Yachachikuypa kasqanman rinapaq

Yachachikuyman rinapaq

 22 KAQ YACHACHIKUY

Ama llullakusunchu

Ama llullakusunchu

SICHUM huk warmacha mamanta ninman: “Escuelaymanta lluqsimuspallam wasiman chaylla kutimusaq”, nispa. Ichaqa warmamasinkunawan pukllakuspanñataq unaymantaña wasinman kutispa ninman: “Chayraqmi escuelaymanta kachaykamuwanku”, nispa. ¿Allinchu kanman chayna nisqan?...

¿Ima mana allintam kay warma ruwarun?

Utaq pelotawan wasipi ama pukllananpaq taytan niptin warmañataq wasipi pukllaruspan ninman: “Manam pukllarqanichu”, nispa. ¿Allinchu kanman chayna nisqan?...

Jesusmi nirqa: “‘Arí’ nispaqa chayman hinayá ruway, ‘manam’ nispapas manam nisqaykiman hinayá ruway, imatapas kayna rimasqaykiman yapaptikiqa satanasmantam”, nispa (Mateo 5:37). ¿Imatataq kay nisqanwan yachachichkarqa?... Mana llullakunamantam.

Bibliapim iskay runakunamanta rimaspan yachachin  llullakuyqa llumpay mana allin kasqanta. Paykunamantayá willasqayki.

Jesuspa wañukusqan yaqa iskay killa pasayllatam, achka qawaqmanta runakuna Jerusalenman rirqaku judio runakunapa pentecostes fiestankuman. Chaypim apostol Pedro alli-allinta yachachirqa Jesusqa Jehova Diospa kawsarichisqan kasqanmanta. Chay runakunaqa wamaqllaraq chay kutipi Jesusmanta uyarispankum astawan yachayta munarqaku.

Chaymi Jerusalen llaqtapi aswan unayraq kaykuptinku qullqinku tukuruptin wakinpaqqa manaña mikunankupaqpas karqañachu. Hinaptinmi Jerusalenpi yachaq wakin iñiqkuna imankutapas rantikuspa apostolkunaman qullqita qurqaku. Chaynapi paykunaña mana qullqiyuq iñiqkunata yanapaykunanpaq.

Safirawan qusan Ananiaspas kikinku tanteakuspankum chakrankuta rantikurqaku. Ichaqa manam chay iñiqkuna yanapayta  munasqankuraykuchu, aswanqa runakunapa allin qawasqan kayta munasqankuraykum. Paykunaqa rantikusqanku qullqitam wakillanta quyta munarqaku. Chaymi tanteanakurqaku wakillanta quspankupas “llapantam quchkaniku” nispa ninankupaq. ¿Allinchu karqa chay ruwasqanku?...

Chaymantam Ananiasqa apostolkunaman qullqita aparqa. Ichaqa Jehova Diosqa qawamuchkarqam wakillan apasqanta. Chaymi apostol Pedroman willarqa Ananiaspa llullakusqanmanta.

¿Ima nispam Ananiasqa Pedrota llullakurqa?

Pedroñataqmi nirqa: ‘Ananias, ¿imanasqamá satanaspa munaynintaqa ruwarunki? Allpaykiqa qampam karqa. Rantikuptikipas qullqiqa kikikipam karqa. Hinaptinqa, ¿imanasqamá lliwta apamusqaykita nispaykipas wakillanta apamuchkanki? Chaywanqa Diostam llullakurunki, manam ñuqallaykutachu’, nispa.

Ananiaspa ruwasqanqa llullakuymi karqa rimasqanman hina mana ruwasqanrayku. Chaymi biblia nin: “Chayta uyariruspanmi Ananiasqa qunqaymanta pampaman wichiykuspan wañururqa”, nispa. Huchanraykumá wañurqa, hinaptinmi chaylla pamparurqaku.

¿Imapim Ananiasqa tukurqa llullakusqanrayku?

 Yaqa kimsa hora pasaytañataqmi warmin Safira chayarurqa. Ichaqa manam qusan wañukusqantaqa yacharqachu. Paytam Pedro nirqa: “Niykuway, ¿kayna preciopichu allpaykichikta rantikururqankichik?”, nispa.

Safirañataqmi nirqa: “Arí, chaynapim”, nispan. Chaynata nispanmi paypas qusan hina llullakusqanrayku huchanpi wañururqa (Hechos 5:1-11).

¿Imatam kaymanta yachachwan?... Llullakuyqa hatun hucha kasqantam. Jehova Diosqa munan imam kaqllata maypipas rimananchiktam. Wakin runakunam ichaqa ninku llullakuyqa mana hucha kasqanta. ¿Allinchu chay nisqanku?... ¿Yacharqankichu unquypas, wañuypas hinaspa ñakariypas diablopa llullakusqanwan rikurisqanta?...

¿Pitaq Jesuspaqqa punta llullakuq karqa? ¿Imam llullakuywan qallarirqa?

¿Yuyachkankichu Evata diablo pantarachisqanta? Diabloqa nirqam allin kaqta hinaspa mana allin kaqta yachanapaq sachapa rurunta mikuruspaqa mana wañunanmanta. Evañataqmi diablota kasuspan mikururqa hinaspa Adanmanpas mikurachirqa. Chaynapim paykunaqa huchasapa runakunaña rikurirurqaku. Chaymantapacham churinkupas huchasapaña naceqku hinaspa ñakariytawan wañuyta riqsirqaku. ¿Imanasqam tukuy chaykuna karqa?... Diablo llullakusqanraykum.

Chaymi Jesusqa diablomanta nirqa: “Payqariki llullam hinaspapas llullakunapa taytanmi”, nispa. Kaypi nisqanman hinaqa pipas llullakuqqa diablotam qatipakuchkan.  Chaytam yuyarinanchik ama llulla runakuna kanapaq (Juan 8:44).

¿Imanasqataq wakinpiqa llullakuyta munawaq?... Ichapas imatapas pakirusqaykirayku utaq ima mana allintapas ruwarusqaykirayku ¿aw?... ¿Allinchu kanman chay ruwasqaykimanta hukkunaman tumpayniki utaq mana yachaq tukuyniki?...

¿Imanasqataq wakinpiqa llullakuyta munawaq?

Chaymantapas, ¿allinchu kanman tareaykikunata llapanta mana ruwachkaspa “tukuruniñam” niyniki?... Ananiaswan Safiraqa llullakuna kasqankuraykum wañururqaku.

Chayraykum imataña ruwaruspapas imam kaqta mana willakuspanchikqa astawan imamanpas yaykurusun. Imamantapas imam kaqtam willakunanchik, manam waki-wakillantachu. Chaymi biblia nin ‘ama llullakuspa chiqapllata piwanpas rimananchikpaq’. Jehova Diosqa imam kaqta rimaqmi. Chaynaqa paytayá qatipakusun (Efesios 4:25; Colosenses 3:9).

Mana llullakuspa rimanamantam willakuchkan Exodo 20:16; Proverbios 6:16-19; 12:19; 14:5; 16:6 hinaspa Hebreos 4:13.