichwanchu espiritu kasqanrayku. Chayna kaspanpas payqa qawamuwachkanchikmi hinaspam imapipas yanapawachkanchik. Paywanqa runamasinchikwan hinam rimachwan. Payqa anchatam munan payta mañakunanchikta.

Chayrayku, ¿imatam ruwanayki wakinpi llakisqa kaspaykiqa?... Jehova Dioswanmi rimanayki. Paywan  rimaspaykiqa hawkaraqmi kanki. Jehova Diosqa kuyasunkim, manam chaymantaqa iskayrayanaykichu. Bibliata kichaykuspa qawasun Salmo 23 capitulopa qallariynin versiculonkunata. Chaypim nin: ‘Dios taytalláy, qamllam kanki ñuqallaypa michiqnillayqa, manam imapas pisiwanqañachu. Sumaqllaña ikllirimuq pastokunapim ñuqallaytaqa samaykachiwanki. Ñuqataqa pusawanki yakukunapa hawkalla samananmanraqmi’, nispa.

Tawa kaq versiculopipas ninraqmi: ‘Tutay-tutay wayqupiña purillaspaypas manañamriki manchakuniñachu. Ñuqawanqa kikikiraq kasqaykiraykum manapuniña manchakuniñachu. Qamqariki ñuqallaytam kallpanchawanki varaykiwanpas tawnallaykiwanpas’, nispa. Kaypi nisqanman hinam Jehova Diosqa serviqninkunata yanapan ima sasachakuypiña kaptinkupas. Jehova Diosqa, ¿qamtapas yanapasunkimanchu?...

Payqa oveja michiq hinam mana munanchu imawanpas serviqninkuna ñakarinankutaqa. Chaymi bibliapi yachachikuykunawan yanapan allinta kawsakunankupaq. Serviqninkunapas payllapim hapipakunku ima sasachakuypiña kaspankupas. Michiqkunaqa ovejachankuta imamantapas harkanankupaqmi tukuyta ruwanku. Chaytam Davidpas  ruwarqa ovejachankunata leon hinaspa ukumari apakuyta munaptin (1 Samuel 17:34-36). Diospas serviqninkunatam mana allinkunamanta harkan, chaymi paykunaqa hawka kawsakunku.

Jehova Diosqa serviqninkunata ancha kuyasqanraykum imamantapas harkaykun. Paymantam biblia nin: ‘Ovejankuna michiq hinaraqmi Diosqa. Uñachankuna brazonpi huqariq hinaraqmi Diosqa’, nispa (Isaias 40:11).

Jehova Diospa kuyawasqanchikqa ancha kusikuypaqmi ¿aw?... ¿Munawaqchu paypa oveja chitachan hina kayta?... Ovejachakunaqa michiqninta kasukuspam paywan kuskalla kanku. Qamqa, ¿kasukunkichu Jehova Diosta?... ¿Paywan kuskallachu kanki?... Chaykunata ruwaspaqa Jehova Diospa yanapasqanmi kanki.