JEHOVA DIOSQA tukuytam ruwan wawakunata ima mana allinmantapas harkananpaqqa. ¿Imanasqa? Warmachallaraq kaspanku qawana hinaspa yanapana kasqankuraykum. Chaynam animalchakunapas tukuyta ruwanku wawankunata ima mana allinmantapas harkanankupaq.

Tapusqayki: ¿Imanarusunkimantaq uqllaq wallpaman asuykuptiki? Rapranta wiñaykachispanchiki imanarusunaykipaqpas pawaykusunkiman ¿aw? ¿Imanasqataq chaytaqa ruwan?...

Chaytaqa ruwan chiwchichankunata harkakunanpaqmi, manam munanchu imapaqpas asuykunaykitaqa. Purunpi yachaq wakin animalchakunapas chaynallatam ruwanku. ¿Pitaq ñuqanchiktapas harkawanchik imapas mana allinkunamanta?... Arí, Jehova Diosmi. Chaymi bibliapi niwanchik Jehova Diosqa mallquchankunata rapranwan harkaq anka hina kasqanmanta (Deuteronomio 32:11, 12).

¿Imaynatam kay uywacha wawankunata harkachkan?

 Jehova Diospa ancha kuyasqan churin Jesuspas kay pachapi wawacha kaspanqa ima mana allinkunamantapas harkasqam kanan karqa. Hanaq pachapi kaspanmi ichaqa mana, ¿imanasqa? Atiyniyuq angel kasqanraykum.

Jehova Diospa munayninta ruwananpaqmi Jesusqa wiñanan karqa. Chayta mana munaspanmi satanasqa wawallaraq kachkaptin Jesusta wañurachiyta munarqa. Ichaqa Diosmi wañuymanta harkaykurqa, ¿munawaqchu imaynata harkaykusqanmanta yachaykuyta?...

Jesuspa nacesqan lawpim satanasqa lucerota kancharichirqa. Chaymi lucerokunata qawaspa adivinaq runakuna karullay-karumantaraq chay lucerota qatirqaku Jerusalenman chayanankukama. Chaypim tapukurqaku judiokunapa kamachiqnin maypi nacenanmanta. Hinaptinmi bibliapa willakusqanmanta yachaq runakuna nirqaku: ‘Judea law Belen llaqtachapim’, nispa (Mateo 2:1-6).

¿Imatam adivinaq runakunata Dios nirqa Jesusta wañuymanta harkananpaq?

 Kamachikuq Herodespas yacharurqam Belen llaqtapi judiokunapa kamachiqnin nacesqantaqa. Chaymi adivinaq runakunata nirqa: ‘Rispaykichikyá wawachata maskamuychik, tariruspaykichikñataqmi kutimuspa willaykuwankichik’, nispa. ¿Imanasqataq Herodesqa chaynata nirqa?... Tariruspan wañurachinanpaqmi, manam munarqachu rantinpi pipas kamachinantaqa.

¿Imaynatam Diosqa churinta wañuymanta harkaykurqa?... Chay adivinaq runakunaqa Jesusta tariruspankum tukuyta qurqaku, hinaptinmi Diosqa sueñoyninkupi nirqa amaña Herodespata kutinankupaq. Chaymi huk lawnintaña llaqtankuman kutikurqaku, chayta yacharuspanmi Herodesqa llumpayta piñakururqa. Hinaspanmi Jesusta wañuchiyta munaspan kamachirqa Belenpi wawachakunata manaraq iskay watachayuqkunata wañuchinankupaq. Jesusmi ichaqa manaña Belenpiñachu karqa.

¿Imanasqa?... Chay adivinaq runakuna ripukuptinkum Jehova Diosqa Joseyta sueñoyninpi nirqa Egiptoman ayqikunankupaq. Chaymi Jesustaqa mana wañuchirqakuchu. Watakuna pasaytam Joseywan Mariaqa Egiptomanta kutirqaku, hinaptinmi Diosqa kaqmanta Joseyta sueñoyninpi nirqa Nazaretman rinanpaq. Chaypiqa Jesusqa hawkañam kawsakurqa (Mateo 2:7-23).

