¿Pitaq unancharqa pichinkuchakunata?

WILLASQAYKI, ¿uyariykuyta munawaqchu?... Qawakuykuy makichaykita hinaspa imatapas hapiykuy. Makinchikqa imatapas sumaqtam ruwan ¿aw? ¿Pitaq ruwarqa?...

Makinchikpas, siminchikpas, sinqanchikpas hinaspa ñawinchikpas Diospa ruwasqallanmi. ¿Agradecekunkichu ñawichayuq kasqaykimanta?... Ñawichanchik kaptinmi waytakunata, pillpintukunata, sachakunata hinaspa kaypi qawasqayki mikuq mallqu pichinkuchakunatapas qawanchik. ¿Manachu chayqa kusikunapaq?

Ichaqa, ¿pitaq chaykunata ruwarqa? ¿Runa? Manam. Runakunaqa wasi ruwayta yachaspankupas manam atinmankuchu waytakunata, pichinkuchakunata hinaspa sachakunata ruwaytaqa utaq unanchaytaqa. Icha, ¿ima niwaqtaq?...

Diosmi hanaq pachatapas, kay pachatapas hinaspa runakunatapas unancharqa. Chaytam alli-allin yachachiq Jesuspas willakurqa (Mateo 19:4-6).

¿Imaynanpitaq Jesusqa yacharqa? ¿Diostachu unanchaqta rikurqa?... Arí, qaritawan warmita Dios unanchaptinqa ñam  Jesusqa karqaña. Payqariki hanaq pachapi Diospa punta unanchasqanmi karqa, chaymi kuska yacharqaku.

Chayraykum Diosqa nirqa: ‘Runata ruwasun’, nispa (Genesis 1:26). ¿Piwantaq Diosqa rimachkarqa?... Churinwanmi. Paymi kay pachaman hamurqa hinaspanmi alli-allin yachachiq karqa.

Mayna sumaqmi taytanwan kasqanqa karqa ¿aw? Chayraykum Jesusmanta yachaspanchikqa taytanmanta yachachkanchik. Diosninchik kay pachapi tukuy imakunata unanchaptinmi Jesusqa chaypi kaspan paymanta imakunatapas yacharqa. ¡Chaychá Jesusqa alli-allin yachachiq karqa!

¿Diosqa llakisqachu kanman karqa churinta manaraq unanchachkaspanqa?... Manam. Hinaspanqa, ¿imanasqataq imakunatapas unancharqa?... Kuyakuqllaña kasqanraykum. Diosqa  munarqam unanchaptin hukkunapas kawsakuyniyuq kanankuta. Chaymi riqsikunanchik Dios kawsakuyta quwasqanchikmanta.

Diosqa unanchasqankunawanmi kuyawasqanchikta qawachiwanchik. Intita mana unanchaptinqa tutayaypi kaspanchikchá chiripi wañuruchwan. ¿Kusikunkichu intiyuq kasqanchikmanta?...

Paratapas mana unanchaptinqa manachiki waytakunapas wiñanmanchu. Pukllakunaykirayku mana parata munaptikipas parawanmi waytakuna sumaqllataña wiñan. Hinaptinqa, ¿pitataq agradecekunanchik?... Diostam. ¿Mikusqanchik frutakunamantaqa?... Hina payllatataqmi agradecekunanchik.

Ichapas runakuna tapusunkiman: “¿Diosllachu runakunatapas hinaspa uywakunatapas unancharqa?”, nispa. Hinaptinqa, ¿ima niwaqtaq?... Niwaqmi: “Arí, Diosmi runakunatapas hinaspa uywakunatapas unancharqa”, nispa. ¿“Monomantam runaqa rikurimurqa” nispa nisuptikiqa? Willawaqmi Diosqa sapa-sapaqta imatapas unanchasqanmanta (Genesis 1:26-31).

Wak wasita runa ruwaptinqa, ¿pitaq ruwarqa waytakunata, sachakunata hinaspa uywachakunata?

¿“Diosqa manam kanchu” nispa nisuptikiqa? ¿Ima niwaqtaq?... Wasita qawarichispam tapuwaq: “¿Pitaq wak wasita ruwarqa?”, nispa. Lliw runam yachanchik wasikunaqa runakunapa ruwasqan kasqanta, manayá wasikunaqa kikillanmantachu rikurirunman (Hebreos 3:4).

Chaymantapas waytakunata qawachispam niwaq: “¿Pitaq kay kuyayllapaq waytakunata ruwarqa?”, nispa. Arí, imaynam wasipas mana kikillanmantachu  rikurirurqa chaynam waytakunapas mana kikillanmantachu rikurirurqa, aswanqa Diosmi unancharqa.

Niwaqtaqmi pichinkuchakunapa waqasqanta uyarinanpaq. Hinaspam tapuwaq: “¿Pitaq kuyayllapaqta waqaq pichinkuchakunata unancharqa?”, nispa. Paykunataqa kay pachatapas hinaspa hanaq pachatapas unanchaq Diosmi unancharqa.

Chaynata niptikipas ichapas wakinqa Diosta mana rikusqankurayku nisunkimanraq: “Diosqa manam kanchu”, nispa. Chayna rimaq runakunaqa achkam kachkanku.

Arí, bibliapas chaymantaqa ninmi: ‘Diostaqa manam pipas rikurqachu’, nispa. Manamá yuyayniyuqkunapas nitaq wawakunapas Diostaqa rikuchwanchu. Chaymi Diospa uyantaqa mana ruwayta atichwanchu. Kikin Diosmi bibliapi nin: ‘Amam taytacha-mamachataqa ruwankichikchu imaman rikchakuqtapas’, nispa (Exodo 20:4, 5; 33:20; Juan 1:18).

Hinaptinqa, ¿imaynatataq yachachwan chiqaptapuni Dios kasqanta? Ichapas mana kanchu. Tapusqayki, ¿wayrata rikuruwaqchu?... Hinaptinqa, ¿imaynatataq yachawaq wayra kasqanta? Sachakuna kuyutyachisqanta qawaspam.

¿Imaynatataq yachachwan wayra kasqanta?

Chaynam Dios kasqantapas yachanchik imapas unanchasqankunata rikuspanchik. Diospa unanchasqanmi waytakuna hinaspa pichinkuchakuna rikusqanchikpas.

Hukkunaqa tapusunkimantaqmi: “¿Pitaq intitapas hinaspa allpatapas ruwarqa?”, nispa. Bibliaqa nichkanmi ‘cielokunatawan kay pachataqa Dios unanchasqanmanta’ (Genesis 1:1). Arí, Diosmi tukuy imatapas unancharqa. ¿Chaynachu manachu?...

 ¿Manachu kusikunapaq kawsaq runa kasqanchikqa? Kawsaspanchikmi pichinkuchakunapa waqasqanta uyarinchik, waytakunapa sumaqllaña panchirimusqanta qawanchik hinaspa kawsaykunapa ruruntapas mikunchik.

Mayna-maynatam Diospa tukuy ima unanchasqankunamanta agradecekunanchik. Ichaqa, ¿imaynatam chayta qawachichwan?... Diosmanta yachaspa hinaspa kamachikuyninkunata kasukuspam. Tukuy chaykunawanmi Dios kuyasqanchiktapas qawachisun.

Diostam agradecekunanchik tukuy ima ruwasqanmanta. Chaypaq qawasunchik Salmo 139:14; Juan 4:23, 24; 1 Juan 5:21 hinaspa Apocalipsis 4:11.