¿Imaynatawanmi Diosqa Jesusta wañuymanta harkaykurqa?

Kaykunawanmi yacharunchik churinta Dios wañuymanta harkaykusqanta ¿aw?... Qampas purunpi mallqu uywacha hinaspa wawallaraq Jesus hinam kanki ¿aw?...  Ichaqa kanmi ima mana allintapas ruway munasuqnikikuna. ¿Pikunataq kanku?...

Bibliam willawanchik satanasqa leon hina kasqanta. Imaynam leonkunapas taksa animalchakunata hapirunankupaq qawanku, yaqa chaynam satanaswan demoniokunapas warmachakunata imanarunankupaqpas qawanku (1 Pedro 5:8). Jehova Diosmi ichaqa aswan atiyniyuq kasqanrayku kasukuqnin warmakunataqa imamantapas harkaykun hinaspa yanapaykun.

Kay qillqapa 10 kaq yachachikuyninpi yachamusqanchikman hinaqa, ¿ima ruwananchiktam satanaswan demonionkunaqa munanku?... Qari kayninchikwan utaq warmi kayninchikwan mana allinkunata ruwananchiktam. Ichaqa, ¿pikunallam kuskaqa puñunanku karqa?... Casarasqa kaqkunallam.

Chayna kaptinpas wakin runakunaqa warmachakunawan kakuytam munanku. Chayraykum wakin warmachakunapas qari kayninkuwan utaq warmi kayninkuwan mana allinkuna ruwayta yacharunku. Chaynam karqa Sodoma llaqtapi “mozokunapas machukunapas”, paykunaqa Lotta watukuq runakunawanmi puñuyta munarqaku (Genesis 19:4, 5).

Kunanpas kanmi warmachakunawan kakuyta munaq runakuna utaq warmakunapas. Chaymi qampas Jesus hina chay mana allin runakunamanta harkasqa kanayki. Paykunaqa amigochayki tukuspankum qanwan puñunankupaq nisunkiman: “Kayta utaq wakta qusqayki, ichaqa amam pimanpas willankichu”, nispa. Ichaqa paykunaqa satanaswan demonionkuna hinam aychankupa munasqallanta ruwayta munaspanku qanwan kakuyta munanku. ¡Chayqa manamá allinchu!

¿Imatataq qanwan ruwanmanku?... Qari kaynichaykita utaq warmi kaynichaykitam llachpapayanmanku utaq paykunapawan  tupatyachinmanku. Ichaqa manamá haykapipas chayta ruwanankutaqa saqikunaykichu tayta-mamaykiña utaq aylluykiña kaptinpas. Qari kaynikita utaq warmi kaynikitaqa manam pipas llachpananchu.

¿Imatam ruwanayki hinaspa ninayki pipas qari kaynichaykita utaq warmi kaynichaykita llachpayta munaptinqa?

¿Imatam ruwanayki chay runakuna mana imanasunaykipaq?... Chaypaqqa ama saqiychu qari kaynichaykita utaq warmi kaynichaykita llachpasunaykitaqa. Pipas llachpayta munasuptikiqa kallpawan niy: “¡Ama llachpawaychu! ¡Pimanpas willaykusaqmi!”, nispa. Sichu willakunaykita mana munaspan nisunki “huchaykim” nispa, hinaptinqa ama kasuspayki imapas ruwasusqaykimanta willakuy. Willakunaykim “ñuqallanchikmi kaymantaqa yachasunchik” nisuptikipas. Imataña munachisuptikipas utaq manchachisuptikipas chay runamanta ayqikuspaykim willakunayki.

Kaykuna yachasqaykiwanqa ama manchakuychu aswanqa qawan-qawanlla kay. Sichu tayta-mamayki nisunki “wak runaqa mana allin runam, ama asuykuychu” nispa, utaq “wak lawnintaqa ama puriychu” nispa hinaptinqa kasukunaykim. Kasukuspaykiqa hawkam kanki, manam pipas imanasunkichu.

Mana allin runakunamanta harkasqa kanapaq qawasun Genesis 39:7-12; Proverbios 4:14-16; 14:15, 16; 1 Corintios 6:18 hinaspa 2 Pedro 2:14.